Wednesday, May 7, 2008

أحلام انسان آلى



مود الروبوت او الانسان الآلى ..يعمل
اوتوماتيكيا عندى ...فلا احتاج بالضرورة لتظبيط او تعديل المود الاساسى .فحمدا لله ان النظام الاوتوماتيكى لازال يعمل بكامل قدرته ولم يتعرض للعطب كأنظمة أخرى خربت واندثرت عندى من زمن

فأستيقظ صباحا ويبدأ يوما جديدا
الحمد لله الذى احيانا بعد ان اماتنا واليه النشور
صباح الخير
صلاة الضحى
تحضير فطور
هم يا جمل
اخبار الهوم وورك
قهوة باللبن
متابعة المدونات سريعا
تحضير الغدا
هم يا جمل
شغل المطبخ
هوم وورك من نوع آخر
قهوة باللبن
مدونات مرة اخرى سريعا ايضا
الورد اليومى
تحضير العشا
هم بقا ...ربنا يهديكى ياحبيبى الجمل اتخنق
الفجر
اللهم أجرنى من النار
نوم ساعتين
المدرسة
تصبحوا على خير
اللهم انى قد وضعت جنبى باسمك ......الى اخره

اشياء كثير فى الوسط لا تهم احد وكأن ماسبق كان يهم


بالطبع هناك ايام مختلفة ...فيها خروج وزيارات ومواقف منها الجلل ومنها التافه احيانا وواجبات ثقيلة احيانا اخرى
بعضها قد تخرج منه بحسنات والآخر تذهب فيه هذه الحسنات ..وادعو الله الا يزيد عليها بالسيئات
فيتعدل اوتوماتيكيا المود الى ما انا بصدده من مواقف

ولكن مالا يسيطر عليه هذا المود الالى السخيف هو ...احلام يقظتى فتظل تحمل بعض الجنون و الخروج عن المألوف ويتحول الابيض والاسود الى الوان ...وخاصة اللون البرتقالى ...اروعهم على الاطلاق ...ولو تركتونى لكتبت عنه تدوينة لذاتها

فتتحقق كل احلامى المستحيلة
وأحلق فى سماء وهمية ..من نسج خيالى ..

فأعود بالزمن للوراء .. فى لجنة امتحان فيزياء الثانوية العامة
فأصبح اكثر قوة ..وامنع نفسى هذه المرة من البكاء والانهيار امام مسألة ...بدت مستحيلة وقتها ..أحالت بينى وبين التركيز فى باقى المسائل ..فيصير مجموعى أعلى ويؤهلنى لدخول الصيدلة التى طالما حلمت بها ..ثم اعود ادراجى فى حلمى حين اتذكر بغضى للضفادع ...واجد ورق التنسيق بين يدى مرة اخرى ..فأكتب فنون جميلة قبل تجارة ...

احلم واعود للوراء فاجد والدى مازال على قيد الحياة ...فلا اخرج مع صديقاتى فى ذلك اليوم والذى تأخرت فيه كثيرا
عن الموعد المتفق عليه ...وأثار غضب وحنق والدى علىّ
فأعيد صياغة الاحداث فتصير مثالية للغاية...واصير بنتا مثالية انا بدورى ..فلا اتذكر ابدا ما حييت الا نظرات الرضا منه والفخر بى ..وانسى دون ذلك من نظرات عتاب او استياء

اعود بذاكرتى لرحلة للقاهرة من ايام الكلية ...واستخدم حقى فى الزحلقة على اطول "زحليقة " لم ارها الا فى سندباد القاهرة ...فلا اخاف ولا ارتعد ...بدلا من مشاهدتى لصديقاتى وحدهن ..يستمتعن بالتزحلق ..فلا اشعر بندم يعترينى
حتى الان ..فلا اعرف ان ذهبت للقاهرة مرة اخرى ..ان كان سيسمح لى زوجى بتجربتها ام لا

احلم بأن اعزم أمولة على ايس كريم من بحرى ..حيث تحبه هى ..مقابل ان تؤجل نشر تدوينتها الاخيرة ...والتى أبدعت فيها فى توصيف احلام يقظتها .كما برعت فى اعطائها مسمى اخر "..مساحتها الخاصة" ..فلم اجد تعبيرا عن احلام اليقظة بهذ الشكل وبهذه الروعة من قبل...ودى تانى مرة تضربلى تدوينة ..ومش حينفع الكلام ده

احلم ان اعود لترتيب حفل زفافى ...فأتجنب ما فعلته وقتها ..فأغير المكان ..ومن احيوا الحفل ..وفستان الزفاف ذاته
فلا نزال ندعو الله ونستغفره

أحلم بأن اعود للماضى البعيد ....أن اكون طفلة هادئة ...فلا ارهق امى بالطلبات والزن الممل ...بعدما ادركت تأثيره الان وحقا كما قالت والدتى ...كما تدين ..تدان .

