Tuesday, July 17, 2007

ملك الغابة يزأر...مياووو



من منا لم تأت عليه لحظة شجاعة وقتية
شعر بها وإستقرت فى أعماقه ....وعندما وصل لحيز التنفيذ

طلع قطة

سيعتقد البعض أنى قد قررت مواجهة مسئول مثلاً
أو إصطياد فهد
أو حتى تجديد رخصة مرور
ثم رجعت إلى عقلى قبل أن أودى بحياتى فى مثل هذه المهمات المستحيلة

ولكنى لا أتكلم عن هذه المواقف العادية
فيا ليتها كانت بتلك السهولة

لقد واجهت فى حياتى ما هو أصعب وأهم من ذلك
ولكم أن تحكموا

الموقف الأول................ سيدة الكرواسون الأولى

من فترة ليست بالبعيدة
كنت أتسوق فى كارفور مع زوجى وأخيه وزوجة أخيه

وبما أنى مريضة بشراء كل ما هو يخضع ل ديسكاونت ...
كان من المستحيل إضاعة فرصة عرض "اوفر" على الكرواسون
خاصة أن أبنى الأكبر يحبه وقد يريح قلبى وينام يومها وقد تناول عشائه

وما أن سمعت النداء على العرض .... حتى جريت لأحصل على علبة قبل الهجوم التترى
حيث أن كثير من الناس عندهم هوس الاوفر ...شفاهم الله
وعندما وصلت لم أجد مكاناً إلا وراء سيدة سمينة تضع عربتها بجانبها ....وكأن المكان يستوعب مثل هذه الاشياء

وفجأة جاءت العربة المحملة بالكرواسون ...وبدأت الفتيات القائمات على الأمر بوضعه أمامنا

أو بمعنى أصح أمام السيدة الواقفة أمامى
فإن وضعن الكرواسون فى أقصى اليمين صار أمام عربتها
وإن وضعوه أقصى الشمال أصبح فى متناول يد أولادها
وإن وضعوه فى الوسط بات بين يديها

وإذ بها تأخذ العلب وتضعها فى عربتها وقد تركت ما يبعد عنها لبعض الزبائن الواقفين حولها

وقد أستنفذت انا كل أوضاع الجمباز الذى لم أتعلمه قط كى ألمس حتى غطاء علبة .... ولكن لا أمل

إلا أنى أخذت "كوع" محترم من ذراع السيدة إن كنت محقة فى وصفى

التى لم تترك مكانها إلا بعد أن نفذت كل العلب

ولا أستطيع وصف شكلى لكم بعد أن وجدت الصناديق المخصصة للكرواسون فارغة تماماً

وعندما سألت الفتاة أمامى عن إمكانية الحصول على جديد...... أجابتنى بأن الكمية أُستنفذت بسرعة عجيبة ولم يكن فى حسبانهم هذا الضغط ..ولكن هناك أنواع أخرى من المخبوزات ..
فالتّفت بعينين يملؤها الحقد ناحية السيدة ....... فوجدتها وقد فتحت إحدى العلب لتتذوق الكرواسون مع أولادها الثلاثة ...والائى يشبهونها كثير الشبه

وبدأت فى التحرك ناحيتهم
فوجدت زوجى ومن معه يرجعون بى للخلف ...وهم يقولون ( حا تعملى ايه يا مجنونة ) ؟؟

صرخت قائلة
وهى ليه تشترى كل الكرواسون ده!!؟.....دى محتاجة شهر عشان تخلص الكمية دى ....وابنى اللى قد النملة جنب اصغر اولادها حينام من غير عشا .. وانا وعدته بكرواسون النهاردة
لازم أوريها وأرد لها الكوع .. أو ..أو.. أنا حأفهمها غلطها بس يعنى عشان تعرف حدودها مع اللى حواليها
سيبونى ...محدش يحاول .. او يفكر إنى ممكن أتراجع

فذهبت وانا اسمع زوجى يقول .. "ارجعى يا متهورة" ....وإن كنت أشك فى صدق كلامه فقد أحسست بعد ذلك رغبته فى الإستمتاع بمشاهدتى داخل ساندوتش بشرى عليه بعض الكاتشاب

ثم سمعت زوجة أخيه تقول .... أولادك عايزينك ...متتهوريش

وخلال سماعى لهذه الجمل التى إن لم تزد غيظى من سيدة الكرواسون ....قد أثارت حفيظتى ...وقررت الحرب
وبعد أن تبقت خطوة واحدة وأصل إليهم

