Monday, October 13, 2008

قووول عااااااااااااااااا


قول عااااااااااااا
طبعا هى مكانتش كده فى الاول .كانت قول اااااااااااه
لكن مع خبرتنا كدكاترة ..اكتشفنا ان حرف العين حيخللى اللوز تبان اكتر وممكن عينك تجيب ابعد من كده
ايوة اللوز ..ما هو احنا كنا عيانين
لا احنا مش دكاترة ..ده من باب اننا بقينا مجربين ..ونظام اسأل مجرب ولا تسأل طبيب وكده يعنى
احنا كأسرة صغيرة متعاونة متكاتفة ..نحب الاشتراك فى كل الاعمال الصغيرة قبل الكبيرة
حبينا كمان نتشارك وجدانيا فى دور احتقان الحلق اللى اصابنا مجتمعين بداية من العيد
المرض اصابنا بالتوالى والتوازى ايضا والحمد لله رب العالمين
يعنى عدت علينا ايام احنا الخمسة طريحى الفراش
ايوة خمسة .. زوجى وانا والولاد

كل يوم نحاول اكتشاف اذا كان الالتهاب خف ولا لسه ورايحين جايين فى البيت نبص فى زور بعض وزور الولاد ونقول قول عااااااااااااااااا
ما عدا جنى ..لأنها مش عارفة تظبط حرف العين
طبعا كل شوية نلاقيهم ادام المراية فاتحين بؤهم وبيقولوا عاااااااااااا وجنى بتجاهد وتقول ااااااااااااااااه..وبرده مش شايفين حاجة ..لولى قالت لعمر عشان احنا قصيرين لما نطول قدهم حنشوف زورنا ان شاء الله ..رد عليها عمر ..يارب نطول بقى
واصبحت امنية اطفالى الحالية انهم يطولوا عشان يشوفوا زورهم لما يقولوا عااااااااااا..ودى طبعا بعد امنية انهم يخفوا عشان ياكلوا ايس كريم قبل الدنيا ما تشتى ويتمنع دخوله البيت
الحمى ودرجة الحرارة العالية ..كان ليها معانا مواقف عجيبة .. واكتشفت ان تخاريف الحمى دى حاجة مفيدة جدا ..تقدر تعرف بيها ما يدور فى العقل الباطن لكل منا
طبعا الاء مثلا تخاريفها بتدور حوالين الزمزمية بتاعتها والبنت الغلسة فى الفصل اللى اخدت جومتها . والعسل بالليمون ومين الافضل باربى ولا ستروبيرى شورت كيك

عمر طبعا تخاريفه معظمها عن الفراكشنز والماث مع انها من السنة اللى فاتت ولسه السنة دى مرجعوهاش وبرده على رأس تخاريفه كان العسل بالليمون

جنى كانت حالتها صعبة اوى .. امثلة على كلماتها وهى سخنة
جنى مييييييل ماما ...يعنى جنى جميل يا ماما
يا لولى انا سوتة انتى لأ..يعنى يا لولى انا عندى بسكوتة وانتى لأ
بابا روحوا بااااااااى ...يعنى يا بابا يالا نروح باى
عايزة نامى بكنى واوا.. يعنى عايزة انام بس بطنى بتوجعنى ..وبطنها دايما كناية عن اى حاجة بتوجعها
ننا اوفو حمام ... ننا يعنى جنى ..بس حرف الجيه عندها سايلانت والباقى مش محتاج ترجمة
عسل لأ ..عسل يع... طبعا يعنى مش عايزة عسل بليمون
زوجى كان كل كلامه حول ميعاد الادوية ..صحى من برودة الكمادة مرة وسألنى
اديتى عمر المضاد الحيوى
قلتله حديه ل "لولى" ده ميعادها هى اللى جه
طب اديها عسل بليمون
مش حينفع مع الدوا كمان شوية اديهولها
طب ادى الدوا لجنى ولو فلان اتصل قوليله انى تعبان واديله هو العسل بليمون