أحلم بأن اعود للوراء ثلاث ايام فقط ...واذكر زوجى بان "نفول " السيارة قبل ان يصل السعر البنزين لهذ الحد وان نقوم بتجديد رخصتها ...
أحلم باعادة تقييم أشخاص ..واعادة صياغة مواقف .
.
أحلم بلحظات قليلة ..ولكنها غالية قبل وفاة والدى رحمة الله عليه
كانت هذه احلاما تخص الماضى ..وهناك الكثير غيرها ...وهناك أكثر يخص الحاضر والمستقبل
بعضها قد تجدونه عجيبا ..او مؤلما او مثيرا للسخرية او مثيرا للضحك
ولكنها لازلت احلامى ..وجميعها.لابد ان ارتشف خلالها القهوة باللبن..حتى تكتمل برتقالية الحلم
الان ابنى ..ذكرنى بمراجعة الفراكشنز مرة اخرى
وها قد عاد مود الروبوت
ولكنه احيانا حين يعود ...اجده مشوبا بلون برتقالى جميل ...يظل يخيم عليه ...حتى حلما آخر
قبل ان اندمج فى مودى الجديد
ما هو حلم يقظتك الحالى .؟؟..او اول ما يتبادر الى ذهنك كى تحلم به؟؟

ملحوظة
لا تنسى تعديل المود قبل الحلم .

40 comments:

break said...

بردوا مصرة انك كان نفسك تدخلى صيدلة؟؟؟

عن تجربة انسى الحلم دا ومتحلميش بيه تانى
مش عشان الضفادع لاااااااااا
عشان اللى افظع من كدة



بالنسبالى
اانا علطول عايشة فى احلام يقظة
انا هستنى اتفرج اشوف الناس هتقول ايه

ammola said...

يا نونا يا جميلة بحبك أوى
كل شوية داخلة طالعة مستنية البوست لما رجلى ورمت
حبيبتى بجد والله كلامك جميل وعلى نفس الموجة مع كلامى وبيكمله ويؤكد فكرة أننا شبه بعض فى حاجات كتير..لدرجة اللون البرتقالى بس أنا بأه من كتر الاسود فى لبس الخروج بقت حياتى كلها ألوانات وحاجات كده مطرقعة علشان بس التوازن البيولوجى
:)
والله يا بنتى نفس الاحساس لما ساعات فى عز المعمعة أروح كده فجأة فاصلة خالص واتجة الى هنااااك حيث مساحتى تعرفى ساعات بأه مش بارجع على برتقالى لأ ساعات مش بارجع أصلا ومش مهم اللى يحصل أيه.وأنا لو أعرف أنك حتعزمينى على آيس كريم كنت لغيت التدوينة مش أجلتها بس مش بحرى يا ماما ..أقل من
باسكن روبنز لا اقبل البتة
طبعا واضح أن الفرح وفستان الفرح كانوا فضيحة..ياللا ربنا يستر على عبيده
لو كانت الامور بسهولتها كما فى الخيال كان الواحد عمل ديليت لحاجات كتيييير وخصوصا مع اهلنا لاننا فعلا تعبناهم أوى بس هما كانوا بيبقوا مبسوطين أنا عارفة
وبعدين يا نونا هى بتفرق أوى بين لما تكون ست البيت صيدلانية واللا تجارة واللا فنون؟؟ضحكتينى والله ..ده على أساس أنك تقدرى تحددى بدقة كام جرام كلوريد صوديوم على كام ميلليجرام همبورجر؟يا شيخة خليها فى سرك بقى وخليكى فى الفراكشنز أحسن
طبعا زوجك مش حيوافق تتزحلقى يا هانم أنا مرة شفت منتقبة بتتزحلق وسمعت تعليقات لو كانت هى سمعتها كانت حرمت تخرج من بيتها أصلا..لكن ممكن يسمحلك تركبى القطر السرييييع أوى ده بس من غير صريخ لو سمحتى
أنا طولت عليكى بس انتى وحشانى جدا ومش لقياكى على المازنجر
أول حلم تبادر الى ذهنى بعد ما قريت تدوينتك أن أنا وانتى نتقابل على زحليقة واحدة فى مساحتى وانتى تجيبى معاكى آيس كريم مانجو وفستق علشان بامووووت فيهم
ربنا معاكى ويحفظ لك مساحتك ودايما تستمتعى بيها بكل الجنان اللى فى نفسك

محمد عبد الغفار said...

