Saturday, February 23, 2008

موبايل ..وفوطة صفرا


بالصدفة شهدت موقفا كان أمامى من أسابيع

صبيا فى حوالى الرابعة عشر من عمره....يتحدث مع أبيه..وارى كلمة يتحدث كلمة غير مناسبة ..حيث اداب الحديث لم تتوفر فى لغة فتانا مع والده بالمرة
ووجدت نفسى ارجع بذاكرتى للوراء لعدة شهور ماضية ..وتذكرت موقفا آخر ...وياللعجب حيث التشابه فى شىء والاختلاف بل التناقض فى شىء أخر

ما حدث أيها السادة الكرام ان فتانا الاول ..حصل على نتيجته مؤخرا ..وهو طالب فى الشهادة الاعدادية..وحصل على مجموع 88%...وهو ما يراه مجموع يملا العين...وكان سبب خلافه مع والده هدية النجاح

الفتى: يعنى ايه ؟؟؟انت مش وعدتنى ....عموما انا كنت عارف من الاول انك كنت بتشتغلنى

الوالد: يعنى ايه باشتغلك ان شاء الله....احنا مش كان بيننا اتفاق...فاكره ولا نسيته زى ما نسيت تكلم ازاى مع ابوك

الفتى: لا بقى انا منسيتش انت اللى نسيت انى ناجح اهو وجايبلك 88% محدش عرف يجيبها....وانت قلت حتغيرلى الموبايل بعد النتيجة

الوالد: لأ......انا قلتلك لو جبتلى فوق التسعين فى المية...متستهبلش

الفتى: وهى تفرق ايه يعنى 88 عن 90...هى تلاكيك وخلاص

الوالد:..طب ويفرق ايه كمان ان 70 عن ##!!!##........(ملحوظة : لم افهم النوع الثانى المقصود.. عذرا لجهلى الشديد باحدث الموبايلات.).
..انت اللى عملت كده فى نفسك ...خليك بيه بقى لحد الترم التانى ...اما نشوف حضرتك حتجيبلى كام فى الاخر

الفتى خارجا من المكان يصيح باعلى صوته : والله ده ظلم ده....هو انتوا لقيتونى على باب جامع
(قلت فى سرى ...يا ريتهم سابوك على باب الجامع)

وقتها تذكرت...الموقف الذى حدث من شهور فى أحد ليالى الصيف الماضى
كنت مع زوجى واولادى حين وقفنا بالسيارة على البحر لتناول (رز بلبن بالايس كريم) من محل الشيخ وفيق فى بحرى
فأتانا فتى يهرول ...وقام مسرعا بمحاولة مسح السيارة

فناداه زوجى كما يفعل عادة: تعال يا بابا

الفتى : ايوة يا باشا
(زوجى على فكرة ليس باشا ولا يملك نسورا او صقورا على اكتافه)

زوجى : هو انا قلتلك تمسح العربية

الفتى : بنظرة مستنكرة : اسف اباشا

ثم رجع مكانه واستند الى سور الكورنيش فى انتظار قدوم عربة اخرى

بعد حوالى دقيقتين

ناداه زوجى مرة أخرى : تعال يا بابا

اتى الفتى ولكن ماشيا غير مهرولا كالسابق

الفتى : نعم اباشا

زوجى : وانت اسمك ايه بقى؟؟

الفتى : محمد
زوجى : انا عايز امسح العربية يا محمد
الفتى مندهشا : مانا جيت امسحها قلتلى لأه

زوجى : عشان ماستأذنتش يا محمد....مش تعرف الاول عايز امسحها ولا لأ....ولا هى عافية !!!؟؟
الفتى ..ضاحكا : ماشى اباشا ..لا مؤاخذة....
على فكرة انا متعلم يعنى مش اى كلام...حضرتك عايز تعلمنى مبدأ يعنى أمشى عليه بعد كدهون...وانا نحب طول عمرى أسمع وأستفيد

زوجى : اممممم ماشى يا استاذ محمد....وانت رايح سنة كام بقى

الفتى (وهو يقوم بمسح السيارة): انا لسه مخلص اعدادية........بس مجموعى مش قوى يعنى......كنت عايز افرح امى ..بس نعملو ايه بقى...النصيب

زوجى : ليه انت جبت كام ؟

الفتى : 87% ..كان نفسى الضم فى التسعين....

