Wednesday, April 2, 2008

انا باحب بابا وماما و..ليلى علوى



جمال الدولى ...هذا الاسم معروف لدى الكثير ..من اهل الاسكندرية ..خاصة من كان معتادا على ان يستقل ترام خط الرمل ...او حتى سيارته فى نفس الاتجاه ...على جدران النوادى .ونفق الجامعة
يعتبر هذا الرجل ..اول المدونين ..حيث انه اول من قام بفكرة التدوين على الحائط ..وابداء رأيه الخاص فى كل ما حوله ...دون خوف او تردد كان يعترض ويشجب ..ثم يعيد كتابة ما محى فجرا ...فيكتبه من جديد صباحا ..
حبه لنادى الاتحاد السكندرى ..اعتقد اول ما ساقه الى الجنون

حتى فى الازمات الاقتصادية والسياسية ..كان له رأى خاص ...كأن يرشح نفسه فى الانتخابات مثلا ..من خلال الحائط ليس الا ...وقد يتخذ الحمار رمزا له ....اتذكر له جمل لاذعة وخادشة للحياء وقتها حين ازمة السكر ...ولم يعرف المسكين وقتها ..ان ما اعتبره الجميع صفاقة منه وقلة حياء ..يعد الان تحضر ..كما يظهر لنا فى اعلانات التليفزيون المتحضرة والمعاصرة من باب ان الحياء الزائد يعد تخلفا وجهلا

له كلمات جريئة عن الصهاينة والعلاقات المشتركة

اسلوبه الساخر ..يدل على عقل كبير ...ولكنك لا تستطيع ان تمنع نفسك من التساؤل عن حقيقة هذا الرجل ...اهو مجنون بالفعل ..ام انه ادعاء ..ام انها العبقرية الزائدة والتى بينها وبين الجنون شعرة

رشح نفسه ..من خلال الحائط ايضا .لرئاسة الجمهورية ..ووعد بان يجعل الاسكندرية دولة عظمى ..ويقول بلاسيبو انها كانت اخر ما دون على جدار ....بلاسيبو على فكرة هو من نبهنى الى ان الدولى يعد اول المدونين

من اشهر جمله ...( انا باحب بابا وماما وليلى علوى ) والمتكررة دائما او انها الجمل الوحيدة التى لم يقوم العاملين بوظيفة محو شعارات الدولى ليلا بمحوها ...وتركوها حيث انها غير مؤذية لاحد ..وقد تساهم فى رفع حالة ليلى علوى المعنوية ..حين تعلم بعشق جمال الدولى لها ...والذى لا يقل شهرة عنها ..حيث ظهر الدولى على شاشات التلفاز ..وفى برامج عديدة للطرائف ..حين تجرد من ملابسه تماما ..فى مباراة نهائى فريق الاتحاد للسلة من فرط التحمس
كانت له شعارات قوية كثيرة أخرى..للاسف لا اتذكرها ..فأرجو من يعرف له شعارا ..ان يذكره
والان ...الا يثير تساؤلكم ..اين هذا المدون النشط حاليا ...؟؟

شوهد الدولى مؤخرا .واعتاد الكثير على رؤيته الان يرتدى زيه الاخضر المحبب اليه ..ولكنه الان يحمل بيده مبخرة بدلا من فرشة الطلاء
ويقوم بعرض حركات بهلوانية امامك ..حين تعطيه حفنة من الجنيهات او اقل من ذلك ...
فبعد خروجه من مستشفى المعمورة ..لم يعد راغبا فى التدوين كالسابق..الا انه بالرغم من جلسات الكهرباء التى قضت على عبقريته ..لم تنجح فى القضاء على حبه لباباه ومامته وليلى علوى

الان كمدون ..الا تتسائل عن مصيرك انت الاخر !!!!!!؟؟؟؟؟ ... ... .... .

26 comments:

بنت الصالحين said...

لا حول ولاقوة الا بالله

هو مشهور اوي كده

انا معرفوش


بس صعب عليا

بيتنا القديم said...