لا احلم ابدا الى الوراء ولو ضبط نفسى متلبساً بهذا الأثم فأنى اقوم بالتعديل فوراً

يقظتى دائماً للأمام


ووتحت وطأة الضغوط كثيراً ما اغضب من الروبت واتمنى لو انى متمرد هائم على وجهه غير خاضع لأى منطق او عقل او مسئولية واذا ما ذهبت الضغوط احمد لله انى لم استجب

الطائر الحزين said...

اللون البرتقالى هو لون الاعتراض

يشغل ذهنى دوما حالة الاليه فى العبادات وياترى ايه مصيرها

أما أحلام اليقظة
(كما علقت فى موضوع تدوينة مشابهه)

لو استطعت ان اركب آلة الزمن واعود واغير اشياء كثيرة فيمن حولى وفى نفسى

================
لماذا هناك اشياء عندما يفعلها اناس لا ينظر اليهم الناس بنفس العين التى يفعلها غيرهم
==================

ست البيت said...

بحلم بحاجات كتير
انت مين يا جانا ؟
عرفتي من وين ان ماما جت من العمرة؟؟؟؟؟؟؟؟؟؟؟؟؟؟
بحبك يا نونة

اسكندراني اوي said...

كلنا بشكل او باخر عندنا نفس الاليه في الايام

والروتين في التحركات
ولكن لنا الحق ان نكسر هذا الروتين بواحد اسبرسو بدل القهو باللبن

هههههههههههههههه
تحياتي

بيتنا القديم said...

أحلم باعادة تقييم أشخاص ..واعادة صياغة مواقف

آلام وآمال said...

بحلم أرجع بالزمن بردو لأيام الثانوية العامية
واطحن نفسي أكتر ف المذاكرة
وكنت دخلت كلية الألسن التي طالما حلمت بها
وحال بيني وبينها مكتب التنسيق
لتمر الأيام سريعا
والآن يحول بيني وبينها سور قصير من حديد
ولكني أرى كل مبانيها وأرى الطلاب يتحركون ويجولون بداخلها
حيث أن كلية التجارة وكلية الألسن في مكان واحد في جامعة عين شمس بالقاهرة

ولكن مفيش بإيدي غير اني احمد ربنا على اللي كتبهولي

الحمد لله
-------

مدونتك



مريحة جداا
وروحك طيبة

L.G. said...

ايون أيون أيون
معنديش غير أحلام بلا واقع
أحلم بإيه :))
كما نانا .. سمعنا ايه كما ننا
أنا نفسي أبقى نفسي واد حبيب وبيه ومعايا فلوس كتير ستين تلاف جنيه وأشرب قازوزة مع استاكوزا ايه

مود الروبوت
معنديش مود أصلا
أرجع لورا حعمل نفس الحاجات
كنت دايما بحلم اني بكسب الويمبلدون :))
كل كلامك جميل
مبتحلميش تشوفيني ؟؟؟

الربان said...

تحياتي

كان الله في عون الريبوت...لكن ان شاء الله له ثواب كبير...عند رب العالمين.

جميل ان نتذكر الماضي و نعرف اخطائنا فيه...كما تذكرت حضرتك امتحان الفيزياء...و حفل الزفاف و فستانه
هذا يدل علي ان فكرنا قد نضج...و ارتقي...لان الحياة بالنسبة لنا اختلفت
معطياتها...

ربنا يسعدك و يسعد الجميع...و لو حتي في احلام اليقظة.


تحياتي و تقديري

خمسة فضفضة said...

السلام عليكم ورحمة الله وبركاته

حلمي علي اد ماتقدري يا جني ماهو ده اللي فاضلنا ومش بياخدوا عليه ضرايب ولا بيتحسب بالجنيه

انا زيك علي طول احلم واحلم وارجع للماضي وابقي عاوزه اعدل واغير فيه عشان اوصل للصوره المثاليه اللي مافيهاش ولا غلطه
بس مش باحب اللون البرتقالي

ربنا يحقق للجميع كل احلامهم


سلام يا قمر

مجداوية said...