زوجى : بس حتكمل يا محمد شكلك كده ولد جدع...وان شاء الله تبقى دكتور اد الدنيا

الفتى :لا يا باشا ..انا حادخل صنايع خمس سنين واكمل فى هندسة ...واحد جارنا عمل كده ...ودلوقتى فى هندسة...انا بس أخلص الثانوى واخد كورس انجليزى ..ولما اخش الكلية ان شاء الله ادخل قسم باور...بيقولوا شغله نار

زوجى ضاحكا : طب يا باشمهندس محمد..ربنا يوفقك ...اتفضل يا سيدى دى هدية نجاحك...

الفتى مبتسما : لا يا باشا متخلى والله
طب متشكرين يا باشا......وربنا لانا سامع كلامك بعد كدهو..وحأستأذن قبل ما نمسح ...ادعيلنا بقى يفتحها فى وشى

زوجى وأنا : ربنا يفتحها عليك يا محمد


.

38 comments:

الطائر الحزين said...

ونحن معكما
ربنا يفتح عليك يا محمد من حيث لا تدرى ولا تحتسب

كيف حال حضرتك

بارك الله فيكما

تحياتى

الطائر الحزين said...

ومن عبادى من اغنيته لفسد حاله

تحياتى

إيمان الحسيني said...

لا حول ولا قوة إلا بالله
جملة سمعتها قبل كده في مسلسل وبافتكرها لما يتعرض قدامي موقف زي ده :
ناس طايلة ومش عاوزة
وناس عاوزة ومش طايلة


على فكرة البنت إللي في الصورة ماسكة الجرنال بالمقلوب
:D

Jana said...

الطائر الحزين

اه والله يستحق الدعاء يا فندم
أمثال هذا الصبى كثيرين..ممن لم ينقادوا وراء سلوك الشارع ..يملؤهم طموح وعزيمة وارادة جبارة..وتراهم دوما وصلوا الى ما يطمحون ..اللهم الا من تعرض لعوائق خارج سيطرتهم كالفقر وقلة الحيلة وانعدام الواسطة اللى بقت اهم من دماغ البنى أدم فى زمننا

أشكرك بشدة على السؤال

وبارك الله فيك وفى ابناءك وام الابناء ولها سلامى

دمت طيبا

Jana said...

الطائر الحزين

سبحان الله ..ربنا ليه حكمة فى كل شىء وان لم نفهمها
انعدام الحيلة فعلا هو اكبر سبب للطموح
ولكنها طبعا ليست قاعدة..فاحيانا يزيدهم الفقر احباطا ويأسا
والله يهدى من يشاء

دمت طيبا

Jana said...

طعمة

نورتى المدونة فى اول زيارة
حلوة فعلا الجملة ..بتقطر حكمة

الصورة عجبنى فيها الكرسى الصغير...ومخدتش بالى من الجورنال المقلوب الا لما قلتيلى
بس حاسة لو جربناها حنلاقى معانى ابلغ واصدق بالمقلوب .....تفتكرى ممكن!!؟؟
:)

أسعدتنى زيارتك.وتعليقك
بارك الله فيك وفيمن تحبين

دمتى طيبة

AHMED SAMIR said...

ياااااااااااااااااااه
مفارقة اكتر من روعة
مقارنة غاية في الروعة بتصور الفرق ما بين مصر الاولى ومصر التانية
او مصر المزيفة ومصر الحقيقية
تحيااااتي

عصفور المدينة said...

سبحان الله
زميل لنا حصل معه الموقف تماما بس الأستاذ الصغير كان في ثانية ثانوي وكان الشرط أظن 98 وهو جاب 95 وصمم وخد الموبايل اللي هو عايزه وبضغط من الوالدة

موجة said...