سمعت إبنتى تقول فى يأس وقد أوشكت على البكاء .....متسيبيناش يا ماما ...إحنا منقدرش نعيش من غيرك

فوجدت نفسى وقد تسمرت قدماى ...واسترجعت شريط حياتى
تذكرت ضحكات أولادى
وإنطلاقهم يجرون ويلعبون ....ثم يعودون لأكل الساندوتشات
تشدو فى أذنى صفاء أبو السعود " لااااللااا ..لااااللااا ..دوبى دوبى دوبى دووو
ثم أفقت فجأة على صوت أصغر أبناء السيدة المذكورة يستأذننى فى المرور بعربته حيث لكل منهم عربة قائلا
" بعد إذنك أطنط"

فرجعت مهرولة قائلة لزوجى ...تذكرت الآن أنهم يحبون البانيه .....فليكن عشاءنا الليلة

الموقف الثانى ...................... الضفدع العجيب

كنت صغيرة عندما كانت شقيقتى الكبرى طالبة فى كلية الصيدلة

ولا أزال حتى الآن أتذكر الضفادع وهى مصلوبة إلى طبق التشريح ...عندما كانت تأتى بهم شقيقتى إلى البيت لتشريحهم كى تتدرب على العملى.....بل يأتون لزيارتى فى كوابيس وهم يضحكون ويقفزون فى وجهى

فقد كنا نجتمع كعائلة دوما لمشاهدة هذة التجربة العظيمة ...والضفدع الذى يخرج قلبه تماما منه ولا يزال ينبض

وكان أخوتى يتأففون لهذا المنظر ...حتى أختى القائمة بتشريحه ...كانت تفعل ذلك على مضض

ولسان حالها يلعن الكلية والدكتور وال.....اولوجى

حيث أن معظم موادهم الدراسية تنتهى بهذا الاولوجى...... وعلى الصيادلة المبجلين الزائرين لهذه المدونة تصحيح وتوضيح هذا الأمر

وكانت أختى تطلب من والدتى دوما التحضير لهذا الحدث الجلل

بأن تقوم بتخدير الضفدع المسكين بالكحول ....ثم تقوم بتثبيته إلى طبق التشريح بدبابيس

وقد قامت والدتى بهذا العمل مراراً وتكراراً حتى كادت تتخرج بدورها من كلية الصيدلة

وقد كنت أنا الوحيدة التى تحس بالإثارة والتشويق أثناء العملية
ولطالما تعجبت من تأففهم ....ووعدتهم بأنى حين أكون طالبة فى صيدلة ....سأريهم التشريح على اصله ....وكيف سأقوم بتخدير وتدبيس بل وحشو الضفدع فريك إذا تطلب الأمر

وبما أن طلبة صيدلة شقيانين ومواعيد محاضرتهم صعبة....كانت أختى تتأخر احيانا على موعد الغداء
كانت تأكل سندوتشات من كافيتريا الكلية ....وصادف أن تذوقت يوما ساندوتشات الهامبرجر....وأعجبتنى...فطلبت منها أن تشترى لى معها فى المرة القادمة واحداً

وفى يوم أتت أختى من الكلية ...فسألتها إن كانت قد أتت بما طلبته منها .....ولم تكن أختى لترفض لى طلباً ...فقد كنت آخر العنقود المدللة دائماً من الجميع .... ماعدا من أخى ..فقد كان يردد دائما أنى آخر العنقود اللى أخدته ونزلت

أومئت لى برأسها وهى تتكلم مع والدتى
فلم أنتظرها ....ذهبت وفتحت حقيبة يدها ...لأجد الورق المعتاد لف ساندوتشات الهامبرجر به

فأخذت اللفة وجلست ....وقمت بفتحها لألتهم ساندوتشى المحبب
فإذا بى أجد ضفدعين يقفزان من الورقة ....أحدهما إلى خارج الغرفة ..والآخر... فى وجهى

وهنا كان عدولى عن قرار دخول كلية الصيدلة .... التى خسرتنى للأبد....وإن كان مجموعى فى الثانوية العامة لم يكن ليؤهلنى لدخولها

إلا أنى أعتبر تلك الحادث هو السبب الرئيسى فى حرمان نقابة الصيادلة من شرف عضويتى.....فضلا عن كرهى الدائم الآن للهامبرجر ....وفوبيا كل أشكال الحيوانات والحشرات والطيور