السلام عليكم

اختى الكريمة أنا لا اجامل أبدا فدعينى أصدقك القول ان هذه التدوينة ولا تتعجبى من رأيى
ها
جاهزة لتعرفيه؟

من أروع ما قرأت منذ دخولى عالم المدونات

رائع ما كتبتيه ورائع طريقتك فى تناوله

صحيح لو عاد الانسان الى الوراء فماذا سيغير وماذا سيبقى مما فعل ؟؟؟

أقترح عليك أن تعملي هذه المدونة تاجا تمرريه لأحبائك لتثرى التدوين ففكرتك رائعة

أحييك بشدة واسمحى لى ان أنصرف الآن بعد أن تقمصنى الروبوت لأقوم ولى عودة دائما الى هنا

تحياتى وخالص تقديرى

Jana said...

Break

ايه ده ..هو كان فى افظع من الضفاديع
صحيح اختى كانت بتقول انها تعاملت مع بعض الصراصير ..لكنها الحمد لله مكانتش بتجيبهم البيت ..مكناش حندخلها اصلا

عموما انتى ومكتب التنسيق اقنعتونى ..انى مدخلش صيدلة

طب كنتى احكيلنا حلم منهم
عموما ..ملحوقة
ربنا يحققلك احلامك الحلوة واللى فيها الخير دايما يا كميل

ربنا يباركلك
دمتى طيبة ..

Jana said...

Ammola

انتى اجمل فعلا ...وخصوصا لو خليتى عزومة باسكن روبنز عليكى
ولعلمك بقى ارخص لما البنزين غلى عشان الفرق حيروح فى الطريق للشيخ وفيق فى بحرى
واديكى عرفتى ازاى لو شفتينى على البحر تعرفينى على طول ..ايون انا اللى لابسة طرحة اورانج هناك دى وبتجاهد نفسها متنطش فى المية
:)
كان عندى امل يا امولة انى اقنع زوجى نروح سندباد القاهرة
وهناك امارس هوايتى فى الزن ..واللى متمرسة فيه من زمان ..واركب الزحليقة ...بس انتى افقدتينى الامل ده مع انى والله مش باعرف اصرخ فى الملاهى ..صوتى بيتكتم من الخضة واكتفى بالعياط المكتوم..ومع ذلك باحبها
!!!!! ولله فى خلقه شئون

عموما كتر خيرك ..حتستضيفينى فى مساحتك على الزحليقة ونتجنن سوا...عايزاها طويلة ومالهاش اخر ..وحاجيبلك المانجو وانسى الفستق ..عشان دى مخسرات وحشة على الصحة العامة والمحفظة
ولا انتى معاكى كارت الفيزا؟؟؟
:D
صحيح !!! احنا فى مساحتك ..يعنى انا ضيفتك ..يبقى المانجو كمان عليكى ..
:))))

حبيبى من عنيا ..انا بايتالك على المازنجر ... بتوحشيييينى

ربنا يبارك فيكى وفيمن تحبى
دمتى طيبة

Jana said...

محمد عبد الغفار

سيدى ولكنى لا أطرق ابواب الشياطين باحلامى عن الماضى ..فلا اقول "لو" التى تفتح عمل الشيطان فاسعى الى ذنب باعتراض منى استغفر الله ابدا انما هى مجرد احلام بتغيير اشياء كان فى مقدورى ان اجعلها تبدو افضل ..فأتعلم حتى لا اقع فى خطأ التسرع فى المستقبل
وان حدث معى ما تطلق عليه اثما ..بأن اتذمر واعترض مثلا ..اعود مثلك وأحمد الله برضا وامتنان عظيم للرحمن على حالى الجميل

التحكم فى النفس اثناء الضغوط ..هى قوة وايمان عالى الدرجة ...أحييك عليهما
وادع لى ان يمن الله علىّ بمثلهما
احتاج بشدة لهذا الكنترول على النفس

أكرمك الله وأعزك
دمت طيبا

Jana said...