طب اجيبلك انت عسل بليمون

لا هاتى المضاد الحيوى

طب خد المخفض

اما انا فتخاريفى كانت من نوع تانى
جوزى بيقول انى قلت جملة عجيبة لما صحانى عشان اخد مخفض تانى مع الشرح باستخدام اليد.. ان" النوم ماشى على فتلة رفيعة واذا اتزحلق من عليها صعب يرجع مكانه"
يا سلام ..ده انا باقول حكم وانا عيانة
اللى كان عجيب ..تصميمى ان فى ناس كلمتنى على الموبايل و انهم كانوا اتنين بيكلموا بعض اصلا ..وبيتفقوا على ميعاد وتهريب ومينا وبعض الكلمات السينيمائية الخطيرة
ولأن ضهرى كان واجعنى من شدة الحرارة افتكرتهم ضربونى بأداة ثقيلة على ضهرى عشان اكتشفوا انى سمعتهم وده لطمس الحقيقة ومنعى عن الادلاء بشهادتى ..لكن مين!!
انا حاخد مخفض واروح أشهد عليهم واديهم عسل بليمون
فاكرة زوجى وهو بيقول لا حول ولا قوة الا بالله

طبعا محدش كان بييجى عندنا البيت الايام دى واللى فكر قلناله اننا مش حندخله ..حتى يتم رفع الحجر الصحى
وماما ربنا يحفظهالى لما كانت بتبعتلنا أكل. كنت باخده من اخويا من على الباب تقريبا
واسمع منه تمتمة واشوف فى عنيه نظرة شفقة مش عارفة ليه

المهم تشربوا معانا دور عسل بليمون يا جماعة

شكلكم تعبانين

انا عديتكم ولا ايه!!!؟

طب قولوا كده عااااااااااااااااااااااااا!!؟؟؟؟ ..

37 comments:

romansy said...

طبعا هنشرب عسل بليمون
بس مش هقول
عااااااااااااااا

حتى أجد عنوان said...

هههههههه والله ضحكت من قلبي خصوصا لما تخيلت اولادكم وهما فاتحين فمهم طول اليوم ادام المرايه وبيقولوا عاااااااااا

ربنا يخليكم لبعض يارب
وشفاكم الله وعفاكم يا اختي ويارب يكون في ميزان حسناتكم

محمد عبد الرحمن said...

طهور إن شاء الله

لا حول ولا قوة إلا بالله
ملحوظة
نزلات البرد تكمن خطورتها فى الحمى أولا وهذه تحتاج إلى الكمادات والسوائل والوخافض للحرارة بإنتظام

وثانيا الخطورة بالنسبة للمريض بالبرد هو أنه تعقبه غالبا عدوى بكتيرية شرسةنخشى عواقبها بالنسبة للأطفال خصوصا وعليه فإن العسل ولليمون بخواصهما المحفزة للمناعة والمنشطة لقوى المقاومة البيولوجية يعدان بفضل الله ركنا ركينا فى البرنامج العلاجى لنزلات البرد والأنفلونزا

momken said...

هههههههههههههه

هناك مقوله ماثوره تقول من بلغ اربعين سنه ولم يعرف داء نفسه وعلاجها فهو احمق

يعنى لسه فاضلك شويه
لكن من المقوله نفهم انه مع الوقت كل واحد بيكون طبيب نفسه

البوست حلو اوى ودمه خفيف
خصوصا موضوع النوم الى ماشى على فتله ده
ههههههههههههههه

جوزك ده بطل

اه صحيح
الاقيش عندك حقنه فتامين سى

هههههههههه
تحياتى

الربان said...

تحياتي

الف سلامة لحضرتك و للاسرة الكريمة ، اجر و عافية ان شاء الله.

- اشكرك كل الشكر علي مواساتك الكريمة ...لا اراكم الله مكروها في عزيز لديكم....و جزاك الله خير الجزاء علي الدعاء الطيب...الجميل....

خالص شكري و تقديري

مشروع انسان said...

شفاكم الله وعافاكم

بس حلو اللغات اللى عندكم دى
:)

ربنا يخليهملك

وجديدة معرفة العسل بالليمون نبقى نجربه ان شاء الله

Anonymous said...