أكثر ما يغضبنى فى هذا الموقف ....أن أختى كانت تعتبرنى المسئولة عن فقدان أفضل ضفدع فى نظرها من الناحية التشريحية حيث اختاره زملائها بعناية من دلو الدادة (بتاعة الضفاديع)....وقد عثروا على واحدٍ منهم ....ولا يزال الآخر مفقوداً حتى الآن

وعلى من يجده ..... الاتصال ب 911

الموقف الثالث .......عدلت عن كتابته

ودى مش اول مرة ....أطلع قطة

36 comments:

بيتنا القديم said...

بارك الله لزوجك فيك

فعلاً عرف ينقي اشجع قطة في كارفور

ويجعلوعامر

أميرة البلطجية said...

جمييييييييييييييييييييييييييييل
زي العسل يا نانا
انت جمييييييييييلة
وفيه في حياتي انا كمان مواقف زي دي
لما ابقي شاحنة نفسي تمام عشان اهزأ حد
انتهي بأني...انونو
بصراحة بقيت مقتنعة اني معنديش ال
skill
:(
بوست امورة

Jana said...

بارك الله لسهيلة فيك

فعلا عرفت تنقى من لا يرفض لها كادبورى
او جالاكسى

وان كانت لا تعلم ان ال فريرو روشيه
اغلى واحلى....وللمحفظة...افضى

ويجعلو بالبركة عامر

Jana said...

مرمر الجميل
معظمنا عدى بمواقف زى دى

انتى اقتنعتى ان معندكيش هذه المهارة ؟

انا لسه ... ومصممة انى اقدر ابرز مواهبى ...بس مستنية حد اقدر عليه

انتى أأمر
تحياتى

emos said...

:))))))))))))))))) begad kalamek to7fa
kewayes enek makalmtesh el set beta3et el corwason deh kan zamanek asad bs madroob belnar
2otta 2a7san
wel gary nos el gad3ana
enama ba2a belnesba leldafadee3
yaaaaa3
:)
nice post

عصفور المدينة said...

ماله البانيه وماله الفول المدمس
بس احنا كنا عايزين معركة
عايزين نلحق الأوفر وسعي لنا الساحة شوية

u3m said...

دى فى رأيى احسن تدوينة قرأتها عندك لحد دلوقتى .. لان المواقف الشخصية لما يتم سردها بأسلوب طريف زى اسلوبك بيبقى ليها طعم جميل خصوصا وانها مفيهاش اى نصح مباشر او غير مباشر او حتى مغزى للقصة لانه مش لازم كل قصة يبقى ليها اهداف وعوامل واسباب ونتائج والكلام ده كله
وانما هى مشاركة وجدانية للحظات نمر بها جميعا ونعجز عن تدوينها بشكل مناسب

جنى .. احييك بشدة

Jana said...

Emos
انا رديت عليكى امبارح ...بس مش عارفة له ملقتوش لما دخلت تانى
يالا ...مش مهم شكلى كتبته عند حد تانى

المهم
انتى عندك حق
الجرى نص الجدعنة
لكن بما انك متنرفذة دايما
لو كنتى مكانى كنتى حتطلعى جدعة كدة زيى
ههههههههه

نورتينى
ميرسى لذوقك
تحياتى الجدعة

Jana said...

عصفور المدينة
باشمهندس....لو عملوا اوفر على المدمس ...لن اتنازل عن مكان فى الصف الاول...وان خلص الفول انا مش مسئول

اما بخصوص المعركة الضارية التى لم اقحم نفسى فيها...فذلك اشفاقا على السيدة المسكينة واولادها الثلاثة طبعا...ولحرمان من اراد الشماتة من ان ينال غرضه

هذه السيدة كتب لها عمر جديد

سعدت فعلا بتشريفك لى
تحياتى

Jana said...

u3m
بلاسيبو.... فين نورك من زمان
بجد عجبتك ؟؟
ربنا يسعد ايامك
وينورلك طريقك ..قادر يا كريم

بس انا برضه متهيألى
ان اكتر حاجة عجبتك فى البوست صورة القطة عشان شبه مشمش
يالا عقبال متلاقيه شبه الاسد اللى فى المراية

ومتحرمناش من نعقيباتك تانى

وشكرا يا باشا على الكلام الجميل
وأحييك انا ايضا بشدة

منورنى دايما

تحياتى
بدون اهداف ولا عوامل ولا اسباب ولا نتائج ولا ... ولا

اسكندراني اوي said...

