Tuesday, October 30, 2007

هذا هو البهريز....الماثيماتيكى


بعد ان فاض بى ووجدت انه لا وسيلة لأن يفهم ابنى هذه المعضلة الرياضية الماثيماتيكية

ولا جدوى من المحاولة المستمرة التى كادت ان تقضى على ما تبقى من تركيز فى عقله البسيط

فكونه تعدى الثمان سنوات لا يجعله علامة فى الرياضيات او فقيه فى المسائل الحسابية المعقدة

وبعد ان قطع نياط قلبى حين جاء موعد امتحان الماث للشهر...فأخذ يبكى لأنه لن يعرف ان يحل شفرة هذه المسألة بتاتا

وأخذت انا فى محاولة اقناعه ان هذه الدرجة التى ستنتقص من الامتحان غير هامة لأبيه ولى طالما ندرك صعوبة المسألة عليه ..وبأنى سأكافئه على النتيجة النهائية ايا كانت..وشجعته ولم يتبق الا ان اقول له ما قالته ام اللمبى الحكيمة لابنها (مذاكرتك فى راسك ...مطوتك فى جيبك ...الخ

وبعد ان عرف زوجى هذه المشكلة التى اصبحت شبه يومية ...وانا فى محاولة مستمرة ان افهم ابنى المسألة
كان رده بنظرة وجملة واحدة ذكرنى فيها عندما وعدته انى كفيلة بشرح كل المواد الدراسية لأولادى على الاقل حتى الصف الثالث الاعدادى الذى قد احتاج وقتها لمساعدة من مدرس خصوصى ان احتجت اساسا

وها انا اصرخ والعن بسبب مسألة فى تانية ابتدائى

ولكنى عندما رأيت هذه النظرة من زوجى وكأنه يقول لى (يا خيبتك ده احنا لسه بنقول يا هادى) ...او ....للأمانة... هو قالها فعلا

عندها قررت ان اشمر عن ساعدى وابدأ بزيارة المدرس ..وانا اعرف تماما ما سأواجهه هناك

وان كنت ارى ان عدد ليس بقليل من المدرسين هم ناس أفاضل يملكون ضميرا مستيقظا دائما ويروا اولادهم فى هؤلاء الاطفال

فيحسنوا عملهم ويتقنوا فيه ..ويرضوا ضمائرهم...بارك الله فيهم وأكثر من امثالهم

لكنى لم اتوقع ذلك فى مدرس ابنى... مما رأيت عليه ابنى من عدم فهم الماث فى المدرسة فى حين يفهمه بسهولة منى...بغض النظر طبعا عن معضلتنا بطلة هذا البوست

وصدق حدسى حين قابلت المستر المبجل... الذى قابلنى بمنتهى الاحترام.وبابتسامة واسعة .فأظهر مودة وذوق يفوقا الحد

تعجبت فى بادىء الأمر....ولكنى قررت الاستفادة من هذا الزوق الزائد ...بأن اطرح عليه المشكلة ..خاصة وانى اراها مشكلة فى المنهج العجيب وليست فى ابنى

المنهج الذى يسمح باعطاء مسألة ليس لها حل الا عن طريق استخدام القسمة...والتى لم تنتهج بعد للصف الثانى الابتدائى

فعندما ذكرت له ما نواجهه يوميا من جراء محاولات حل هذه المسألة الملعونة
ابتسم لى ابتسامة اوسع من ذى قبل

وتكرم باعطائى الحل السحرى....الذى يتمثل فى درس خصوصى

....

