Wednesday, June 6, 2007

سابو .....أحمر


Note......

القصة دى أنثوية شوية

يعنى الرجال قد يجدوا فيها شىء من فقع المرارة


وقفت " امل" امام الفترينة وعلى وشها ابتسامة عريضة .... وعينيها سارحة فى الخيال

وصاحبتها "نهى" واقفة تبص لفوق...بزهق بالغ

ومرة واحدة صرخت ...يا امااااااااال......حرام عليكى بأه.. كل يوم تأخرينا على الكلية لما فاتت منا بلاوى........ النهاردة سكشن النظم المحاسبية ....... وانتى عارفة انها مادة زبالة.....واحنا مش فاهمين فيها حاجة اصلا

امل : يا بنتى انتى مش شايفة الجمال .......... انا مش قادرة انسى شكل ساندرا بولوك فى الفيلم وهى لابسة سابو احمر زيه...ده تحفة

نها : عرفنا انه زفت...انا زهقت ماتشتريه وتخلصينى

امل : بس ده غالى قوى....ده عايز مصروف شهرين على فلوس المذكرات على سلفة منك ....ويمكن ميكفيش

نها :لا لا انا حاحلهالك ...بس الاول وحياة ابوكى....ياه ...لسه سامعة امبارح ان حرام نحلف بحياة حد استغفر الله العظيم....لا الله الا الله

بالله عليكى يا شيخة نجرى نلحق الترام ...عايزة الحق السكشاااااان

وجروا امل ونهى ولحقوا الترام ...... وطبعا ملحقوش السكشن

........تانى يوم.........

نهى : باقولك ايه من أولها مافيش وقوف على فترينات

امل :لا...... انسى يا ماما ....دانا اموت لو مشفتش السابو كل يوم....ومليت بيه عينيا

بس المهم حلهالى بقى يا فالحة زى ما قلتى امبارح ...وقوليلى اجيب فلوسه منيييين ؟؟؟

نهى : انتى ناسية يا هانم ان عيد ميلاد سعادتك فاضله اسبوع

امل (بترقب) : وبعدين ؟؟

نهى :خلاص بدل ما كل واحد فى الجروب يجيب هدية على مزاجه

انا حَلم منهم الفلوس ونجمع تمن الزفت بتاع حضرتك

واهو ابقى عملت خدمة للغلابة اللى بينزلوا يلفوا عشان يرضوا سعادتك ويطلع عينيهم ومبيعجبش فى الاخر

امل : ميرسى يا حبيبى ربنا يخليكى (مع قبلات واحضان) انا بموووت فيكى

نهى : بااااااااس احنا فى الشارع يا بنتى

امل : بس فى مشكلة صغننة ......البسه على ايييييييييه ؟؟؟

نهى :والله يا امل لو ربنا هداكى ولبستى الحجاب اسلفك العباية السودا بتاعتى والطرحة الحمرا كمان ...بس انتى اتصرفى بقى فى شنطة

امل : لا حترجعى للموضوع ده تانى حازعل منك.....انا قلتلك لما اكون مقتنعة بالحجاب حاتحجب لوحدى

نهى :خلاص ..خلاص انتى حرة انا فعلا مش حاكلمك فى الحكاية دى تانى

امل :يبقى احسن برضه

بس انا مفهمتش لسه البس ايه لحد دلوقتى...؟؟؟

امل :طب بصى هو البتاع الاحمر ده كانت ساندرا بولوك لابساه على ايه

امل : لا مش فاكرة اصله بصراحة كان عاجبنى قوى وفضلت بصاله شوية وللممثل اللى كان معاها شوية ومخدتش بالى من الباقى

نهى: طب بصى هو كده كده مينفعش يتلبس على بنطلونات

ممكن تلبسيه على الجيب السودا والجاكيت بتاعها

امل : ومين قالك انه ينفع يا ست العاقلين ؟؟؟

نهى : لا حول ولا قوة الا بالله ! ! !