تدوينة لاسعة ومبتكرة

عزائي الوحيد انني لم اعد اعرف

جمال الدولي من وسط سبعين مليون مصري

جميعهم بات يحمل مباخر..!!

بيؤلوا هيوسعوا في عنابر المستشفي

اللي كان بيتكهرب فيها جمال

(:

خلي بالك

لجنة المرأة في الحزب الوطني بتطالب بفتح

قسم حريمي للمدونات اسوة بالرجال..!!

(:

تحياتي

محمد عبد الغفار said...

انا اتسائل عن مصيرى كأنسان التدوين جزء صغير جداً من حياته

وكثيراً ما تسائلت هل "سألسع" يوماً ما ؟؟
ربما

ammola said...

عارفاااااااااه طبعا وكنت باحب اركب ترام الرمل مخصوص علشان اقعد اقرا اللى بيكتبه وطبعا اتفرجت على الماتش المسخرة..الراجل ده طبعا كل الاسكندرانية حافظينه..على فكرة انا لاحظت ان فى القاهرة حد بيعمل نفس الحكاية يبدو ان اللى ما عندهوش كمبيوتر بيدون على الحيطة.بالنسبة لمصيرى التدوينى فطول ما الواحد ماشى فى سكة"مات الملك عاش الملك"يبقى كله تمام بس مين اللى يعمل كده؟
اول مرة اقرا جملة"متر الوطن بكام"كان على مدونته الفسيحة ده غير تعليقه اول باول على المستجدات السياسية.سبحان الله دايما كنت باسال هو راح فين؟ربنا يرحمنا ويرحمه
يا ريت حضرتك تعبرينى وتطمنينى على الماسنجر علشان انتى قلقتينى امبارح وياريت تبعتيلى على الياهو احسن

عالمى ازرق said...

على فكره لسه له حاجات مكتوبه على جدار نادى سبورتنج
وكمان على مبنى قدام كليه تجاره

ربنا يرحمنا جميعا

الطائر الحزين said...

انا شفت فعلا حاجات زى كدة فى شوارع القاهرة لما بنزل تحت الكبارى

افتكرت ان الامر عارض

سبحان الله الظاهر اننا كلنا بقينا الدولى

بس هو اشطر مننا بجد

محمد عبد الرحمن said...

لا حول ولا قوة إلا بالله

التدوين مسؤولية كل مدون

تحياتى أختى الكريمة

Jana said...

عاشقة الفردوس

اهلا بيكى
هو فعلا مشهور اوى عندنا فى اسكندرية ..وقليل جدا من خارج الاسكندرية يعرفوه

بلاش يصعب عليكى ..انا باحس انه مبسوط كده اكتر ..مادام مافيش حاجة شاغلة دماغه
ربنا يرحمنا جميعا

اسعدنى تعليقك
ونورتينى
بارك الله فيكى

دمتى طيبة

عصفور المدينة said...

طبعا يا أستاذة ده من ذكرياتي

Jana said...

بيتنا القديم

جميعهم بات يحمل مباخر !؟
وانا اقول الكحة دى سببها ايه !!! .

وبعد ان نظرت مستشفى المعمورة فى الطلب المقدم . قامت بتوسيعات خاصة ..واضافت ملحق على شاطىء البحر عدل بكهربا فولت ضعيف ..رفقا بالمدونات الاناث يعنى
صحيح في مساواة
لكن ايضا في تميز
حتى فى الكهربا !!!!؟
:(

سلم على الدولى لما تشوفه الجلسة الجاية
:)

ربنا يباركلك ويقدر لك الخير دائما

دمت طيبا

Jana said...

محمد عبد الغفار

مرحبا بك فى مدونتى المتواضعة

قد يكون هذا الجزء الصغير من حياتك وبالاصح هو كذلك من حياتنا جميعا هو ما سينأى بنا عن "اللسعان".اذا اعتبرنا التدوين نوع من التنفيس عما يجيش داخل الصدور ..بشرط طبعا عدم التعرض للفولتات العالية
:D

أسعدنى تعقيبك
ونورتنى

بارك الله فى وقتك

دمت طيبا

Jana said...