حقيقة ...لم يذكرها صريحة

ولكن هذا ما استشفيت من كلامه

او ما انتويت فهمه مسبقا...حيث حبيبك يبلعلك الزلط وعدوك يتمنالك الغلط

وكونه لم يستطع اعطائى جوابا شافيا على ما سألت

ان دل فانما يدل على احساس بالمسئولية تجاه ما يحدث

حيث تاكدت بعد ذلك بعد مباحثات طويلة وحوارات ادت الى نتائج مهمة ..مع امهات أخريات

ان هذه المسألة العجيبة لم تأت بهذا الشكل ابدا مع اولادهم...وانما بصورة مبسطة جدا

بل ايسر مما يستطيع ابنى حله...بعد ان قام المسكين بحل كل المسائل ذات الصلة ..التى اخترعتها من اجله

وان مستر (......) ربنا يهديه متعوووووود.داييييييييما....يأتى بما هو غير قابل للحل فى ظل المنهج

فيلجأ اليه اولياء الامور لاعطاء اولادهم درس خاص

لعله يجيب التايهة ...ويعدل أدمغة اولادهم...وكأنه قادر على عمل الشربات من الفسيخ...والغزل برجل حمااااااااااااااااار

او لعله الخوارزمى او الكاشانى ...متنكرا فى زى مستر ايجيبت

وفى النهاية ذهبت لزوجى احمل علامة الانتصار

وارد على نظراته بنظرات اخرى تشبه نظرات العباقرة عندما ينتهون من اختراع جديد لهم...وقبل ان يقوموا بتجربته

حتى اذا جرب احدث انفجارا هائلا فى وجوههم...فجعل نظراتهم تتحول الى خيبة امل

حيث تحولت نظراتى التى كانت تحمل بعض الزهو الى نظرات تحمل صدمة عصبية قادمة

حين اظهر زوجى سعادته بى واسترجع ثقته الكاملة فى لدرجة انه اتى بابن صديقه ...الطالب فى الصف الاول الاعدادى...لأشرح له الساينس........ولم لا ؟؟؟؟ .....طالما انه لم يصل الى الثالث الاعدادى بعد


41 comments:

عصفور المدينة said...

مش عارف إزاي انت بلعت الطعم بسهولة كدة

الموضوع واضح جدا وفاقع جدا وبعدين بعيدا عن الناحجية التعليمية ألجأ إلى استثمار الحدث في إيضاح للأطفال أن هناك خللا في التعليم وفي ذهنية القائمين عليه وعلينا أن نتحمله وهذا عنصر هام في طريقتي التربوية

إيضاح الحقيقة المرة للطفل بشكل مبكر مع الحرص على ألا يتسغل هو هذه الثغرة في التهاون بل أستخدمها لإيضاح أن عليه أو عليها أن يثابر وأهمية التعليم ولكن بإيضاح كل عنصر في موقعه الحقيقي

لكن مع كل ذلك أنا فاشل في الشرح ولكن أظبط المواضيع وزوجتي أو المدرس يشرح
:)

اسكندراني اوي said...

كان الله في عون طلبه هذا الزمان

مناهج في سنوات مبكره جدا
كنا ندرسها نحن ي سنوات متاخره من الدراسه

ومدرسيت نزعت مخافه الله من قلبهم ليحل محلها الجشع

والضحيه هم الطلبه المساكين
واولياء امورهم

طال الليل said...

الأخت الكريمة
لازلت مذهولا ومندهشا من هذا المدرس الذى يتعمد تعجيز أبناءنا بما يفوق قدراتهم العلمية ومدركاتهم العقلية سعيا إلى مكسب رخيص مهما كان
ألا يخشى هذا وأضرابه من سؤال الله عن مايمكن أن يسببه من سقوط قيمة العلم وهيبة المعلم بل وجدوى ربط التربية بالتعليم
أى جرم إقترفه إذ أفقد تلميذه الثقة بالمدرسة والمثل العليا إنه لعمرى أبشع جرم فى حق هذه العقول الغضة المتأهبة لنقش ماترى وتتعلم على صفحات بيض متعطشة


ملحوظة فى ترويسة الصفحة أرجو إصلاح كلمة إسعى إلى إسع بالجزم بحذف حف العلة

وبارك الله فيحضرتك على إلقاء الضوء على هذه المشكلة الكبيرة التى تهدد كيان التعليم وبالتالى ثقافة الأجيال القادمة

الطائر الحزين said...