جانا
ايه اللي انتي كاتباه دا
انا مش قادر ابطل ضحك حرام عليكي

لا بجد بوست جباااااااااااااااار جدا
احيانا كتير المواء يكون هو كل الشراسه
تحياتي ليكي

Jana said...

اسكندرانى اوى
سعيدة فعلا ان البوست عجبك

يا ريت تحطلنا عندك مع باقى صور اسكندرية صورة كارفور..وخصوصا صورة قسم المعجنات والكرواسون
ويا حبذا لو صورة للكرواسون نفسه...عشان تعرفوا اد ايه كان يستاهل خناقة ...للاسف فلتت منى

نورتنى
تحياتى

مدونة كسبان said...

تقدر تقولى مش قطة
لكن التعامل بعقلانية والرجوع بعد الإندفاع أو قبله يعنى جميل جدا
وقليل من الناس بيعرفوا يتحكموا فى نفسهم
وبعدين احمدى ربنا ان هيا خادت الكرواسون بس
وكويس اوى ان انتى مرجعتيش
دى كانت ممكن تعملك هامبورجر

تقدرية تسميه تحكم قبل الإندفاع
لكن مش شغل قطط

مدونة كسبان said...

يانهار ابيض
هوانتى عامله اداره تعليقات
ماشى

على فكره أنا رديت على تعليقك فى بوست قديم لسا دلوقتى واللى كتببته عن ادارة التعليقات

Jana said...

مدونة كسبان
قطة مش قطة
اهو ضاع منى الاوفر والسلام
وبعدين بتجيب سيرة الهامبرجر ليه
انا مش لسه قايلة انى اتعقدت منه هو كمان
بخصوص بقى موضوع ادارة التعليقات
كنت اتمنى متشوفش الكومنت
واجى بعد يومين اثبتلك بالدليل القاطع والبرهان الساطع
اهمية الموديريت
لكنك قريته...وافحمتنى

نورت المدونة
تحياتى

david santos said...

الشكر لك العمل وعلى درجة جيدة في عطلة نهاية الاسبوع

Jana said...

David Santos

أسعدنى تعليقك

يظهر حبك للغة العربية فى مدونتك
لذلك ارد على التعليق بالعربية ايضا كما انى للاسف لا اجيد اللغة البرتغالية

ولكنى سأزور مدونتك دوما بحثا عن كل ما هو جديد باللغة العربية

اشكرك على مرورك الكريم

تحياتى

break said...

حد بيجيب سيرة الضفادع هنا؟
اصل انا باجى على الريحة
ربنا لا يوقعك ف ضفدع يا بنتى

و بالنسبة للاسود والقطط
انا غالبا و دوما بطلع فار
تحياتى

mo'men mohamed said...

ههههههه
انت حسستنينى انك داخلة حرب مش داخلة عاركة
على العموم معنى كلمة اولوجى دى يعنى " علم " وليكن مثلا
emberiology
وتعنى علم دراسة الأجنة
histology
علم دراسة الأنسجة
pathology
علم دراسة الأمراض
bacteriology
علم دراسة البكتريا
microbiology
علم دراسة الكائنات الدقيقة

وغيرها الكثير من أسماء العلوم

السلام عليكم

Jana said...

Break
بمناسبة الريحة
حتى الان تذكرنى رائحة الكحول بالضفادع
وبعدين الضفادع هى اللى بتقع فيا ...مش انا اللى باقع فيها
وعلى فكرة
متشربيش الضفاديع بتوعك نسكافيه عشان يحوأ فيهم الكحول ويناموا بسرعة

سيبك انتى..الفار اذكى من الاتنين

تحياتى

Jana said...

Mo'men Mohamed
انت بتقول فيها
دى كانت حتبقى حرب الكرواسون العالمية الثالثة
بس ربك ستر

هو انا عارفة ان اولوجى يعنى علم دراسة كذا
بس كنت عايزة اعرف الضفادع تتبع اى اولوجى ؟؟
ولكن ...أفادك الله فعلا على الاضافات اللى انت قلتها
مدونتك المتاح لى دخولها رائعة..جزاك الله عنها كل خير

نورت المدونة
تحياتى

يعقــــوب .... said...