الطائر الحزين

طب ليه القلق ده بقى ؟؟
البرتقالى فعلا لون الاعتراض !!!!؟؟
يعنى ده تحليل نفسى ...ولا معلومة اكيدة
لان اللون ده اقرب الالوان الى قلبى ...تبقى مشكلة لو ده اكيد

الروبوت يكون اسوأ ما يكون فى العبادات ..لأنه يفقدها روحها وبالتالى الخشوع فيها والتفكر اثناءها وبعدها
ندعو الله ان نتخلص من تحكم الروتين فى العبادة

الة الزمن ...ابعتهالى بعد ما تخلص رحلتك ..ومتنتظرش ترجعلك تانى
:)
بخصوص سؤالك اخى الكريم
اعتقد فى ناس وضعت فى اطار خاص بغير ارادتها بسبب علو شأن او مكانة علمية او خبرة او استحقاق ثقة او ..او...فتوقع منهم الاخرين ردود افعال معينة طبعا لا يمكن مقارنتها بردود افعال اشخاص عادية
والمقارنة بينهم فيها ظلم لاحدهم
كما قارن مرة مدون زميل بين خيرت الشاطر واسراء عبد الفتاح ..وكيف يجاهد الرجل بالرغم مما يحدث له ..وكيف تقول هى "حرمت " بعد ايام بسيطة من الاعتقال..المقارنة طبعا هنا غير عادلة بالمرة ..وفعلا يجب ان تنظر لكل منهما بعين مختلفة
لو كان سؤالك كما فهمت

بارك الله فيك وفى ام الابناء وفيمن تحب
دمت طيبا .

Eric Matt said...


جيت أسلم بس

تحياتي

.:.-=- ELGaZaLy-=-.:. said...

ما هو حلم يقظتك الحالى .؟؟..او اول ما يتبادر الى ذهنك كى تحلم به؟؟

-----------------------

لا شئ لا شئ على الاطلاق....

تحياتى اليكى

Jana said...

ست البيت

طب كنتى حنى علينا بحلم يتيم من الكتير دول ..ولا بتعملى زى كل الاسكندرانية وترميهم فى البحر وهم طازة عشان يعملوا ..تش

يا ستى تانت لما جات بالسلامة ..سألتنى عليكى وقالتلى هى عملت ايه فى غيابى ؟؟
قلتلها ..لقت البحر زحمة
اخدت طريق ابو قير
وصراخها جاب الشارع
لما كان اخوها معلى الاذكار
رحت انا والجيران
انا فضيت الخناقة
وهم فضوا التلاجة
بامارة ما اكلوا المحشى اللى كانت عاملاه تانت قبل ما تسافر ..وقضوا على المكرونة بالبشاميل
راحت تانت قالتلى مش عارفة مالها اليومين دول ..كانت كويسة وزى الفل قبل ما تدخل على البلوة النت
قلتلها ..يا تانت ...مشكلتها ببساطة ....أنها تهتم
:)
ربنا يكرمك ويسعد قلبك ويحلى ايامك
يا كميييييييييل ..وانا كمان بحبك اوى
دمتى طيبة

Jana said...

اسكندرانى اوى

انا تخيلت انى حالاقى فى تعليقك خماشر تماشر حلم عن اسكندرية لوحدها
انا اعرف ان اللى فى الغربة قايمين اعدين فى احلام اليقظة

القهوة بكل انواعها اسبرسو وتركى ومحوج وكولومبى وبرازيلى واوليه ومن غير ليه كمان ...تكسر اى آلية واى روتين ..وتخلى الدنيا مظبوطة حتى لو كانت سادة او على الريحة

وزى ما خدمتنى وقلتلى على الاخ زريق بتاع الرنجة
حاقولك
على سفيانوبلو بتاع البن ..وخلى بالك من الكولومبى ..بيعمل دماغ ..شكله كولومبى اصلى
:)

ربنا يباركلك ويهون غربتك
دمت طيبا

Jana said...