الله يسامحك

فين المسألة ؟؟؟؟

ان لعبة القط والفار بين اولياء الامور والاساتذة الافاضل

الله يكرمك نحن ادرى الناس بأبناءنا وبمستواهم وان كانوا فعلا فى حاجة لدرس أم لا

ونحن نحاول أن ندخلهم افضل المدارس بمفهوم العصر حتى يتفتح ذهنهم ولا يحتاجوا الى دروس خصوصية او غيرة والا فالمدارس العادية موجودة

وعلى رأى المثل الاول على قرية افضل من العاشر على مدينة

مصمم تقولى المسألة يمكن حد يعرف يجيب التايهة ونعطى دروس فى المدونات
والله فكرة ايه رايكم
لو كل واحد قابلته مسألة مش عارفها او سؤال مش عارفه لابناءة يعرضة ونحاول نساعد بعض

بارك الله فيكم

بيتنا القديم said...

جانا
....
بداية الف مبروك علي الشكل الجديد...
ثانياً الف مبروك بردوه علي ثقة زوجكم الكريم..!!
ثالثاً وهذا بيت القصيد و"حشاوي" الحقيقة..
بمناسبة دخول مصر عصر التغيير الفلكلوراطي
تواجه الحكومة المصرية الحالية والمستقبلة بتاعة سعادة جمال بيه اشد الانتقاد فى مسألة الدروس الخصوصية
والتهاب اسعار المدرسين الخصوصيين ...
وكأن مجانية التعليم اصبحت معدومة
فما تفعله المدرسة .. لا يتناسب مع الكم والكيف العلمى
فيظل التلميذ محتاج دوماً الى مَن يفتح له افاق العلم
وبدون فلوس .. دروس ... سيظل منحوس
اما عن الجامعات فمن اعلى كلية الى اقل معهد ...
لابد ان يقترب الاستاذ الجامعى اكثر بطلبة علمه
فكيف
عن طريق الدروس
هذه القضية يتناولها الكثيرون
ولكن
دون طائل من التغيير
الدرس اليوم
اللى ما معاهوش ما يلزموش ...
ـــــــــــــــــــــــــــ
الخلاصة:
ثقة الأستاذ زوجك والد جانا لم تكن مدعومة بمعطيات الواقع..ربما لأنشغاله وربما لأنه يحسن الظن في قادة العزبة اللي هي مصر..!!
(:

Jana said...

عصفور المدينة

يا باشمهندس انا كنت اتوقع مسبقا ان زيارتى للمدرس لن تثمر عن الفائدة التى كنت ارجوها...واحتمال ان يطرح مسألة الدرس الخاص كان احتمالا واردا عندى

ولكن...لم يتبق لى الا هذه المحاولة الفاشلة لأعرف كيف تسنى لهم وضع هذه المسالة للصف الثانى الابتدائى

اما بخصوص ايضاح الحقيقة المرة للاطفال
قد كنت احب ان انأى بابنائى عن اكتشاف هذا الواقع المرير مبكرا ..حتى يشد عودهم وتصلب قامتهم ..فيستطيعوا تخيل ما يحدث فى دنيانا
ولكن من الواضح انه اسلوب ثبت فشله..ولن ينتج عنه الا خسارة مؤكدة

أعانكم الله معشر الرجال على تظبيط المواضيع
وأعاننا نحن الزوجات على الشرح والتطبيق

بارك الله فيك
دمت طيبا

Jana said...

اسكندرانى اوى

كان الله فى عوننا نحن اولياء الامور
كلنا ضحية للمناهج العجيبة

وكان الله فى عون زوجتك
فهى بمثابة اب وام للاولاد طوال فترة غيابك
أعادك الله لهم بسلامة
وجمع شملكم على خير

أكرمك الله
دمت طيبا

Jana said...