أنا حاسس إني دخلت عيادة موش مدونة! كمان حاسس إني أخدت الدور بعد قرايتي لموضوع العسل باللمون ده... عسل مع ليمون؟!! ده الإتنين أقوى من بعض... الله يكون في عونكم! قبل ما أنشر تعليقي ده، موش هنسى أهنئكم على إختياركم الجميل لأسماء أولادكم، وكمان على إسم المدونة الجميل، فما أجمل سورة الرحمن! دعواتي بالشفاء العاجل

واصطنعتك لنفسي said...

:)
شافاكم الله وعافكم يا رب إن شاء الله
معلش هي كده احياناً تيجي شوطة في البيت كله يمرض
اهم حاجة إن العسل بالليمون تقريباً كل الامهات بتعالج ولادها بيه

ربنا يعينك علي رعايتهم وتمريضهم ان شاء الله
-
البوست جميل فعلاً
:))

Gannah said...

ألف سلامة ليكم كلكم
شفاكم الله وعفاكم
جنى دى عسل خالص ربنا يبارك فيها
لكن انت تخاريفك درامية جدااا
واضح انك كنتى بتكتبى قصة وحرارتك عالية
المهم يا رب تكونوا بخير
ياريت تطمنينا عليكم وسلميلى على ننا الامورة
بجد بشكرك على تعليقك على قصتى اللى رفع معنوياتى جدااا
لانه جه من انسانه بحبها وبقدر جدااا أسلوبها الراقى
تحياتى

عصفور المدينة said...

طهور يا أستاذة

الدور ده أنا نفسي أفهمه لأنه مر على نصف من أعرفهم وكنت أنا وزوجتي وبعض من فريق العمل وفريق المشاغبين الصغار من ذلك النصف المصاب

kochia said...

الف سلامة علي الجميع
وان شاء الله تكونوا خفيتم
وكل عااااااا وانتم بالف خير
قصدي كل سنة

علي فكرة الشاي الدافئ بالملح مفيد في الحالات دي كغرغرة
مجرب

Anonymous said...

jana
====

اقترح عمل حفلة عسل بالليمون مع دعوة مفتوحة للجميع بمنزلكم العامر

الحقيقو ان مصر كلها بتكح .. بيقولوا تغيير فصول .. وأنا أرى فصولا أخرى بايخة سببها التلوث وقش الرز .. الهواء رائحته شياط

واحساسى الخاص .. باعتبار انى مهندس سيارات قديم ان البلاد كلها تعيش فى علبة شاكمان كبيرة فأين المفر؟.

لايفوتنى ان اقول ان اولادك العسل اجمل مافيهم براءتهم وصراحتهم فيما يخص العسل بالليمون .. وقولى لهم ياأولاد ده ارحم من اللبان الدكر المغلى وشربه على الريق.. مع انه فعال جدا وجربى

شفاكم الله وعافاكم من كل سقم

جمعاوى said...

عاااااااااااااااااااااااا


النوم ماشى على فتلة رفيعة واذا اتزحلق من عليها صعب يرجع مكانه



حكم فعلا

Jana said...

romansy

هههههههههههه
طب مانت قلتها خلاص

مرحبا بك فى نادى شاربى العسل بالليمون
:)

دمت بخير

Jana said...

حتى أجد عنوان

سعيدة ان أضحكتك من القلب يا فندم
يا رب دايما مبسوط

الحمد لله احنا دلوقتى احسن بكتير والفضل لله وحده
متنساش جرعتك من التطعيم وانت خارج من المدونة
:)

دمت طيبا

Jana said...