بيتنا القديم

هل تقصد ان ده حلمك انت الآخر!!!؟؟

عموما انت خليتنى اخد بالى من حاجة..انا لما ركزت تانى فى الحلم ده ..اكتشفت انى لازم احلم قبله باعادة تقييم نفسى اولا ...قبل محاولتى فى اعادة تقييم البعض ..
مش يمكن العيب كان فيا انا !!!؟؟

بالنسبة بقا لاعادة صياغة بعض المواقف
ف ولا اجدع سيناريست واشطر مخرج ومعاهم السبكى "بذات نفسيته" ممكن يصيغها بالشكل اللى احنا عاوزينه
للاسف احنا نحلم بس
نغير لأ
ولازم كلنا نفتكر دايما ان الخيرة فيما اختاره الله لنا..فقدر وشاء وفعل
وما علينا نحن عباده الا الرضا والحمد

طب لما احلامك كده يا سمسم
اخبارك ايه مع الزحليقة
:D
ماهو يا تتزحلق انت
يا تزحلق احلامك
:)

ربنا يبارك لك فى سهيلة
ويفتح لك ابواب الخير فى الدنيا
وابواب الجنة فى الاخرة لتدخل من اوسعها
دمت طيبا متفائلا

Jana said...

آلام وآمال

اممممم صعبة فعلا دى
متهيألى ده حلم بتحلمه كل يوم ...طول ما عينك جايبة مبنى الألسن

وكمان صعبتها علىّ لما قلتلى انك تجارة
دايما محدش فى تجارة عاجبه حاله ...لكن متقلقش لو فى يوم فتحت مكتب محاسبة ...حابعتلك تمسكه ..عشان انا نسيت المحاسبة ومش فاكرة غير ان الميزانية العمومية لازم تكون متساوية الطرفين ...وان المدين ابن عم الدائن . وانا وابن عمى على القيد المحاسبى
هههههههههههه
احذر محاسبة الشركات ..وبص ادامك وشيل عينك من على الالسن اللى جنبك

وربنا حيوفقك عشان راضى وحامد وشاكر وسعيد وصلاح وأدهم
:D
ربنا يوفقك ..وييسر لك الصعب
دمت طيبا بامتياز ان شاء الله

Jana said...

L.g.

حبيبة قلبى
لو جات على القازوزة ..كنا حققنا كل احلامنا ..بس الاستاكوزا خليها فى الحلم ..دى صعب تخرج لأرض الواقع

مودك ..انا شفت لحد دلوقتى اتنين
مودك الحالى
ومود التهييس
وعندى أمل ان فى تالت متفائل انتى بتقاوميه

حبيبة قلبى
انى اشوفك ده اهم احلامى الحالية ..وقريبا حيكون واقع ..قصر الثقافة ..تانى يوم عمورى يخلص امتحانات
خلاص ده ميعاد ان شاء الله حضرتك ..لو وافقك طبعا

فكرتينى بالويمبلدون ...انا برده باحب التنس اوى ...حلمى الجاى الاعبك فى نهائى رولان جاروس ..واغلبك ..مادام حتاخدى الويمبلدون بقى كفاية عليكى
:D

ربنا يكرمك ويسعد ايامك
دمتى طيبة

MiraMar said...

بحلم بيك أنا بحلم بيك
:)))))))))
أحلامي اليقظه كلها مستقبليه
جدا

بجد خلتيني أعيش حاله حلوه اوي
بوست رائع
حسيته
:)
وحشني التدوين بجد
بس تعرفي انتي وحشتيني أكتر
:)

fahd said...

احلمي كويس ان الواحد يحلم

بس بيحلم مش هعلشان يندم او يضايق روحه

يحلم علشان يستمتع

Jana said...

الربان

تعليقك ..مريح للنفس جدا
وأؤمن معك على دعائك ..لك ولنا جميعا باذن الرحمن

الروبوت فى حد ذاته ..لا يكل ولا يمل .فهكذا صمم من البداية
المشكلة ان تمله أنت

بالتأكيد نضجنا كلما كبرنا ...وهذا ما يشعرنا بالندم على كثير مما فات ...والاهم ان نتعلم ...فالندم وحده لا يفيد

أشكرك بشدة على اللينكس المهمة فى مدونتك ..فادنى معظمها كثيرا لو تعلم..وخاصة ما يختص بالديكور..فجزاك الله عنا خيرا وفيرا
لم تتح لى فرصة شكرك هناك ..لأنك ما شاء الله ولا قوة الا بالله تعقب التدوينة بأخرى سريعا
ده مش قر ..ده نق بس
:D

ربنا يكرمك ويبارك فيك وفيمن تحب
دمت طيبا

Jana said...