امال حتلبسى احمر على ايه يافالحة غير الاسود

ده لون لوحده يودى فى داهية.......يعنى عايزين نقفله شوية كفاية الفرح اللى حتبقى ماشية بيه....بشنطة وسابو حمر......دول حيفتكروكى اهلاوية متعصبة

امل :لا لا بصى بقى

السابوه ده مش عايز جيب اصلا ده لازم يبان كده ويلعلط

ده عايز البنطلون البلتاكور الستريتش اللى طالع موضة...يبقى ابيض مثلا....والبودى بتاعه.....كت ...... ولونه احمر فى ابيض........ هاه ...ايه رأيك ؟؟

نهى : فاضل بقى تصبغى شعرك احمر دم الغزال ههههههههه وبعدين تطلعى على اى فرح.....والناس تهيص (العوالم جم....العوالم جم ) ههههههههه ضحكتينى يا تحفة ....والله افتكرتك بتكلمى جد فى الاول ....بس بصى بجد هو حلو زى ماتفقنا على الجيب السودا والجاكيت
وطبعا اخرة الضحك ده عياط..... حاطلع بمادتين على الاقل بسببك يا هانم وبسبب السابوه وبسبب ساندرا بولوك

اتفضلى بقى قدامى على امل نلحق التسويق


وبعد عيد ميلاد امل والتورتات والحركات.......فاجئت نهى امل بالسابوه ومعاه الشنطة كمان

نهى : ابقى البسيهم بقى وانتى خارجة مع باباكى ومامتك بعد الضهر فى العربية يعنى

مش عايزين الردالة تتلم عليكى ويطخوكى بالاحمرات دى.ههههههههههه

امل : ربنا يخليكى ليا يا نهى يا حبيبتى وميحرمنيش منك ......يا رب تنجحى فى النظم


وبعد غياب اسبوعين .........ومافيش خبر عن امل

موبايلها مقفول

تليفون البيت ما بيردش

افتكرت نهى ....انهم سافروا البلد عند جدها


قاعدة نهى فى المدرج فى انتظار محاضرة النظم....برضه

وفجأة قعدت جنبها واحدة
لم تهتم نهى لها لانها متعرفهاش

وبعد 10 دقائق صمت.......

سمعت نهى صوتها

بتقولها ازيك يا نهى

نهى : مين .... ؟ امل....؟؟؟؟؟

معقولة؟؟؟؟

ايه اللى حصل ؟؟؟؟ انتى كنتى فين؟؟؟....انتى لابسة كده ليه...؟؟؟؟


وعرفت نهى اللى حصل

امل بعد اخدت السابوه والشنطة (عملت اللى كنا فاكرينه هزار)..... اشترت البودى والستريتش البلتاكور ...... لبستهم ونزلت لوحدها تتمشى بعد ما حققت حلمها ولبست السابو الاحمر ......لقت امل نظرات غريبة فى عيون الناس
حاولت تقنع نفسها انها نظرات اعجاب ...لكن الازدراء كان باين فى عينيهم
مشت امل بخطوات واسعة بتحاول تهرب من عينيهم
مجموعة شباب كانوا ماشيين مع بعض سمعوها كلام مكانتش متخيلة انه بيتقالها هى
جرت منهم عدت الشارع بسرعة
سمعت صوت فرملة قوية..من عربية كانت حتصدمها
نزل منها راجل محترم وكبير شوية
وقالها بصوت هادى ورزين
اركبى يا بنتى اوصلك
نطت امل فى العربية بدون تفكير ....كل اللى فى بالها تهرب من مجموعة الشباب فى الشارع
مكانتش قادرة تتكلم ...لكن عينيها كلها امتنان وشكر للراجل
وقبل ان تتنفس الصعداء...... وجدت فى عينيه نظرات مريبة
صرخت امل ....وقف العربية
انزلها الرجل خوفا من الفضائح
جرت امل لحد البيت بدون توقف
دخلت اوضتها
قفلت الباب ............ وها هى تخرج من بيتها لاول مرة مرتدية حجابها
نهى :انا مش مصدقة اللى انا باسمعه.... انا حاسة انى كنت باتفرج على فيلم اكشن
ومش مصدقة انك قدامى دلوقتى لابسة حجاب
امل : صدقينى يا نهى انا دلوقتى........... فى غاية الاقتناع

31 comments:

shayma said...

يا عينى يا عينى
طب والله مكنت اتخيل ابدا انها اخرتها عن الحجاب... لا اسلوبك حلو اوى يا نانا بجد
بس امل طلعت واحده عندها دم ومحترمه فعلا ..عشان من مرة سمعت كلمتين وشافت النظرات اقتنعت بحكمه الحجاب
امال ليه مفيش منها كتير خاصه فى الجيل الى طالع
ربنا يهدى الجميع يارب
بجد بحييكى
سلامى
:))

nana said...
This comment has been removed by the author.
nana said...

شيمااا
انتى احلى ومدونتك فعلا تحفة .....
انا قعدت هناك مدة
سعيدة ان القصة عجبتك
وبخصوص امل....المقصود فعلا انها بنت كويسة ومحترمة بس احلامها عميتها
مش لو كانت سألت نفسها
"what if"
مكانش حاجة من دى حصلت
سلامى ونورتينى

أميرة البلطجية said...