واضح إن زوجك انسان عاقل جدا وهادي الطباع وناضج جدا جدا جدا
عجبني تصرفه مع محمد بحكمة

اما موضوع الموبايل ده فبقت آفة في المجتمع عدم احترام الكبير سواء اب او ام او حتى مدرس في مدرسة
ربنا يتولانا

خالص تحياتي
احمد

الفقيرة إلى الله أم البنات said...

سبحان الله
ناس عاوزة تتعلم وناس عاوزة تبلطج
اظن ان وفرة النعم تجعلهم لا يشعروا بقيمتها
معاناتنا مع اولادنا نحن السبب فيها
وهى اننا ندللهم
لدرجة ان الاستاذ عاوز n70
ودى ماركة تقريبا توصل 2000 جنيه
نفسى اعرف بيعملوا ايه بالموبايلات
بنتى عاوزة وانا رافضه وتقولى ولاد عمى ولاد خالتى
ااقول لها عمك وخالتك عملوا حاجه مش صح
مش عاجبها كلامى...بس صحتها أهم عندى
والحاجة التانيه..اظبط دماغها
مش كل اللى نعوزه ناخده حتى لو فى الامكان
ربنا ينجحك يا محمد ويهديك يا بتاع الاشتغالات

بوست رائع

خمسة فضفضة said...

السلام عليكم ورحمة الله وبركاته

النماذج دي موجود منها كتير اوي
ولاد اهلهم مدلعينهم معلش يعني دلع ميرئ لحد ما يطلعوا عديمي التربيه وماعندهمش احساس بالمسؤليه

وولاد تانيين بالرغم من تفوقهم وادبهم ، ظروفهم بتضطرهم انهم يتيهدلوا بالشكل ده عشان يوصلوا للي هما عاوزينه

ربنا يعينه ويرزقه ويوفقه في حياته
آمين

دكتور حر said...

تعرفت على المدونة من استاذي العصفور
قصة جميله
منها حقا الكثير
من وقت شغلي القليل لقيت ان الشباب
بنقسموا الى 2
ناس بتوع شغل
وناس مش بتوع شغل

ربنا يكرمك على المعنى الجميل

ودمتي بكل خير

رفقة عمر said...

بجد الدلع زيادة عن اللزوم مضر جدا عارفه الحوار اللى ذكرتيه بين الاب وابنه نفس الحوار بين ابن اخويا واخى
ابنه دة لسه فى سنه رابعه ابتدائى وعنده موبيل بس مش بكاميرا
ومصر عايز موبيل بكاميرا ولا تتخيل اخى رافض موضوع الضرب ومع ذك ابنه شايفه انه باباه قاسى وبيحرمه لانه مش عايز يجيبله موبيل بكاميرا
سبحان الله مع اننا كنا غير كدة خالص مع بابا رحمه الله عليه
كنا بنخاف مجرد ماما تقول انها هاتقول لبابا لو عملنا غلط
بجد الدلع لا يبنى الرجال
ماسح السيارات دة ما شاء الله عليه ربنا يبارك فيه
ويحميه وينجحه الهم امين يارب العالمين

محمد عبد الرحمن said...

لمحمد وأضرابه أهد مثلا عربيا
عند الصباح يحمد القوم السرى

ولفتى الموبيل ونظرائه أهديهم مقولة إخشوشنوا فإن النعمة لا تدوم
ولحضرتك و زوجك الكريم أهدى خالص تقديرى وإحترامى

Jana said...

a.samir

أهلا بيك
جميل تشبيهك
مصر المزيفة ومصر الحقيقية
عجبنى فعلا

أسعدنى تعليقك
بارك الله فيك

دمت طيبا

Jana said...

عصفور المدينة

دائما النساء سبب المشاكل
ههههههه
ايضا بضغط من الوالدة الولد جاله موبايل جديد

اتمنى يا باشمهندس.بنت حضرتك تكون بخير دلوقتى
وألف سلامة على ايدها
وان شاء الله تتعافى سريعا
واشوف اسم عائشة فى الكومنتس قريبا

منورنى دايما
بارك الله فيك
وأشكرك على وضع تدوينتى كتدوينة مختارة
فهذا يشرفنى دوما

دمت طيبا

Jana said...

