Monday, July 30, 2007

كام ..؟.. 4 تاجات.! !؟؟..ارحمنا يا رب




بصراحة يا جماعة

انا مش ناوية اجاوب على الاربع تاجات النهاردة....انا حاكتفى بواحد بس
والباقى ان شاء الله مرة تانية ...يدينا ويديكوا طولة العمر


التاج الاولانى....


دخلت بيتنا القديم ...عند سمسم
لقيته بعد ما جاوب عليه....بيبعته ليا ولكل المدونين والمدونات اللى عرفهم فى عالمنا الافتراضى

عموما ...ليه يوم
يالا ............ يا مسهل


انت مين..؟؟
انا ماما لأحلى 3 اطفال فى الدنيا
مين اكتر 6 اشخاص بتحبهم..؟؟

العدد 6 ده قليل جدا

لما يزيدوا شوية ابقى اجاوب السؤال
انت سعيد..؟؟

الحمد لله رب العالمين...انا راضية دايما
لكن السعادة بقى تتقاس بترمومتر زى درجة الحرارة ....يعنى حسب الطقس والمناخ...
لكن حتى فى ادنى درجاتها ...بافتكر ان السعادة اللى بجد ..نلاقيها فى الجنة ان شاء الله

لو اجتمعت مع حسنى مبارك فى غرفة واحدة..؟

كان فى مقال لابراهيم عيسى..بعنوان..انك ميت وانهم ميتون

حد قراها..؟؟


لو معاك مليون ونص جنيه..حتعمل بيهم ايه ..؟؟

هو نص جنيه ومليون جنيه...ولا مليون ونص على بعضهم؟
عموما هى مش فارقة كتير
لو المبلغ الاولانى
حاجيب شقة ف الدور ال15 بتطل على البحر مباشرة..و نسكافيه اشربه فى الفرنده
والباقى حيروح فى دايبرز بنتى الصؤننة
ولو المبلغ التانى

حاشترى شقة فى نفس العمارة بس فى الدور ال20..ونسكافيه مزود بنكهة الفانيليا...و
دايبرز مزود بكريم ملطف


بتحب مصر..؟؟

زمان لما كنت باسمع الاغانى الوطنية القديمة بتاعة عبد الحليم ووردة..وغيرهم

كنت باحس بوطنية تغمرنى من رأسى لأخمص قدمى...وكنت باعيط من فرط الوطنية

دلوقتى ..لو صادفت وسمعتها

بحس بحاجة تانية خالص هى اللى بتغمرنى

وبرضه بابقى عايزة اعيط .....لكن المرة دى من فرط ال...... ولابلاش


بتحب البنات..؟؟

بلاش السؤال ده دلوقتى...وانا لسه شارية توك شعربالشىء الفلانى

لا بس بجد البنات عندها حنية لا توصف

وادينى باكل شيكولاتة على حسهم

ههههههههه



انت مسلم ..؟؟

الحمد لله على نعمة الاسلام ..وكفى بها نعمة

ولكنى اخاف عندما توضع هذه النعمة فى كفة الميزان يوم الحساب

ولا اجد ما يوازيها فى الكفة الاخرى


ليه..؟؟


سؤال عجيب فعلا؟؟

لكن متهيألى...ممكن يكون ده رضا ربنا علينا انه خلقنا مسلمين

ووفر علينا عناء التفكير والبحث حتى نكتشف ان ديننا هو الطريق الوحيد للجنة

مع ان اللى فكروا وبحثوا وجاهدوا واختاروا...هم دول من يستحقوا الفوز بالجنة عن جدارة

مين اكتر شخصية متقدرش تستغنى عنها فى حياتك ..؟؟ ...وليه.....؟؟

انا بصراحة شخصية اعتمادية

يعنى باعتمد على كل اللى حواليا ....كل منهم فى مجاله

ماما...جوزى...اخواتى....حتى اولادى

ليه..؟؟

غلاسة

ايه اكتر موقف محرج اتعرضت ليه فى حياتك..؟؟

كنت فى فرح واحدة صاحبتى قوى

واثناء الزفة ..كنا نازلين سلالم وانا كنت وراها على طول...وطبعا كنت لابسة كعب عالى

وهوب... لقيت نفسى اخدت سلمتين فى سلمة...وعشان الحق نفسى مسكت فى هدوم حد جنبى

لقيته بعد كده خال العريس....

بس مش دى المشكلة...المشكلة انى اتصورت فيديو وانا باقع

ومن ساعتها وانا مشهورة قوى فى العيلتين

اتصرفت ازاى..؟؟

صاحبتى اللى كانت معتمدة عليا فى تظبيط ديل فستانها وطرحتها...كل ما تيجى تقوم وتعد

اكتفيت بمشاركتها وجدانيا من مكانى على الترابيزة

اصلى نسيت اقوللكوا ..ان كعب الجزمة اتكسر

ايه الامنية اللى بتدعو ربنا دايما انه يحققهالك

ان ربنا يحفظنا من عذاب القبر...وناخد كتابنا بيميننا..وندخل الجنة برحمته

انا وكل اللى بحبهم

تمرر التاج لمين..؟؟


متهيألى كل اللى كان ممكن ابعتلهم التاج جاوبوا عليه قبل كده

والباقى مبيحبوش التاجات

حركة جدعنة اهى

سلام والى لقاء اخر حيكون ان شاء الله

مع تاجات مفتكسة من اميرة البلطجية


10 comments:

عصفور المدينة said...