Ammola

طبعا انا عارفة انك عارفاه ..من ساعة ما اكتشفت هوايتك فى قراءة لافتات الطريق والجدران

وانا اقول شفت جملة "متر الوطن بكام " دى فين قبل كده
ربنا يباركلك فى ذاكرتك
انا للاسف نسيت معظم شعاراته ..مع انها كانت قوية وفى الجون دايما

بالنسبة لمصيرك التدوينى ..استمرى فى المشى على كورنيش البحر .لحد ميامى كده وارجعى تانى ...بلاش سكة المعمورة عشان سمسم وصى علينا هناك
:)

انا بعتلك على الياهو و 2ماسدج اوف لاين على الماسنجر ..ومش فاضل الا نداء على مايك حملة التطعيم اللى كان داير من يومين

انا مقدرش ازعل حضرتك يا فندم
وقلقك عليا على راسى من فوق
ربنا ما يحرمنى منك

ربنا يكرمك ويعزك

دمتى طيبة..

Jana said...

عالمى أزرق

اهلا بيكى منورانى

لى فترة طويلة لم اسلك طريق الترام
وكنت فاكرة انه لم يتبق من تراثه شىء
فيكفى ان بخوره يتطاير فى الهوا
ميبقاش كلامه كمان

اسعدنى تعقيبك
ومرورك

ربنا يباركلك ويوفقك

دمتى طيبة

Jana said...

الطائر الحزين

يا خوفى التدوين فى حياتنا هو اللى يصبح امر عارض

هو مش اشطر من حد اوى يعنى
فيه كثير اجرأ منه
لكنه اشطر فى حركاته البهلاوانية المستجدة عليه
بلا شك

وبعدين هو كان بيشجع الاتحاد
حضرتك بقى بتشجع ايه؟؟؟
:)

ربنا يكرمك ويبارك فى وقتك وجهدك
سلامى لام الابناء

دمت طيبا

Jana said...

طال الليل

التدوين مسئولية كل مدون
والراجل تحمل مسئوليته كاملة ..حتى الانفاق على نفسه بعد اللى جراله ..بالمبخرة والشقلبة

فلنتمسك بفرش الطلاء
ان قررنا تحمل المسئولية الى النهاية

متزعلش على فكرة
هو يبدو احسن حالا من زمان

بارك الله فيك وفيمن تحب
:)

دمت طيبا
..

Jana said...

عصفور المدينة

فعلا يا باشمهندش ..سنوات عديدة فى الاسكندرية .مليئة بذكريات ..الدولى لازم يكون منها

مدونات الانفاق وتحت الكبارى أفسح احيانا من مدونات بلوجر
:)

جزاك الله خيرا
وبارك لنا فيك

وكل اضراب وحضرتك طيب
ولا بلاش لانضرب
:D

دمت طيبا

خمسة فضفضة said...

السلام عليكم ورحمة الله وبركاته


هو مش حضرتك بتقولي آخر حاجه كانت ترشيحه لنفسه في انتخابات الرياسه الاخيره
بس كده خلاص خلصت ما تسأليش عن مصيره لانه بقي معروف ، بصي لحال اللي اتخبطوا في مخهم ورشحوا نفسهم وانت تعرفي

Jana said...

خمسة فضفضة

وعليكم السلام ورحمة الله وبركاته
الراجل كان مصيره الفولت العالى يا ولداه
مع انه كان بيحب ليلى علوى ..لكن ده مشفعلوش عندهم

دكتور ..اخبارك ايه مع الكهربا؟؟

نورتينى يا دكتور
ويارب دايما

ادعيلى معاكى فى صلاة الفجر
وش بيغمز
:)

ربنا يتقبل منك ويبارك فيكى

دمتى طيبة

رفقة عمر said...

تخيلى حكايته اثرت فيا قوى انا طبعا اول مرة اتعرف عليه من البوست دة
ربنا يعفو عنه اللهم امين

Jana said...