طال الليل

لا تندهش ولا تتعجب
اصبح هذا الحال سمة العصر
العصر الذى اصبح فيه على قولك الثقة فى الآخرين واستقدام حسن النية على سوء النية بمثابة اقتراف جرم

وجدت فعلين احتاجا الى الجزم بحذف حرف العلة وليس واحدا
ولكن العجيب انى قتلت التدوينة بحثا عن فعل (اسعى) ولم اجده مطلقا
عموما ...تم تدارك الخطأ يافندم

ولا حرمنا الله من تنقيحاتك النحوية
استغلالا لابداعك فى لغتنا العربية الجميلة
وعذرا حيث كتبت هذه التدوينة من اكثر من اسبوع وأكملتها بالامس ..فى عجل...ولم يتسن لى مراجعتها بالشكل المطلوب

أكرمك الله
دمت طيبا

Jana said...

الطائر الحزين

ربنا يسامحنا كلنا
بس ليه كده !!؟؟
لقد أفردت اكثر من سطرين فى التدوينة للمدح فى المدرسين المحترمين والافاضل الائى يحق عليهم قول
من علمنى حرفا صرت له عبدا
وأحسبك واحدا منهم ان شاء الله

انما اتكلم هنا عن من يستغل وظيفته ويعتقد انه يتحكم فى مصائر البشر فتسول له نفسه ان يجبر البعض على تعاطى الدروس الخاصة
وللاسف ينصاع الكثير لمثل هؤلاء..فيزيدوهم توحشا وجشعا

بالنسبة للمسألة
صعوبتها تكمن فى طرحها على الصف الثانى الابتدائى...وليس فى فكرة المسألة ذاتها...اعتقد ان طرحت على الصف الثالث لكانت من اسهل المسائل
ولكن عموما...المسألة كانت على هذا المنوال.مع اختلاف الارقام وتنوع طريقة السؤال
مثال
find the missing number
217,.....,225,.....,232
the answer
217,221,225,229,232

or
complete in the same pattern
521,....,533,....,545
the answer
521,527,533,539,545

ولكن هيهات ان تفهم طفل فى الثانى الابتدائى هذه المسألة
حيث يتلخص حلها فى طرح الرقمين الاول والثالث ثم القسمة على 2 ثم اضافة الناتج للرقم الاول للحصول على الرقم الاوسط
فكيف يتأتى ذلك وهم لم يدرسوا القسمة بعد !!!؟؟؟
ولكنى اسجل اعجابى باقتراح حضرتك فى عرض الاسئلة الصعبة التى يواجهها اولياء الامور
علها تلقى اجابة عند فاعلى الخير والثواب امثال حضرتك
وشايلينك لعوزة يافندم

بارك الله فيك
دمت طيبا

Jana said...

بيتنا القديم

اولا ..الله يبارك فيك يا سمسم
ثانيا ..الله يبارك فيك برضه ..يا سمسم
ثالثا..بدون دروس ..فلوس ..سيظل منحوس! ! ؟؟
الله يبشرك بالخير

وبخصوص درس اليوم
اعتقد انك اوجزت وجبت المفيد

بخصوص الخلاصة الملخصة باخلاص
ان كنت تقصد ان زوجى متفائل بعض الشىء
فأرى صعوبة استشعار ما تذكر فى عصرنا الحالى
وان كنا لا نقنط ابدا من رحمة الله
أليس هذا دأبنا جميعا عندما تضيق وتضيق فنأمل فى الفرج القريب

فأعان الله كل الاباء والامهات على ما يحملون من هم وقلق تجاه مستقبل اطفالهم وصحتهم النفسية والجسدية فى ظل سيادة قادة العزبة على ذكر كلامك
وليحفظ اولادنا من آفات العصر

لم تجب على سؤالى بخصوص ابراهيم عيسى؟؟

بارك الله فيك
دمت طيبا

doha said...

هى دى عادة المدرسين ولا هيشتروها
يعنى
ماعلينا
انا ابن خالى مرة مسكت مسالة
قعدت فيها ساعة عشان افهمها
المشكلة انه لسة فى تالتة ابتدائى
قلت والله ده هيطلع جيل متعقد
بسبب المسائل اللى تجيب الضغط دى
المفروض على الاقل اعدادى
مش تالتة ابتدائى
والله
لا تعليق بجد
تحياتى

Jana said...

doha

ربنا يستر فعلا على الاجيال القادمة
اسعدتنى زيارتك الاولى
واتمنى متكونش الاخيرة

نورتنى
تحياتى

الطائر الحزين said...