ربنا يهدي
انما انا بقي عاجبني جدا اسلوب الصديقة جميلة يعني..بتضرب وتلاقي..اصل فيه ناس زنانة وتكره الواحد في نفسه..لكن شوفي..لأن البنت دي فعلا همها اصلاح صاحبتها فهى بتحاول توصل معاها لحل وسط..طب مش حتتحجبي دلوقتي اوكيه طب البسيه على جيبه ..وعشان كده البنتاللي اتحجبت دي حتجرى ترمي نفسها في حضن صاحبتها اللي مرفضتهاش وهي عاصية..وساعتها بقي الصديقة المؤمنة حتعرف تاخد بأيدها شوية بشوبة,,الناس كلها فيها خير بس كل واحد ليه محطة على رأي عمرو خالد
جميلة يا نانا
واخبارنا في الاميلات والانكودنج ايه؟

nana said...

اميرة
بافرح لما بالاقى حد فهم اللى ورا الكلام
صاحبتها اكتفت بالدعاء ليها
لأنها عارفة انها مش حتيجى بالزن....صحاب بجد بقى
بخصوص الايميل يا قمر......
فالموضوع كبيير.....كبير
المشكلة.... مطلعتش فى الانكودنج... طلعت فى الاتاشمينت.....غير قابل للفك عندى بالمرة.....واضحكك بقى طلع الهيروغليفى اللى مكنتش عارفة اقراه هو ايميلى انا اصلا....مكنتش واخدة بالى من الريبلاى
المهم فى القريب العاجل حنحاول نجيب خبير و نفك الاتاشمينت وربنا يسهل.... بس بعد كده ابعتيلى عادى على الايميل التانى مش الاولانى و من غير اتاااااش.....معنديش مشكلة فى استقباله
ميرسى ...يا قمر

سمسم said...

فكرة الشيماء وبيجاد بن عم سعد!!

بتاع فيلم الشيماء

فكرة لما هي غنت في آخر الفيلم

انك لا تهدي الاحبة والله يهدي من

يشاء

وكان في صدي صوت وكده

بجد دي اللي صحبتني وانا بقرأ موضوع

الصابوه

المهم هي اشترتوا ولا لأ ؟!!!

يا ستي والله قرأت كل الموضوع..بس انا

يهمني اعرف اشترتوا ولا نروح كلنا

نجبهولها هدية عودتها الي الله من غير زن

تحياتي

ويجعلوبالهدايةدايماًعااااااااااااااامر

MiraMar said...

اسلوبك رتمه هادي ولذيذ ويصل الى القلب مباشره
هادف
تحياتي

nana said...

استاذ سمسم
ارجو ان تكون مرارتك بخير

حلو قوى التشبيه ومش مصدقة انى وصلتك للاحساس ده وفكرتك بالموقف الرائع بتاع احمد مظهر والاغنية فى الخلفية.....لأن اصلا ده من اروع الافلام الدينية اللى اتعملت عندنا
انا كده اتغريت ...وكلامك ادانى فكرة حلوة قوى
ان كل بوست يبقى مصاحب بموسيقى تصويرية تتماشى معاه وتناسبه

لو مصمم تجيبلها هدية.....اعزمها على كبشونو.....من عند عبد الفتاح القصرى ...الى فاتح كوفى شوب جنبك
ويجعلو بكومنتس سعادتك عامر

nana said...

ميرااااااااا
يا بنتى قلقتينى عليكى
بقى بعد كل ده يطلع الامتحان اتأجل
عموما خير....كل تأخيرة وفيها خيرة

انتى الذ ....ومبسوطة انها وصلت لقلبك
خلصى امتحانات بقى...عشان تكتبيلنا حاجة من حاجاتك الحلوة
ربنا معاكى....يالا حنرجع ندعى من اول وجديد
سلام يا جميل

Islamist Bloke said...

انا مش مقتنع

حاسس ان العملية جت غصب وانها هتخلع الحجاب قريبا

لازم الموضوع يكون باقتناع....مش بارهاب الشارع والشباب

ولو الشخصية نفسها مش بتيجي غير بالرهبة....الاسلام فيه كتير بيراعي النقطة دي.......التذكير بالنار والجحيم فيه رهبة برضة......بس العملية عايزة شوية ايمان وتصديق حقيقي بان فيه جنة ونار فعلا


مدونتك جميلة اوى اوى

و يجعله عامر

nana said...