موجة

الله يكرمك على الاطراء
الموبايل هنا كان مفروض يكون حافز
ولكنه تحول الى شرط للنجاح اصلا

احترام الكبير يكون من احترامه لابنه اولا أنه يربيه صح

أسعدنى تعليقك
ونورتنى
بارك الله فيك وفى الشباب امثالك

دمت طيبا

Jana said...

أم البنات

حضرتك نورتينى فعلا
جملة حلوة قوى..ان وفرة النعم تجعلهم لا يشعروا بقيمتها
والدى رحمة الله عليه..كان دايما يقول نربى أنفسنا ومنديهاش كل حاجة ..وفى نفس الوقت بدون حرمان

ربنا يكون فى عون حضرتك فى مشكلة الموبايل...حتقدرى تقاومى كتير؟؟
الناس حوالينا للأسف مش بتساعد على كده

ربنا يكرمك ويعزك
أسعدتينى بتعليقك

دمتى طيبة

Jana said...

خمسة فضفضة

وعليكم السلام ورحمة الله وبركاته
ايه النور ده؟؟

لو جيتى تتكلمى مع حد من اللى بيدلعوا عيالهم دلع مرىء كده زى ما بتقولى..تلاقيه يقولك..وانا احرمه ليه..خليه يعيش حياته ..كفاية اللى احنا شفناه واحنا صغيرين
واللى يقولك فأما بنعمة ربك فحدث

النوع التانى بقى ..أنواع ..منهم اللى استسلموا لحياة الشارع ..ومنهم الطموحين زى صاحبنا كده
ربنا يزيد من أمثاله

الله يكرمك
أسعدتينى بتعليقك

دمتى طيبة

L.G. said...

طبعا مفيش فايدة حقول رأيي أعمل ايه
سيبك من كل الكلام المهم بالنسبة لي
أن زوجك دل على خير
يعني هو في نيته من الأول يساعد الولد لكن لرجاحة عقله فضل يفيده بمبدأ أهم ميت مرة من فلوس وخلاص تعب نفسه شوية يشرح ويفهم ويدل على خير
لو الناس بس تفهم كده عنده حق ممكن العافية تخلي ناس تانية مترضاش تدي فلوس وكمان عزة النفس هو كده ربى عند الولد عزة النفس التي يفتقدها والله مديرين مش سايس
ربنا يكثر من أمثاله يارب ويبارك للولد ان شاء الله

Jana said...

دكتور حر

أستاذنا العصفور دايما صاحب افضال علينا
وحضرتك نورتنى

باتخيل أحيانا لو اتبدلت الاماكن..كل واحد فيهم حيعمل ايه وحيبقى ايه يا ترى!!؟؟

لسه حتشوف فى الدنيا اكتر متستعجلش

بارك الله فيك وفيمن تحب

دمت طيبا

Jana said...

رفقة عمر

وحشانى ..فينك من زمان ؟؟
ماهو احنا يا رفقة وقعنا فى شبكة صياد.ازاى حتقنعى الولد ..وكل اللى حواليه معاهم موبايلات بكاميرا...أهاليهم غلطوا فى حقهم وفى حقنا...خللى اخوكى يصمم على موقفه مع قليل من الشرح للولد عشان ميفهمش غلط ويعتبرها قسوة بجد...
وبعدين قسوة ايه..ده كفاية انك عمته
:)

الله يرحم والدك ووالدى وأموات المسلمين

ربنا يكرمك ويعزك

دمتى طيبة

Jana said...

طال الليل

حمدا لله على السلامة يا دكتور
صحيح أحيانا يكون الصمت أبلغ من الكلام..
لكن فى حالتك ...دائما كلامك أبلغ

المثل جميل قوى ..سألت فيه شخصا حكيما..وفوجئت انه كان سهل جدا فهمه
فعلا السرى من الاسراء ليلا
:)

أطريتنى كثيرا بتعليقك
وسعدت به جدا

أكرمك الله وبارك فيك وفيمن تحب

دمت طيبا

Jana said...

l. g.