لست مدرسا كما بدا لحضرتك

وجاء هذا الاقتراح على بالى عند قرءة التدوينة

break said...

ممكن درس اورجانك
محنا بردو اسمنا كنا فى اعدادى السنة اللى فاتت
:)

حقيقى ربنا يكون فى عونك
وعون ابنك طبعا

انا الحمد لله و بلا فخر
ابتديت دروس من تالتة ابتدائى الترم التانى
وكانت سابقة ملهاش مثيل
لان كل اصحابى ابتدوا من اولى ابتدائى
:D

Jana said...

الطائر الحزين

عذرا طائرنا الحكيم
على الخطأ
وان كنت لا أزال معجبة باقتراح حضرتك

دمت طيبا وبخير

Jana said...

Break

بصى بخصوص الدرس ادورلك ...حبايبنا كتير صيادلة
مع انى عارفة انك شطورة ومش محتاجة دروس

وأعرف كمان ناس كمل كده وبيحبوا يخدموا ممكن ينقولك اجدعها صرصور من دلو الدادة
ويكون لسه بخيره ولم يتعرض للفعص من قبل

ربنا معاكى
عملتى ايه فى الميد تيرم؟؟؟
ربنا يوفقك
فرفشى كده وخليكى اورجانك
دمتى طيبة يا كميل

بيتنا القديم said...

فيييييييييييييييييييييييييييييين

الجدييييييييييييييييييييييييييد

(:

Jana said...

سمسم

كن متفائلا
:)
ولكن ليس بمقياس كتابتك لتدويناتك انت بالذات
ما شاء الله ولا قوة الا بالله
:D
دمت طيبا

The Groom said...


ربنا يباركلك فيه يا رب ويكرمك فيه

العيب مش فيه فعلا العيب في المناهج الغبية دي وكمان في المدرسين عديمي الضمائر

عموما ربنا كريم وموجود وشاهد

تحياتي من ماناساس البلد

Jana said...

the groom

الله يكرمك ويعزك
شكرا على الدعوة الحلوة

النظام التعليمى عندكم اكثر من رائع
يا ريت يطبقوا عندنا نفس النظام ...اللى بيهتم اكتر بنفسية الطفل..عشان يطلع طفل سوى
عندنا بقى بيعقدوا الاسوياء فيفقدوهم مهاراتهم ومواهبهم
المهم اخبار الجو عندك ايه؟؟
فى تلج ولا لسه؟

منورنى دايما
دمت طيبا

The Groom said...


لسه بدري على التلج والحاجات الوحشة دي

هاهاها وحشة بجد دي الدنيا بتقف

بس عموما

تحياتي برضو من ماناساس البلد

عقبال ما تبقى تحياتي من القاهرة عاصمة العالم

Jana said...

the groom

ماهو كمان دى ايام اجازات عشان الاعياد الكتير فى الوقت ده ...مش بس تلج يعنى
انظر للنصف الممتلىء من الكوب دائما
:)
ربنا يوفقك فى مانساس وفى مصر وفى اى مكان ان شاء الله

دمت بخير

L.G. said...

مبتكتبيش حاجة جديدة ليه بقالك شهر تقريبا

Jana said...

l.g

نورتينى ..اولا
وثانيا ..انا بجد معنديش وقت كبير على النت
يعنى بيت واولاد ومذاكرة ..ولكى ان تتخيلى
وبصراحة باحب الوقت القليل ده اخليه لقراءة تدوينات اخرى لمدونين متابعاهم دايما
بس ان شاء الله حاحاول قريب قوى اكتب حاجة جديدة

اسعدنى مرورك فعلا
وشكرا يا جميل لذوقك وسؤالك
واتمنى ترجعى تكتبى من تانى

دمتى طيبة

MiraMar said...