من احلى الجمل في التدوينة ده هو العنوان
معبر جداا

Jana said...

أخ يعقوب
اسعدنى تعليقك
وسعيدة لأن العنوان اثار اعجابك ...خاصة انى اخذت وقت كبير فى اختياره ...ولم يعلق عليه احد غيرك

ذهبت لمدونتك قبل الرد عليك
وتصفتحها سريعا لحين العودة وقرائتها بتمهل
ففوجئت بالبوست الخير ..واعتزالك التدوين
وارجو الله ان يصلح الاحوال ويزيل الكرب حيث خسارة للتدوين اعتزال مدون مثلك
تحياتى
وشكرا لمرورك الكريم
ويا ريت تنورنى دايما

BinO said...

السلام عليكم
ظريفة جداً
جداً
أكيد خير أن شاء الله
قدر أنكم متكلوش الكرواسون

:)

Jana said...

Bino
وعليكم السلام ورحمة الله وبركاته

معك كل الحق
الخير دائما فيما اختاره الله

شكرا لمرورك الكريم

تحياتى

أميرة البلطجية said...

نانا
أحمد عمللك باس للدور بتاعه في اللعبة
هاه؟ حتخدي الدور وله اتصرف؟

Jana said...
This comment has been removed by the author.
Jana said...

مرمر
انا رديت عليكى على الميل
سلام

Anonymous said...

جامد اوى اوى حوار الضفاديع ده


ممكن ابقى انزل اجيب شوية ضفاديع واجرب اطعم بيهم للسمك

اعتقد هيكونوا كويسين اذا طعمت بيهم من حتة تخليهم ما يموتوش..............وهم لما هيلعبوا فى المياة هيجننوا السمك وهيجيبوا احلى اوزان


متخافيش من حد..........توكلى على الله............وربنا يوفقك

والسلام

Jana said...

احمد اسلاميست

اهو كام ضفدع من دول ..يلموا عليك قروش وادى الدوم كله
بس انت ابقى لاحق عليهم

وبعدين انا مخفتش من الست
تؤ تؤ تؤ
ابدا
ابسلوتلى

انا قصرت الشر ..عشان الحق اوفر تانى كان على الجبنة الشيدر

كلنا متوكلين على الله
وكفى بالله وكيلا

وان شاء الله يوفقك
فى اللى وراك اليومين دول

تحياتى

الطائر الحزين said...

السلام عليكم
جزاك الله خيرا
فعلا ما تقولية صحيح اننا احيانا نظهر قطط فى مواقف ونظن انفسنا اسود
وهناك مواقف نفعلها ونكون اسود مع اننا كنا نظن انفسنا قطط

مفيش حد يعرف قدرات نفسة الحقيقية

تحياتى

Jana said...

الطائر الحزين

وعليكم السلام
جزانا واياكم

افادك الله
لقد لخصت الموضوع فى كلمتين

اللهم اجعلنا اقوياء دائما فى الحق

اهنئك على ايجابية مدونتك

اسعدنى تعليقك
شكرا لمرورك الكريم
تحياتى

الزهراء said...

انا جيت متأخ ولا ايه؟:(

البوست معمول من زمان

خيير

هوا فعلا كتير بنكون عايزين نزأر وبعدين بنطلع قطة :(
دي بتحصل كتير اوي :D

كلامك جميل اوي واسلوبك رائــــع بجد:)

Jana said...

الزهراء
اهلا بيكى
لا متأخر ...ولا حاجة
وانتى تنورى فى اى وقت
مدونتك على فكرة بدايتها قوية
ان شاء الله تكملى بنفس القوة
شكرا لمرورك

تحياتى

Sha2loob said...

جميله جداً
ورغم ان الموقفين مليانين بخفة الدملكن معرفش ليه الموضوع ككل أثار في داخلي الشجون خصوصاً الموقف الأول
يمكن علشان بعمل قط كتير, مش عارف ولا يمكن علشان أنا رفيع وهفتان ممكن برضه
مدونة أكثر من رائعة
تحياتي
على فكرة دي أول زيارة ومش الأخيرة ان شاء الله

Jana said...

Sha2loob
اهلا بيك اولا
مش دايما لما نتراجع عن شىء يكون ضعف منا
احيانا يكون التراجع منتهى الذكاء والقوة
البوست كان ساخر مش اكتر

ان شاء الله متكونش اخر زيارة

شكرا لمرورك

تحياتى