خمسة فضفضة

وعليكم السلام ورحمة الله وبركاته
جيتى على الجرح يا جميل
انهم ياخدوا ضرايب على احلامنا كمان ..دى تبقى كوابيس اليقظة بقى
:)

الحمد لله انى مش بارجع لوحدى وأغير كتير ..كنت خايفة ده يكون مرض نفسى ولا حاجة ..لكن طمنتينى

ليه مش بتحبى الاورانج؟؟
طب يا ترى احلامك لونها ايه !!!؟؟

ربنا يتقبل دعائك
ويباركلك ويسعد ايامك ويملؤها تفاؤل
يا كميل

دمتى طيبة ..

Jana said...

مجداوية

وعليكم السلام ورحمة الله وبركاته

لا انا مش متعجبة خالص ..انا مذهولة بس
اخاف اقول بالغتى تزعلى منى .لكنك اعطيتينى اكبر من حقى ويمكن شفتينى من منظور حبك ومعزتك ليا "بفتح الميم " هههههههه...فوجدتى ما وجدتى ..لكن الحق أقول ..انى لا ارى نفسى أرقى الى ما تظنين ..فأين انا من مدونين عباقرة مثل كثير ..انت منهم

لكن بصراحة يعنى ..انشكحت ...النفس البشرية بقا
:)
اقتراحك رائع ...وقيد التنفيذ يا فندم ان شاء الله فى غضون ساعات ينزل التاج ويمرر ..ومستنية ردك عليه اول واحدة

غلس مود الروبوت ده اللى قومك من عندى...بس ابقى تعالى كل ما يغفل عنك ..او حطيله مسدس فى الشاى
:D

منورانى دايما وبتسعدنى تعليقاتك جدا
ربنا يكرمك ويعزك يا حبيبة قلبى

دمتى طيبة وبخير

Jana said...

eric matt

عبد الله ..فينك وفين اخبارك؟؟
سلامك وصل وشاكرين السؤال

لكن ليه مقلتلناش على حلم من احلامك
واللى انا عارفة انه زمان كان انك ترجع مصر ودلوقتى مبقاش كده
ماقدرش الومك

منورنى دايما
رينا يباركلك واشوفك اكثر تفاؤلا
دمت طيبا

Jana said...

elgazaly

ياااااه ...عودا حميدا
الغيبة طالت...وافتقدنا كلماتك حقيقى

لكن ليه المود ده !!!؟
مصدقش انا ان معندكش احلام مستقبلية حتى
لكن ممكن تكون مالكش نفس تحلم حاليا
اتمنى يزول المود ده وميطولش معاك ..وشوية تفاؤل عشان تعدى
:)
فى اول فرصة اتخلص فيها من الروبوت ..حاروح اكمل قصتك ان شاء الله ..ده انا مصدقت انك كتبت التالت

ربنا يباركلك ويسعد ايامك

دمت طيبا

Jana said...

miramar

ميراااااااااااااا
وحشتنى تعليقاتك ..ووحشتينى كلك على بعضك كده

يا رب يحققلك كل احلامك المستقبلية
اللى فيها الخير ليكى

وحشك التدوين !!؟؟
مدونتك يا كميل مستنياكى
اعمليلنا بوست عن يومياتك فى امتحانات الماجستير مثلا
:)
ولا بلاش السيرة دى ؟؟
ههههههههههه

يالا انا فى انتظار التدوينة الجديدة
عايزة اقرالك حاجة بجد

ربنا يكرمك ويوفقك .ونسمع خير فى النتيجة ان شاء الله

نورتينى من تانى يا قمر
دمتى طيبة

Jana said...

fahd

اكيد احلامى باستمتع فيها ...والا مكنتش هربت ليها من الروبوت ..اللى بيرجع يتلبسنى تانى ويوقظنى من احلامى

يتعمله ايه ده ؟؟
تفتكر منقوع الدوم ممكن يأثر فيه ..ويخليه يحل عنى شوية
هههههههههه

نورتنى واسعدنى تعليقك
ربنا يكرمك ويعزك

دمت طيبا

المستنصر بالله said...

استاذه جنه
جاوبت التاج جزاك الله خيرا
ارجو ان اكون وفقت فى الاجابات اول مرة اجاوب على تاج

Jana said...

المستنصر بالله

جزانا واياكم
مع انك رديت فى التدوينة السابقة
الا ان اجاباتك الرائعة ..شفعت لك ...وخدت امتياز بمرتبة الشرف برده

ربنا يسعدك ويباركلك انت ورفقة
والله احلى حاجة فرحتنى فى التاج من يوم ما عملته .. اجابتك على السؤال ده بالكيفية دى
تربت يداك اخى الكريم

انا اسمى جنى على فكرة مش جنة
:)
ربنا يوفقك ويباركلك
دمت طيبا

سارة said...