طال الليل

جمايلك علينا زادت يا دكتور لكن
بتفسيرك الوافى اللى نقلته لزوجى أنطلقت كلمات الشماتة منه انطلاقا..يرضيك كده!!!؟
:)
اولادى حاسين "بالتلزيق " من كم ما شربوه من العسل
هههههههههه
بصراحة طعم الدواء المر كان مستساغا عنه
ولكن ...سبحان الله "فيه شفاء للناس" ..ماقدرش اقول حاجة

دى فيزيتا جديدة ولا تبع القديمة!!؟

منورنى دايما دكتور محمد
دمت طيبا

Jana said...

momken

طب ماحنا بقينا دكاترة اهو من كتر ما جربنا
وبصراحة يعنى .. لازم اعترف ان العسل بالليمون ده ياما قضى على ادوار شديدة من اولها
لكنه الدلع بعيد عنك
:)

عايز حقنة فيتامين سى ؟
الفيتامين ده عندنا بقى منتشر فى الهواء ..مش محتاج حقن
ورائحة الليمون تملأ المكان لتشمل الحى بكامله
بيتنا بقى لونه اصفر من الخارج
:)

لو مصمم براحتك
هات الحقنة يا عبده وهات فى ايدك ابو ركبة وابو سريع
:)

Jana said...

الربان

الله يسلمك وجزاك الله خيرا

الشكر لله وحده يا رباننا
غفر الله ذنوبنا جميعا وتقبلنا عنده فى زمرة الطائعين
ووفقنا الى حسن خاتمة
ورحم أخيك رحمة واسعة
ولا حرمكم أجره

وجزاك الله أجر الصابرين

دايما منورنى يا ربان
خالص تحيتى ومودتى

دمت طيبا أخى وبكل خير

Jana said...

إمام الجيل

ابقى جربه ولو حبيت تدعيلى..انا فى الخدمة
حبيت تدعى عليا معرفكش

نورتنى بعد غيبة طويلة
:)

ابنتى الصغيرة تتقن الهندية والصينية ..واليابانية لغتها الأم

جزيل الشكر لدعائك الطيب

دمت طيبا

Jana said...

hina wi hinak

مرحبا بك فى مشفانا المتواضع

يا فندم الف سلامة وبعد الشر
وبعدين انا حقنت الجميع بالمصل قبل مغادرة المدونة
:)

أبحرت سريعا فى مدونة سعادتكم
واستمتعت كثيرا
فجزيل الشكر على كليب أحمد منيب
وان شاء الله الزيارة الجاية جرب "الشيخ وفيق" بدلا من عزة ومكرم
على ضمانتى

أسعدنى فعلا تعليقك
واكتشاف مدونتك

نورتنى
ودمت طيبا

Jana said...

واصطنعتك لنفسى

ينفع كده التحنيث ده
اجى ازورك الاقى دعوة لدرس لمصطفى حسنى
اروحله ازاى انا دلوقت!!؟

بارك الله فى هذا الشاب ..دوما كلامه يصدر من القلب لذلك يصل بسهولة ومصداقية للقلب

نورتينى
وجزاكِ الله الخير الوفير على دعائك
اسمك الرمزى ..بدييييع
أحب كثيرا اختيار الاسماء من قرآئننا الكريم

أسعدنى تعليقك
دمتِ بكل خير

Jana said...

gannah

الله يسلمك حبيبة قلبى
هو انا كنت متأثرة بفيلم ابن حميدو تقريبا ..والمينا والمراكب عشان كنت هناك قريب

جنى بتسلم عليكى وبتحييكى باليابانى
:)
متقلقيش احنا فى افضل حال دلوقتى ولله وحده المنة والفضل

أخجلتينى بكلامك
والله لم اعلق الا بما وجدت
لديكِ حس عالى ..أدامه الله عليكِ

جزاك الله كل خير لدعائك
يعلم الله أنى أحبك فيه
منورانى دايما جنة

دمتِ طيبة وبخير

Jana said...

عصفور المدينة

ربنا يبارك فيك يا باشمهندس

الدور ده كنت فاكراه فى اسكندرية بس ..اتاريه جاى عندنا من عندكم بفعل الرياح الغربية الشمالية
:)

الف سلامة للجميع يا فندم ..
المشاغبين الصغار نتعب دوما من مشاغبتهم ..وحين يمرضوا قليلا فتختفى شقاوتهم ..نحّن لإزعاجهم وندعو الله بأن يصحوا ليرهقونا شغباً
:)

دمت طيبا سيدى وبكل خير

جنّي said...

عااااااا

اتم الله عليكم شفاءه وادام عليكم الصحة والعافية دائما يارب ..

