الوقت بيتكلم....عربى الوقت.. الوقت

وقف الرجل يتحدث بشأن زميله الفلانى اللى بيفشر دايما ويقول انه مناسب عيلة كبيرة وهو اصلا اغلب من الغلب واخبار زميلتهم اللى بتحب زميلهم التانى وعايزاه يتقدملها بقى ويخلصها وهو مطنش وعامل نفسه مش واخد باله
حتى زميلته اللى كانت حامل ويا عينى حصلها ابورشن للمرة التالتة واحتمال جوزها يطلقها مسلمتش منه ومن لسانه
ومرة واحدة وهو قاعد يرغى(بلا ...بلا....بلا....بلا)
قام صاحبنا مصوت ومهلل يابنى حرام عليك ده انا اللى مابزهقش زهقت منك ومن رغيك كل ده جاى تختم ورق ما تخلصنا وشوف اللى وراك بلا كلام فارغ وقلة أدب
هو: وانت مالك وانت ايه اللى حشرك بينى وبين صاحبى
صاحبنا: صاحبك ايه ده انت كنت لسه شاتمه امبارح عند بتوع البوفيه وقايلهم متشككهوش ده حرامى وياكل مال النبى
هو:ما تسيبنى فى حالى يا عم انت بقالك كام يوم مستقصدنى
صاحبنا: يا بنى انا شايل همك... الضهر ادن عليك وانت بترغى والعصر ادن عليك وانت بترغى.....ومشفتكش رحت تصلى زى زمايلك
انا اصلا عمرى ما شفتك ركعتها
يا بنى انا خايف عليك من الندم ... مش حتلحق تعوض اللى فات.. مش حتلحق....



وفى حتة تانية خالص.......
هى: لا مش ممكن ابدا اوافق عليه
بقى اصوم اصوم وافطر على بصلة ...بقى اخرتها اتجوز واحد نوبى وشعره اكرت.... واجيب عيال شكلهم ايه ان شاء الله
صاحبنا برضه(اصل عنده طيارة خاصة بتوديه مطرح ما هو عايز):يا بنتى ده تاسع عريس ترفضيه عشان شعره مرة وعشان ودانه مرة وعشان طويل او قصير مرات
واللى ينقط كلهم ولاد ناس ومحترمين
هى:انت بتقول ايه انت كمان؟ بقى انا ابقى بيضا وحلوة وعينيا خضرة وزى القمر واتجوز واحد شكله وحش
ده بدل ما تقولى انتى لازم تتجوزى عريس امور شبه"ميل جيبسون" كده عشان نجيب توينز واحد عينيه خضرا وشعره اصفر وواحد عينيه زرقا وشعره كستنائى
وبعدين ولا مرة جالى دكتور بشرى او حتى دكتور صيدلى كنت ساعتها ممكن اتنازل عن الشقة اللى فيها سلم داخلى وكان ممكن لعلمك اجى على نفسى واواوافق على عربية موديل كام سنة فاتو
اه والله متستغربش انا ساعات بابقى متساهلة بشكل فظيع
صاحبنا: طب مانتى جالك مرة مهندس كمبيوتر محترم( مادام مصممة انه يكون دخل كلية من كليات القمة)
هى:نعم؟؟.... بتقول على مهندس الكمبيوتر ده اللى كان عايش حياته على النت وفاتح بلوجاية ماليها شعر وكلا فارغ شكله كان عاوز يدخل اداب ومجموعه مجابش ....ده طبعا كان معقد ....ثم انا مش ناقصة حد يهندس عليا ويقرفنى...
صاحبنا: طب ماهو جارك اللى تحتك اتقدملك .صحيح هى السى فى بتاعته اللى انتى طلبتيها مكانتش مليانة قوى .....بس اهو عينيه على الاقل زرقا....
هى : يا لهوى انت معرفتش مش جارتنا التانية تقصت عنه ولقينا ان جارة اخت مرات ابن عمه عندها يا عينى ولد ريتارتد وعنده بيقولوا توحد باين... يعنى ممكن الجينات برضه توصلنا ونجيب عيال عينيهم زرقا وعندهم (بله منغولى)...اه اكيد برضه الوراثة حتلعب دورها
صاحبنا: يا بنتى انا شايل همك سنك بيكبر
انا خايف عليكى من الندم......... مش حتلحقى تعوضى اللى فات... مش حتلحقى....


وفى حتة تانية غير الحتت الاولانية خالص......
هو: استنى بس شوية فاضل ربع ساعة واخلص تحميل لاغنية تامر حسنى الجديدة
صاحبنا: يابنى انت امتحانك مش بعد يومين؟؟
هو: ايوة بس انا كده كده مش حانجح فى الفيزيا اصلى مش فاهم فيها حاجة خالص.... اه اه اااااااااااه يا واد يا تامر يا عسل كويس ان طلعوك من السجن
صاحبنا: يا بنى طبيعى الفيزيا مافيش حد فاهمها فى الدنيا بس لازم تعمل اللى عليك
هو: استنى بس باحملك بقى اغنية اليسا مش ممكن فظييييييييييييييعة
صاحبنا يا بنى رد عليا انا تعبان..
هو : يا سلام يا سلااااام اااااااه يا نانسى يا كيداهم
صاحبنا: يابنى انا شايل همك لو سقطت تانى مصيرك الشارع
هو: شاكيرا.... شاكييييرا
صاحبنا:يابنى انا خايف عليك من الندم.... مش حتلحق تعوض اللى فات.... مش حتلحق....


يااااااااااااه فات ساعة بحالها باحاول مع المجانين دول خسارة الوقت اللى راح لازم الحق ناس غيرهم .... لازم فى أمل.... لازم