والله مدونة عظيمة جداااا و لكي الشكر

Jana said...

سارة

أهلا بيكى يا سارة فى اول زيارة
نورتينى

جزيل الشكر على ذوقك وتعليقك الجميل

يا ريت تكرريها
ربنا يكرمك ويوفقك فى حياتك

دمتى طيبة

Omar El-Tahan said...

موضوع ممتاز وأسلوب سلس ورائع ويصل للعقل والقلب بسهولة ... ومشاكله تتلخص في تهييج مشاعر تم وأدها من زمن طويل وعشش عليها العنكبوت

فكرت شوية في مدونتك لقيت ان الواقع بيقول ان الزمن لو رجع بينا كنا هانعمل نفس الحاجات لأننا نفس الناس وبنفس تفكيرنا والي احنا فيه دلوقتي من علامنا من أخطائنا السابقة

بس هاسيب الواقع واخش عالطشت .. :) قصدي عالأحلام

منت أتمنى إني اخبط على باب الدنيا بدري قوي عشان اكون زي باقي الناس داري بالواقع ومافيه بدل الصورة الوردية اللي كانت عندي لحد ما ما البرواز طلع من نافوخي :)

يمكن تستغربي .. بس لو ده حصل هايجر وراه حل كل اللي بأعانني منه لأن كل مشاكلي مترتبة على الموضوع ده

خالص المودة والإحترام لفلمك العظيم وتفكيرك المنظم وأسلوبك الساحر

Jana said...

Omar el-tahan

اعتذر عن التأخير فى الرد فعلا
انا شلت الموديريشن على التعليقات ..وكان صعب الحظ التعليقات على تدوينات قديمة...يعنى كنت ادينى كلاكس فوق او اى حاجة
:)
حضرتك نورتنى طبعا
لكن ليه بقى كده
شكلى قلبت المواجع ولا اييييييييه!!!؟؟

لأ انا فعلا استغربت ...ليه تندم على تفاؤلك .. بالعكس ده اللى احنا محتاجينه اوى فى زمننا عشان نعرف نتعايش..ولا حضرتك تقصد الصورة الواقعية ... عشان الصدمة بتكون صعبة حين الاصطدام بجدار الواقع بعد الاحلام الوردية؟؟
حضرتك ..فيه فرق بين الوهم والحلم بالمستحيل ...وبين التفاؤل وترجى الخير دائما

اتمنى ان مشاكلك كلها تتحل ...ومن غير ما تندم على اللى فات ...لعله خير ..يمكن زمان مكنتش تستحمل الصدمات بدرى فى حياتك ...والوقت والزمن ..ادوك صلابة وقوة لاحتمالها مؤخرا

جزيل الشكر على اطرائك
اسعدنى تعليقك ونورتنى
واسفة مرة تانية والله على التأخير

دمت طيبا

قمم التميز said...

شركة تنظيف بالخبر

شركة تنظيف بيوت بالخبر

شركة تنظيف مجالس بالخبر

شركة تنظيف شقق بالخبر

شركة تنظيف خزانات بالخبر

شركة تنظيف منازل بالخبر

شركة تنظيف فلل بالخبر

شركة مكافحة النمل الابيض بالخبر

شركة تسليك مجارى بالخبر

شركة نظافة بالخبر

شركة كشف تسربات المياه بالخبر

شركة تنظيف مسابح بالخبر

شركة عزل اسطح بالخبر

شركة عزل خزانات بالخبر

قمم التميز said...

شركة تنظيف بالدمام

شركة تنظيف خزانات بالدمام

شركة تنظيف منازل بالدمام

شركة تنظيف فلل بالدمام

شركة مكافحة النمل الابيض بالدمام

شركة جلى بلاط بالدمام

شركة تسليك مجارى بالدمام

شركة نظافة بالدمام

شركة مكافحة حشرات بالدمام

شركة رش مبيدات بالدمام

شركة كشف تسربات المياه بالدمام

شركة تنظيف شقق بالدمام

شركة تنظيف موكيت بالدمام

شركة تنظيف مجالس بالدمام

شركة تنظيف بيوت بالدمام

شركة تنظيف سجاد بالدمام

شركة تنظيف كنب بالدمام

شركة تنظيف مسابح بالدمام