اكرمك الله ادخلتي علينا بسمة افتقدتها منذ سفري وترك الأولاد من بعد العيد

بس سؤال من قضلك هم الولاد بيكلمو ايه دا انجليزي يا مرسي

بس تخاريف السخونة عندكم لم ترقى الى تخاريفي ففي واحد مما اصابني من سخونة شعرت انني يقل حجمي بشكل فظيع لدرجة وضعي في علبة كبريت ..

سلامات

Jana said...

kochia

الله يسلمك يا كوكى
الحمد لله رب العالمين شُفينا والحمد لله

اتريقى عليا ماشى
!!
استنى لما نشوف حكاية الشاى بالملح ده كمان
مانا بقيت ممكن اجرب اى حاجة دلوقتى
بس الله يخليكى خليها للدور الجاى
عشان تعبت من الغرغرة
وقلبنا ضفاديع فى البيت
هههههههههههه

شكرا على النصيحة
بتنورينى دايما يا كوشيا
يا كميل وعسل بس من غير ليمون
:))

دمتِ حبيبتى طيبة وبخير

blue-wave said...

لأ لأ
الف الف سلامه عليكم
هيا فعلا ادوار البرد والزور ماشيه اوى اليومين دول
الف سلامه عليكم تانى
وحلوة اوى تخاريفكم دى:))

Jana said...

sherif

هههههههههه
زوجى أول من سيرحب بالحفل داعيا فيه مصر كلها ..وسيعتبره احتفالا وطنيا
حيث العسل بالليمون اصبح مشروبنا القومى
وسيصير نخب الاحتفال
الشفاء من الامراض المستوطنة فى وطننا العربى
وباقتراح حضرتك ..قد نضيف مشروب "لبان الدكر" كمشروب قومى ثان .. نخباً لجلاء صدر الوطن
ههههههههه

بخصوص الولاد " العسل " ..هم "بيلزقوا" دلوقت
:)

منورنى يا باشمهندس
أسعدنى تعليقك
وجزيل الشكر لدعائك الطيب

دمت طيبا سيدى وبخير

Jana said...

جمعاوى روش طحن

ايوة كده شاطر
لكن فين اللوز ...انا مش شايفة حاجة خالص

حضرتك بقى تروح تشرب كل الاقتراحات اللى فوق دى وتيجى تانى
عسل بليمون
شاى بملح
لبان دكر منقوع
وضيف عليهم شوربة دجاجة عزباء شقراء هيفاء
وان شاء الله نلاقى اللوز رجعت مكانها

ادى اخرة قعدة المجمع النظرى
:))

نورتنى بجد
بس مش كنت تقول ان حودة دنجل اجازة يوم الاحد
!!!!!!

دمت طيبا وبخير جمعاوى

Jana said...

جنّى

يا فندم حضرتك ناسى ولا ايه؟
حضرتك شلت اللوز اصلا من20 سنة تقريبا
:)

سعيدة يا فندم ان أدخلت البسمة عليك
جمعك الله بأحبائك دوما ولا حرمكم شملا عزيزا

حضرتك ده هندى مترجم بالصينى ..دى اوضح كلمات بنتى ..وما خفى كان أعظم

علبة كبريت!!!؟؟؟
هههههههههههه
يا فندم درجة حرارتك كده اكيد كانت 41
احنا كنا لسه فى ال40
يعنى الحمد لله كان فاضل درجة وتولع علبة الكبريت
هههههههههههه

جزاك الله الخير الوفير لدعائك الطيب

منورنى دايما
دمت طيبا أستاذ سعيد وبألف خير

وطيبون
:)

Jana said...

blue wave

الله يسلمك يا فندم

عافاك الله من ادوار البرد والزور اللى ماشية واللى قاعدة واللى نايمة
حضرتك واظب على العسل
شاعر متمكن زيك لازم يحافظ على حنجرته
ولا ايه!!!!؟؟
:)

وقاك الله شر التخاريف .. دى مشكلة لوحدها ..

نورتنى وأسعدنى تعليقك

دمت طيبا وبخير

مجداوية said...