اسلاميست
اهلا بيك....ونورت المدونة

ليه متقولش انها لما قعدت اسبوعين حابسة نفسها فى اوضتها
فكرت صح ..واقتنعت
اقتنعت ان ربنا اهم اننا نرضيه
وان الناس اللى عشانهم عصت ربنا مكانوش يستاهلوا انها تدخل النار بسببهم

وان ربنا هداها برحمته وثبت الايمان بقلبها
شكرا لمرورك
وسعيدة ان المدونة عجبتك
نورتنى
تحياتى

u3m said...

يعنى ايه بلتاكور ؟؟
بجد والله مش هزار

الطائر الحزين said...

رابع مرة اكتب التعليق لانه مش راضى يحفظ
اولا هى بلوك ايه اللى طالعها الساندرا(ه)
اما بالنسبة للمرارة هى مش ناقصة ربنا يسامحكوا
ممكن كلمة بسيطة لا نلقى لها بالا تؤثر فى الشخص تحت ظروف معينة اكثر من الوف المحاضرات والدروس وربنا سبجانة وتعالى له حكمة فى هذا انه الذى يهدى ودى مش شطارتنا ولا يعلم جنود ربك الا هو
ربنا يهدينا جميعا

nana said...

بلاسيبووووو
يعنى انا قاعدة مستنية كومنتك من الصبح....وفى الاخر يطلع كلمتين
يالا انا عارفة انك مش بخيل
البلتاكور يا سيدى...
هو بنطلون رجليه واسعة شوية وقصيرة شويتين
طلع موضة من سنة تقريبا...يمكن اكتر ...اصلا انا مش متابعة..قوى
وفيه منه حريمى ورجالى(بس شبابى شوية)..واول مرة شفته...افتكرت اللى لابسه سالفه من اخوه الصغير

وبعد كده افتكرت ان بنطلونات فؤاد المهندس طلعت موضة احياءا لذكراه

وبعد كده اشتريته لولادى...اشمعنى انا يعنى..؟؟ ماهم عملوا منه كل المقاسات
واى سؤال انا فى الخدمة

بس لاحظ انى لسه معرفتش رأيك فى القصة ...ومتخافش انا عارفة ان فيها اخطاء....ورأيك يهمنى

منورنى كده دايما
سلاااااام

nana said...

الطائر الحزين
اهلا بيك ونورت المدونة
انا وصلتلى كل الكومنتس بتاعة حضرتك
وانا اخترت منهم دى عشان انشرها
بصراحة مش فاهمة اول جملة ايه المقصود بيها...ويعنى ايه بلوك ..ويعنى ايه ساندرا

وعندك حق الهداية من عند ربنا لا دخل للبشر فيها
انك لا تهدى الاحبة والله يهدى من يشاء
مدونة حضرتك جميلة فعلا
نورتنى
تحياتى

ibn nasser - ابن ناصر said...

هههههه حلوه بس ساعات ببقي اخرتها انحراف
تحياتي

Islamist Bloke said...

هنزور المدونة كتير ان شاء الله....بس فين الانتاج

فى انتظار الجديد

والسلام

nana said...

ابن ناصر
اهلا بيك فى مدونتى المتواضعة
الانحراف دائما يكون له اسباب وظروف خاصة وعوامل نفسية
لا ارى منها بوادر عند صاحبة القصة فهى على العكس انسانة حساسة جدا
اهتدت الى الله عند اول موقف صعب تعرضت له
ولكن لا يعلم الغيب الا الله
نورتنى
تحياتى

nana said...

اهلا بيك فى اى وقت ....وتنور المدونة
لكن موضوع الانتاج الغزير ده صعب شوية
لأن هناك كثير من المسئوليات
وربنا يسهل
منورنى دايما
تحياتى

break said...

قصة حلوة اوى اوى بجد
هموت واشوف الصابو الاحمر دا كان شكله ازاى

ربنا يهدينا جميعا
ويثبت صاحبتك
تحياتى :)

nana said...

بريك
ده انتى اللى جميلة والله
انا رحت مدونتك
انتى وصاحباتك لذاذ فعلا
وفكرتكم حلوة قوى

ميرسى ليكى على مرورك
ويا رب دايما
نورتينى
سلام

سعد said...

قصة جميلة ياريت البنات كلها تقراها

تحياتى

nana said...

سعد
انت مادام من ناحية الشيخ الناعم (امامى المفضل)
يبقى اهلا وسهلا بيك الف مرة فى مدونتى المتواضعة
زرت المدونة الخاصة بيك وبالشيخ الناعم
وربنا يجزيكم عنا خير ويؤجركم الثواب

وربنا يهدى كل البنات والاولاد
امين
سعدت لمرورك الكريم
تحياتى

ابوزياد الفاتح said...