رفقة عمر

اخبارك ايه ؟
ربنا يعفو عننا جميعا

تصورى انه كان خريج اداب قسم فلسفة
دلوقتى خريج مستشفى المعمورة
وفلسفته تحولت الى حركات بدلا من كلمات

نورتينى
رنا يكرمك ويبارك فيكى

دمتى طيبة

أم أحمد said...

الله يطمنك
هي زيارة واحدة للمعتقل .. اللي هاتتفتح مخصوص علشانا يامدونين وهايبقي مصيرنا جلسات الكهربة عشان ننسي

Jana said...

أم أحمد

اهلا بيكى يا ام احمد..
ربنا يحفظهولك

....جلسات الكهربا معمولة عشان ننسى
ننسى ايه ؟؟
مش فاكرة
هو انا ايه اللى جابنى هنا؟
:)

نورتينى
ويارب دايما

ربنا يبارك فيكى وفى احمد

دمتى طيبة

L.G. said...

مشفتش الدولي بس كنت بشوف اسمه على الحيطان واسمه جمال يمكن كان عايز يكون رئيس ؟ يمكن يعني
فاكرة حكاية المطش والغريب ان الكاميرا كانت بتابعه والناس بتحبه مهما عمل
اللهم الطف بنا وثبت عقولنا يارب
تحياتي يا اسكندراني
ايوة انت يا جنى

Jana said...

l.g

ده انا قلت انتى اللى حتجيبيلى التايهة وتفتكريلى شعارات الدولى ..اللى انا ناسياها
وتوقعت منك تكملى مسيرته ...لما قلتى مرة انك ناوية تكتبى على الحيطان
:)

وبعدين ..اسكندرانى ده لقبى الجديد؟؟
حلو والله
انا عندى 3 اسامى دلع
وده حيبقى رابعهم
ومتنسيش طلبى بانك تلاقيلى انديان نيم يناسبنى

متغيبيش كده تانى

ربنا يكرمك ويعزك ويفرحك دايما

دمتى طيبة

مجداوية said...

السلام عليكم


يااااااااااااااااااااااااااه
انت عزيزتى احييت ذكريات كانت مدفونة تحت اكوام من الذكريات الاخرى
سبحان الله

للاسف لا اتذكر عباراته لكن ده قديم اوى من ايام ما كنت فى الجمامعة من خمسة وعشرييييييييييييييييييييييييين سنة
يعنى قبل ما تتولدى انت تقريبا كنت باركب الترام واضحك على كتاباته والشندتيمة الابيحة اللى كان بيكتبها وطبعا كان واضح انه لاسع لكن كان مسلى جدا طيب طالما تعرفى ده اكيد تعرفى الراجل اللى كان بيغنى اغانى هندى ومشغل الكاسيت وداير بالعجلة فى محطة الرمل وعايش دور اميتاب باتشان

تعرفيه؟ظ لو تعرفيه متعرفيش هو راح فين ؟؟

Jana said...

مجداوية

وعليكم السلام ورحمة الله وبركاته
سعيدة فعلا انى فكرتك بذكريات قديمة
ولو ان 25 سنة مش كتير كده
وانا عندى 33 ...يعنى كنت اتولدت بس لسه مش باركب ترام
ههههههههههههه

طبعا شفت الراجل مقلد اميتاب باتشان وعاشق الهندية...بس للاسف معنديش اى اخبار عنه ....لكن حاسألك ..ولو عرفت حاجة مفيدة حابلغك فورا

اليومين دول موضة الراجل اللى يبدو فى غاية الاحترام ..واذا استوقفتيه طالبة منه زغروطة
يرقع بالصوت الحيانى اجدع زغروطة ممكن تطلع من اجدع واحدة متمرسة ...ويعقبها بضحكة مجلجلة تشبه ضحكة جليلة العالمة ....تسمعيها من اعلى وابعد البنايات
ثم يأخذ حقيبته على كتفه مرة اخرى ويستأنف مسيرته بمنتهى الاحترام والوقار

ربنا يعفى ...الناس لسعت

منورانى
ربنا يباركلك

دمتى طيبة