السلام عليكم
هو ايه الحكاية
!!!!!!!!!!!!
ألف سلامة عليكى يا غاليتى ,,اروح لأموله أللاقيها عيانة آجى هنا ألاقيكى كنت عيانة وأديكى عدتينى فعلا عندى برد فى زورى واللمون شغال على ودنه
بس التخاريف بتطلع منك فيلسوفة
ههههههههههههه
ايه الكلام الكبير ده

اظاهر لما نصبتى المجرور كانت بوادر الحمى
بقى مش لاقياها !!!
أهه يا ستى أخدتها كوبى بيست

فأنسلخْت مخلوقا جديدا ..بقلباً وليدا

هااااااااا
شوفتيها
بقلبا وكمان حاطة فتحتين التنوين !!!!!!!!!!!!!
آه يا جبايرك

افتحى ايدك

هههههههههههه
والله عشرة على عشرة
النحو والصرف لهم درجة لوحدهم
صفرررررر

أظن بقى متقوليش
خليهم صفرين

سلامتك يا أم جنى ألف سلامة

Jana said...

مجداوية

اااااه صحيييييييح
شوف ازااااى
لأ وكمان تنوين
ههههههههههههههه
اصلى دقيقة اوى ..والحاجات دى متفوتش منى

طب تصورى يا جوجو .انا كنت الاولى دايما على الفصل فى النحو والانجلش ...صحيح كنت الاخيرة فى الفيزيا ..بس مش مهم
اهم حاجة لغتناالعربية ولتذهب الفيزياء الى الجحيم
سماح بقى المرة دى
والمرة الجاية هالة
هههههههههههه
ضحكتينى والله ..والولاد اتلموا عليا من كتر الضحك
الغريبة ان دكتور محمد طال الليل فوتهالى ..شكله مخدش باله الحمد لله

احم خلاص مكانتش نصبة يعنى بدل الجر
ما طول النهار الناس ينصبوا فى كل حتة هى يعنى جات عليا انا .. حاروح اصلحها من سكات بقى
قال يعنى محدش خد باله
ايدى احمرت يا جوجو
بس ضرب الحبيب زى اكل الغريبة
اللى ضحكتى عليا انتى ولعلها خير ومبعتوليش منها حاجة

اديها ليمون وربنا يوفقك
والف سلامة عليكى
بس بجد متستهونيش بالدور ده وخللى بالك على نسمة ..لأنه فعلا صعب اوى ..وبيفكروا يطلبوا من وزير الصحة اصدار قرار بلبس الكمامات فى الشارع حتى يتم القضاء على الفيروس ..

ربنا يخليكى ليا
دمتِ طيبة وبخير

دعوة الفردوس said...

طهور ان شاء الله


أول زيارة
وانطلقت ضحكاتي مدوية في أرجاء الشقة
والدنيا ليل وانا قاعده في الشقه اللي تحت لوحدي
واكيد طلع عليا سمعه اني مجنونه

بس سيبك
انتي بتقولي أمثال لها العجب وانتي تعبانه
ماتكتبلنا تدوينة وانتي تحت أثر السخونة
:)

Jana said...

دعوة الفردوس

الله يكرمك
لكن انتى ايه اللى قعدك تقرى تدوينتى بليل أصلا
حاسببى بقى الفامبايرز اللى ممكن تطلعلك
ومتخافيش من ابو رجل مسلوخة
ده بيطلع يوم الخميس بليل بس ولو سمع ضحكة حد بينادى امنا الغولة
فمتخافيش خالص
:))
حاضر لما أسخن تانى حاكتبلك تدوينة وصاية يا ستى
ههههههههه

نورتينى
دمتِ طيبة

موناليزا said...

الف سلامة عليكى وعلى البيت كله ياقمر

Jana said...

موناليزا

عفوا حبيبتى
لم ألحظ تعليقك قبل اليوم

الله يسلمك ويكرمك
وجزاكِ الله كل الخير

نورتينى موناليزا

دمتِ طيبة وبخير

L.G. said...

سلامتك ياأم جنى

عااااااااااااا