اتخضيت قلت حنقرا 4 في واحد لكن حصل تخفيضات

أحب أشاركك معاناة الحفاضات التي استثمرت فيها مبالغ طائلة حتى الآن ذهبت جميعها
شكرا على الإجابات المسلية
أدعو الله أن يحقق لنا ولك ما تمنيت

Jana said...

باشمهندس عصفور

كنت منتظرة تعليق سيادتكم بالاخص
خاصة انه قد تبدو بعض الحيدة فى اجابة السؤال الرابع
ولكنى والله لم اكن اتهرب من اجابة
بل انى اردت توصيل معنى معين
لم يتسنى لى ايضاحه الا بالرد عن السؤال بسؤال
ولكن بما انك لم تعلق على هذه النقطة
اذن اعتقد انك ادركت تماما ما كنت اقصده

اما بخصوص الحفاضات...فهو فعلا استثمار ولكن من نوع اخر
بلغة المحاسبين ..يشبه الديون المعدومة

وادعو الله ان يستجيب لدعائنا جميعا

وشكرا لمرورك الكريم

عصفور المدينة said...

انت عرفت إني باكره الحيدة جدا بس والله معظم إجابتنا في التاجات بتكون حيدة
عندك مثلا لو شفت إجابتي على نفس السؤال ده

أنا وانت وحسني مبارك والجميع في غرفة كبيرة هي سجن المؤمن وجنة الكافر

حيدة مشفية
وبعدين التاج ده وصلك اكيد عن طريقي لأنه متعدل على طريقتي قبل ما يجي لي
كان السؤال
لو زنقت حسني مبارك في أوضة حتعمل فيه إيه
ده بقة ما ينفعش معاه الحيدة فأنا غيرت السؤال أساسا

أكيد في السند بتاعك حتى مصدر التاج عصفور المدينة
الإجابات الدبلوماسية ساعات بتوصل المطلوب أكثر

Jana said...

عصفور المدينة
باشمهندس...انا لو كنت شفت اجابات حضرتك قبل كدة بشوية مكانش حصللى الرعب ده من تعليقك على الاجابة بتاعتى

دى حيدة مشفية وخالصة مخلصة

بس فعلا نقدر نسميها اجابات دبلوماسية فيها تورية تبرز المعنى وتوضحه

اجابات حضرتك كانت دروس

شكرا
تحياتى

break said...

حلوة اجاباتك
هانت فاضل 3 وتوصلى
ربنا يخليلك ولادك :)

Jana said...

Break
ربنا يخليكى على الدعوة الحلوة بتاعتك
بس تعالى هنا
اروح ازورك ..الاقيكى بعتالى تاج خامس
هو انا عارفة اخلص دول

مستنية اقرا ردودك على نفس التاج ده
انا شايفةاسمك فى كشف الناجحين
قصدى فى كشف المدعوين

وعقبال ما نسمع خبر نجاحك بتقدير امتياز مع مرتبة الشرف ..والمخدة كمان
سلام

بيتنا القديم said...

إحم إحم ...السلام عليكم

حد موجود هنا يا اخونا

عاوز اعلق

إني بدي هير

يا ناااااااااااااااااااااااس

يا هوووووووووووووووووووووووو

علي العموم...كل تاج وانتم بخير

واسأل الله لكم نسكافيه في الجنة

آمين

Jana said...

سمسم
وعليكم السلام ورحمة الله وبركاته
بس ايه الدوشة اللى انت عاملها دى
صحيت الخلايق
وبيقولولك

no body here
فوت علينا بكرة

ولا خلاص خلاص
تلاقى التاكسى اللى جابك هنا مشى

اتفضل اشرب نسكافيه معانا

ميجيش من بعد تاجاتك
قصدى خيرك

break said...

هانت فاضل اربعة بس
كلها واحد ويبئا فاضلك 5

للأسف انا سبقتك وجاوبت عليه مرة
و الظاهر انك قريتى اسمى فعلا ف كشف الناجحين
لانى نجحححححححححححت والحمد لله

Jana said...

Break
الف الف مبروك
كيس الجوافة اللى جبته معايا المرة اللى فاتت
لسه فاضل فيه حاجة..ولا اجيب هدية تانية
لا لا ..انا حاجيبلك شيكولاتة من سويزا
وحاجيلك البلوج اباركلك انتى وصحباتك العسولين
يالا عقبال البكالوريوس
وتبقى دكتورة اد الدنيا
مبروك تانى
تحياتى