ماما
ماما
ماااااااما
ماما
مااااااااااما
ممكن درس تشريح وياريت لو حضرتك لو علم الأجنه علشان حضرتك بذاكر للماجستير
والدنيا تقيله اوي
:)
وحشتيني جدا
ربنا يخليكي لولادك
اهوه كده
تحيا ماما
وتسقط الدروس الخصوصيه
:)))))))))

Jana said...

ميرا
خليكى واقفة فى دورك ومش عايزين زن وعياط يا ماما
اخواتك برضه عندهم هومورك تقيل

عموما ..ابقى شيلى الميتين اللى تحت وحضريلى السواطير والدقماق والمقصات والملاقيط ومناكيش الكحك والفورمالين ..بس كترى الفانيليا
واسبقينى على المشرحة يا سكيننة

ايتها خدمة
يالا بقى ...وحدوووووه

di el2mr said...

ربنا معاكى بجد ومع ابنك
المشكله انى مش فاهمه هما لسه فاتحين المدارس ليه وهما اصلا بيعلمو الطلبه الدروس من (كى جى ون)و اولى ابتدائى وهكذا
ومش هنقول لحد ثانوى
لا
وكمان فى الجامعه
طيب مايوفرو بقى تمن انشاء المدارس والكلام دة
والله بلد جمييييييله
ومدارس اجمل
ومدرسين اجمل واجمل

لا هتلاقى حد بيستهبل
ولا حد بيعقد الطلبه
ولا اى حاجه من دى طبعا

Jana said...

di el2mr

اهلا بيكى لاول مرة فى البلوج

المدارس مفتوحة عشان الغياب والحضور والمقصف والكانتين

ولكن للامانة يعنى
مش كل المدرسين كده...بل ان معظمهم ملايكةبجد

di el2mr said...

انا بتفق معاكى ان مش كل المدرسين كدة
بس برضو بختلف معاكى ان مش كلهم ملايكه ولا حاجه

لان لو حتى الاغلبيه هما اللى ملايكه مكانش بقى دة حال المدراس والتعليم فى بلدنا

Jana said...

di elamr

يا عزيزتى قليل من اللون الاسود كفيل بتعكير صفحة بيضاء
كما ان صعوبة المناهج...واهتمام الطلبة نفسها بأخذ الدروس ...خاصة بالنسبة لطلبة ثانوى...والغياب من المدارس لم يجعل فرصة للصالحين من المدرسين ان يؤدوا دورهم كما ينبغى حتى ان تمنوا ذلك
فاضطروا الى مجاراتهم

منورانى دايما

دمتى طيبة

بيتنا القديم said...

أختي ام جانا
اشكرك من قلبي...علي مرورك الكريم وموساتي...أسأل الله الا تري مكروهاً فيمن تحب..!
سأمر لاحقاً لأقرأ مدونتك!
دمت بخير

Jana said...

اخى اسامة
وحده الله يعلم كم حزنا لحزنك
ولكنها ارادة الله وابتلائه لك
فنعم من صبر ورضى بقضاء ربه

"ولنبلونكم حتى نعلم المجاهدين منكم والصابرين"

انعم الله عليكما بالسكينة
ونظر اليكما بعين الرضى

koukawy said...

ده مدرس معندوش ضمير مش عارفه بيبلع لقمة الدروس الخصوصصيه ازاي
و في تانيه ابتدائي
يا نهاري

Jana said...

كوكو الكميل

عادى ..تلاقيه بيشرب سفن اب عشان بتهضم كويس
يا عزيزتى ...وفى اولى ابتدائى وفى كى جى كمان
ده بقى عااااادى خالص

العشة نورت
ومتقطعيش الصوصوة والزيارة

دمتى طيبة

فرنسا هانم said...

تالته ابتدائى تانى
انا سايبها عندى الاقيها عندك
لكن تاريخ تدوينتك قديم
يبقى موضوعك انتى الاول
انا تعليقى كله وهمى كله طلعته هناك
وليكى تاج عندى اول ما يصلنا اى تاج
واحنا فى ايام مفترجه
وانشاء الله هتيجى تاجات كتير

Jana said...