تصدقى فعلا
مرارتى انفجرت
بس على فكره
ده حال معظم بنات المسلمين
اله يهيدهم
مش عارف ينى الواحده
لما تتبرج
الا تخاف ان ينزل بها ملك الموت وهى فى تلك الحاله
الا تغار على اخونها المسلمين
وهى بذلك تفسدهم
وبتاخد سيئات بالكوم طبعا
الا تغار على دينها
الا تخشى الله من فوقها
ربنا يهدى جميع بنات المسلمين يارب ويحفظهم
ويحفظنا نحن الشباب منكم
انتم بلوى الصراحه
ربنا يهدكم بقى
احنا تعبنا
ارحمونا
عايززن نتجوز
ومش عارفين يبا بشر
هنلاقيها منكم
ولا من الناس التانيه
مش عايز اقول اسمهم
علشان محدش يتهمنى بالفتنه الطائفيه
خفوا شويه
بالله عليكم
ارحمونا

nana said...

ابو زياد الفاتح
اهلا بيك اولا فى المدونة
ثانيا انت كنت بتتكلم بضمير الغائب وبعد كده قلبت لضمير المخاطب
خللى بالك من النقطة دى انت مينفعش توجه كلامك لكل البنات
لأن البنات الملتزمة كتير
والغير ملتزمات هم اللى بيبانوا عشان كده بتفتكر عددهم كبير
لكن الدنيا لسه بخير
وان شاء الله تتجوز وتوفق فى بنت ملتزمة
سعيدة بزيارتك للمدونة
ودعواتك معانا بالهداية لكل البنات والولاد
تحياتى

اسكندراني اوي said...

انك لا تهدي من احببت ولكن الله يهدي من يشاء

هي القصه فيها عبر كتييير

جميله ومحبوكه
تحياتي

nana said...

اسكندرانى قوى
مش حاقولك شكرا تانى
اخجلتم تواضعنا
اسكندرية على فكرة مبقتش زى زمان
بوستك اسكندرية زمان يبين انك فعلا مش عايش هنا
مش حابة احبطك واضيع الصورة الحلوة اللى فى بالك
لكن للاسف هى دى الحقيقة
لكن مش مهم..... احلى ان الواحد يعيش فى خياله
بلا هم
منورنى دايما وايوووه اسكندرانى
تحياتى

koka said...

ما شاء الله عليكى .. وصلتى لمعنى حلو اوى بكلمات مشوقة اوى :)

تسلم ايدك

L.G. said...

ياااه فين ايام النظم المحاسبية والتسويق المهم نهى وأمل عملوا ايه في السنة اللي كلها فتارين ديه ؟
فكرتيني بحواراتي مع صديقاتي طبعا انا اللي كنت ببص على الفتارين ههههه بس مش السابو محلات الأكل ههههههه
ضحكت كتير وانا برضه اتحجبت من غير مشكلة السابو كنت بخاف تخبطني عربية اموت من غير الحجاب
التدوينة اقل ما يقال عنها جميلة اوي جدا خالص بجد وفرحت لو كانت قصة حقيقية انها اشترت السابو حتى لو ملبستهوش :))))) دمت بخير بعد 4 سنين مازالت التدوينة شابة :)

قمم التميز said...

شركة تنظيف بالدمام

شركة تنظيف خزانات بالدمام

شركة تنظيف منازل بالدمام

شركة تنظيف فلل بالدمام

شركة مكافحة النمل الابيض بالدمام

شركة جلى بلاط بالدمام

شركة تسليك مجارى بالدمام

شركة نظافة بالدمام

شركة مكافحة حشرات بالدمام

شركة رش مبيدات بالدمام

شركة كشف تسربات المياه بالدمام

شركة تنظيف شقق بالدمام

شركة تنظيف موكيت بالدمام

شركة تنظيف مجالس بالدمام

شركة تنظيف بيوت بالدمام

شركة تنظيف سجاد بالدمام

شركة تنظيف كنب بالدمام

شركة تنظيف مسابح بالدمام

قمم التميز said...

شركة تنظيف بالخبر

شركة تنظيف بيوت بالخبر

شركة تنظيف مجالس بالخبر

شركة تنظيف شقق بالخبر

شركة تنظيف خزانات بالخبر

شركة تنظيف منازل بالخبر

شركة تنظيف فلل بالخبر

شركة مكافحة النمل الابيض بالخبر

شركة تسليك مجارى بالخبر

شركة نظافة بالخبر

شركة كشف تسربات المياه بالخبر

شركة تنظيف مسابح بالخبر

شركة عزل اسطح بالخبر

شركة عزل خزانات بالخبر