منورااااااانى
ربنا يكرمك على الكلام الجميل
مش حابطل زن عليكى
لازم ترجعى التعليقات
قريت كمان اللى كاتباه عن التدوينة
وأشكرك عليه بشدة وبعنف حتى تستغيثى
كلامك كله اطراء فعلا ولا اجد ما اقوله

عزة النفس فعلا لو ماتربتش فى البنى ادم من صغره يبقى ربنا يتولاه ويتولانا

كده اتعلمتى تحطى اللينك ازاى ومقلتليش!!؟؟
فى انتظار فتح التعليقات انا وآخرون

ربنا يبارك فيكى وفيمن تحبى

دمتى طيبة يا جميل

ammola said...

النوع الاولانى ده عايز مكافحة هو واهله علشان دى ناس مستفزة
أما محمد..ربنا يحميه ويبارك له وهى دى النوعية اللى بتقوم عليها الدول اللى بجد
بس بتروحى الشيخ وفيق من ورايا وكمان رز بلبن بالايس كريم...يا مفترية
:)

Jana said...

Ammola

وحشتينى وحشتينى وحشتينى
لأ انا مش باغنى ..وردة كانت بتقول وحشتونى
انا رحت بحرى عشان اقف فوق القلعة وادور عليكى وامسك ميكروفون واقول ماحدش شاف امولة تايهة يا ولاد الحلال...مش عشان الرز بلبن خالص خالص
:)
هو كان فيه ايه بقى
لا ايميل نافع ولا ماسنجر نافع
المهم الحمد لله ربنا فك الكرب
عايزة اطمن على اخبارك

المرة الجاية لما اروح للشيخ وفيق تانى حاكلمك..ويمكن نشوف محمد هناك وابقى شجعيه بقى بنفسك

ربنا يباركلك ويسعد ايامك
فرحتينى بطلتك

دمتى طيبة

اسكندراني اوي said...

اه ياااني
الله يرحم الاحترام
ويرحم ابائنا واجدادنا
قصتين على طرفي النقيض
لكن نقول ايه
ربنا يهدي

Jana said...

اسكندرانى اوى

فينك من زمان ده انا قلت جيت اسكندرية
افتكرت تعليقك بالذات حيكون عن الشيخ وفيق والايس كريم..عشان الحرمان يعنى
:)
بكرة تيجى بالسلامة وتاكلوا ام على بقى ..ماحنا فى الشتا ولا ايه!!!؟؟

يارب يكون مودك أحسن دلوقتى..وربنا يكرمك ويوفقك وييسر لك الخير دائما
ان شاء الله

دمت طيبا

مسلم said...

أضحكتني كلمات فتاك الأول هذا؛ و لا عجب من كلماته الخارجه عن أي معيار للأدب؛ إذا كان أباه يجاريه فيها؛ فإذا كان رب البيت بالدف ضاربُ؛ فشيمه أهل البيت الرقصُ

أما فتاك الثاني

فوالله أنها أدمعت عيني؛ مع إن الأولاد بتوع الفوطه الصفره ديه بيخنقوني شخصياً؛ إلا أنها في النهايه حقيقه واحده

أن لدينا أجيال من الشباب تُدمر لأجل مصلحه بعض الكروش التي لا تريد ألا أن تحوز الدنيا بحزافيرها

اللهم أذل كل من أذل عبادك

Jana said...

مسلم

أهلا بيك يا باشمهندس
بداية أؤمن معك على دعائك

سمعت عن اللى حصل النهاردة فى المظاهرة السلمية فى كلية الهندسة؟؟
مايك مع الاخوان ومايك مع اتحاد الطلبة .وقام شخص بقطع الصوت عن الاخر ..وكانت مهزلة كبيرة..
تعجبت صديقتى وهى تحكى لى ما حدث ..كيف سينصرنا الله ..ان لم نستطع ان نتحد حتى فى مظاهرة سلمية..ولو لدقائق!!!!!

هذا ليس له علاقة بالتدوينة .لكن انت جيت على السيرة
معلش بقى

أسعدنى تعليقك
بارك الله فيك

دمت طيبا...

ابن حـجـر الـعـسـقـلانـى said...