فرنسا هانم السكرة

نورتينى

هو انا ابنى فى تانية مش فى تالتة...وصراحة مش عارفة حاعمل ايه السنة الجاية بعد ما شفت عندك المسائل او الكوارث دى بمعنى اصح

على فكرة ...كلنا عارفين تمام المعرفة انك مكنتيش بتمتحنى ذكاء حد ولا اى حاجة من هذا القبيل
الموضوع كان هزار...
ومن باب هم يضحك وهم يبكى
وانا حليت المسألة عشان امتحن نفسى واتدرب على السنة الجاية من دلوقت
يعنى انا وضع خاص

والتاج يا ستى مقبول
واى حاجة منك ..تبقى احلى هدية

اسعدنى مرورك جدا
ونورتينى فعلا

دمتى طيبة وبخير

بيتنا القديم said...

جيت اقولك كل سنة وانت طيبة
ويارب يارب تكوني بخير وسعادة
لا تنس فقيراً او يتيماً او محتاجاً في هذا العيد..
لا تنس ان تبادري بالصلح مع من تخاصمين
لا تنس قريب او قريبة بزيارة في العيد
لا تنس كف مرفوع ولسان يستغفر وعين تدمع..مع الله في هذا العيد
تك كير
(:

Jana said...

سمسم

وانت بخير وصحة وسلامة
يااااااااااااارب
الله المعين يا سمسم...بس ربنا يبارك فى الوقت عشان تقدر متنساش حد

لا تنسانا من صالح دعائك غدا ان شاء الله
وربنا يباركلك فى أهلك وحبايبك
ويجمعكوا ويجمعنا على عرفة باذن الرحمن

دمت طيبا
:) :) :)

مدرس مطحون!! said...

رغم أن هذا البوست قد كتب بصورة ساخرة من المفترض أن تجلب الضحكات،إلا أنها تركت بي حزنًا عميقًا وأسفـًا شديدًا لعملي كمدرس، رغم أن هذه المهنة الشريفة كانت منتهى آمالي، هي أزمة ضمير يا استاذتي المبجلة، ولكن عرفي ابنك أنه لا معنى للصعب، احساس الطفل بأن عقله يعجز عن إدراك وفهم شيء معين يضعف ثقته بنفسه، ويجعله يكره ما عجز عنه وهذا أخطر ما في الموضوع، تعليم بلدنا والأساتذة الزملاءلا يدكون خطورة ما يفعلونه بهذا الجيل، حسبي الله ....والتمسي العذرلبعض الزملاءربما يفعلون ذلك تحت وطأة الحاجة، وإن كان ذا ليس مبرًا لهذا الإثم العظيم..ـ
دمتي بكل خيرر

قمم التميز said...

شركة تنظيف بالدمام

شركة تنظيف خزانات بالدمام

شركة تنظيف منازل بالدمام

شركة تنظيف فلل بالدمام

شركة مكافحة النمل الابيض بالدمام

شركة جلى بلاط بالدمام

شركة تسليك مجارى بالدمام

شركة نظافة بالدمام

شركة مكافحة حشرات بالدمام

شركة رش مبيدات بالدمام

شركة كشف تسربات المياه بالدمام

شركة تنظيف شقق بالدمام

شركة تنظيف موكيت بالدمام

شركة تنظيف مجالس بالدمام

شركة تنظيف بيوت بالدمام

شركة تنظيف سجاد بالدمام

شركة تنظيف كنب بالدمام

شركة تنظيف مسابح بالدمام

قمم التميز said...

شركة تنظيف بالخبر

شركة تنظيف بيوت بالخبر

شركة تنظيف مجالس بالخبر

شركة تنظيف شقق بالخبر

شركة تنظيف خزانات بالخبر

شركة تنظيف منازل بالخبر

شركة تنظيف فلل بالخبر

شركة مكافحة النمل الابيض بالخبر

شركة تسليك مجارى بالخبر

شركة نظافة بالخبر

شركة كشف تسربات المياه بالخبر

شركة تنظيف مسابح بالخبر

شركة عزل اسطح بالخبر

شركة عزل خزانات بالخبر