فيه ناس كتير زى الولد دة .. و طموحهم يملا الدنيا .. و الله الواحد حس بنفسه قليل جدا جنب الولد دة ... ربنا يكرمه هو و اللى زيه

صيد الخاطر said...

والله موقفين رائعين بل واكثر من رائعين

أذكر موقف حصل امامي العام الماضي

كنت في الحرم وقاعد قبيل الفجر وفي راجل مصري هو واتنين من اولاده
فالولد بيقول لأبوه
بابا ان عاوز لاب توب
فابوه بيقولوه ليه ان شاء الله
انت جبت مموع عدل
قاله يابابا هو 89 في المية مموع وحش

فابوه بص له بخيبة امل شديدة
- ربنا يعافينا -

مش فاكر رده

لكن المهم
هو اهتمام الابن بتحقيق شهوته بغض النظر عما يريده ابوه او ما يستلزمه مستقبله

Jana said...

ابن حجر العسقلانى

اهلا بيك لأول مرة فى مدونتى المتواضعة
وبجد حزينة انى مزرتش مدونتك قبل كده ..مع انى والله دايما على بالى ازورها
انا لسه جاية من هناك
مدونة جميلة فعلا
لكن ينفع كده من اول مرة تاج!!؟؟
انا عندى كتير فى التلاجة ..الحمد لله اصحابهم نسيوا او زهقوا من العتاب
لكن خللى عندك امل ...ان شاء الله اجاوب عليه فى الالفية دى
وجزيل الشكر ان ذكرتنى وسط هؤلاء الافاضل
بخصوص تعليقك بقى
أؤمن طبعا على دعائك
لكن ليه شايف نفسك قليل...سبحان الله لسه قارية انك ستغوص قريبا فى تدريبات خاصة بدراستك وعملك...يعنى كلك طموح وعزيمة...ربنا يوفقك
عايزة على فكرة اقرا تعليقك عند ال جى بخصوص كيفية وضع اللينك..حيث ذكرت لى انك انت اللى علمتهولها...اشكرك مسبقا قبل ان اقرأه

نورتنى
دمت طيبا

Jana said...

صيد الخاطر

البوست ده فعلا وشه حلو ..نورنى من خلاله ناس كتير لاول مرة يزورونى ..واتشرفت فعلا بيهم

المواقف المستفزة اللى من النوع ده...بتخلينى عايزة اقوم اكسر رقابيهم
لكن العيب مش فيهم لوحدهم..العيب فى اهلهم ..اللى معرفوش يعلموهم يعنى ايه مسئولية...وواجبات مفروضة يجب ان تؤدى قبل ان تطلب الحقوق

أسعدنى تعليقك
ونورتنى
وقريبا ان شاء الله نباركلك على التعيين

دمت طيبا

ست البيت said...

الله أكبر شباب اسكندرية اللي يفرح
والحمد لله ان لقيت زميلة اسكندرانية
وتعرف الشيخ وفيق
فتحتي نفسي عل الايس كريم يا جميل
ربنا يفتحها في وشك ووش زوجكوواولادك وفي وشك يا محمد

Jana said...

ست البيت

نورتينى
ربنا يفتحها فى وشنا جميعا
ويعدى مود اكتئابك ده على خير
صدقينى ...كله بيعدى
ولا لازم عزومة ايس كريم يعنى عشان تبقى كويسة !!؟؟؟
:D

اسعدنى تعليقك
وسعيدة بمدونتك

ربنا يبارك فيكى وفيمن تحبى
يا كميل

دمتى طيبة

Zika said...

ربنا يفتح عليك يا محمد وعلي اللي زيك
ويهدي حماده التاني ابو 88 % انا زمان وانا في الاعدادية كنت جايب 94% ومكنتش قادر ابص في وش ابويا ..
بوست رائع
تحياتي

Jana said...

Zica

ويفتحها فى وشك انت كمان يا زيكا ويوفقك
سامعين نتايج طالعة جديد
مبروك .وعايزين شيكولاتة

اهلا بيك فى اول زيارة
منورنى

دمت طيبا