Saturday, June 2, 2007

الوقت بيتكلم....عربى الوقت.. الوقت

وقف الرجل يتحدث بشأن زميله الفلانى اللى بيفشر دايما ويقول انه مناسب عيلة كبيرة وهو اصلا اغلب من الغلب واخبار زميلتهم اللى بتحب زميلهم التانى وعايزاه يتقدملها بقى ويخلصها وهو مطنش وعامل نفسه مش واخد باله
حتى زميلته اللى كانت حامل ويا عينى حصلها ابورشن للمرة التالتة واحتمال جوزها يطلقها مسلمتش منه ومن لسانه
ومرة واحدة وهو قاعد يرغى(بلا ...بلا....بلا....بلا)
قام صاحبنا مصوت ومهلل يابنى حرام عليك ده انا اللى مابزهقش زهقت منك ومن رغيك كل ده جاى تختم ورق ما تخلصنا وشوف اللى وراك بلا كلام فارغ وقلة أدب
هو: وانت مالك وانت ايه اللى حشرك بينى وبين صاحبى
صاحبنا: صاحبك ايه ده انت كنت لسه شاتمه امبارح عند بتوع البوفيه وقايلهم متشككهوش ده حرامى وياكل مال النبى
هو:ما تسيبنى فى حالى يا عم انت بقالك كام يوم مستقصدنى
صاحبنا: يا بنى انا شايل همك... الضهر ادن عليك وانت بترغى والعصر ادن عليك وانت بترغى.....ومشفتكش رحت تصلى زى زمايلك
انا اصلا عمرى ما شفتك ركعتها
يا بنى انا خايف عليك من الندم ... مش حتلحق تعوض اللى فات.. مش حتلحق....



وفى حتة تانية خالص.......
هى: لا مش ممكن ابدا اوافق عليه
بقى اصوم اصوم وافطر على بصلة ...بقى اخرتها اتجوز واحد نوبى وشعره اكرت.... واجيب عيال شكلهم ايه ان شاء الله
صاحبنا برضه(اصل عنده طيارة خاصة بتوديه مطرح ما هو عايز):يا بنتى ده تاسع عريس ترفضيه عشان شعره مرة وعشان ودانه مرة وعشان طويل او قصير مرات
واللى ينقط كلهم ولاد ناس ومحترمين
هى:انت بتقول ايه انت كمان؟ بقى انا ابقى بيضا وحلوة وعينيا خضرة وزى القمر واتجوز واحد شكله وحش
ده بدل ما تقولى انتى لازم تتجوزى عريس امور شبه"ميل جيبسون" كده عشان نجيب توينز واحد عينيه خضرا وشعره اصفر وواحد عينيه زرقا وشعره كستنائى
وبعدين ولا مرة جالى دكتور بشرى او حتى دكتور صيدلى كنت ساعتها ممكن اتنازل عن الشقة اللى فيها سلم داخلى وكان ممكن لعلمك اجى على نفسى واواوافق على عربية موديل كام سنة فاتو
اه والله متستغربش انا ساعات بابقى متساهلة بشكل فظيع
صاحبنا: طب مانتى جالك مرة مهندس كمبيوتر محترم( مادام مصممة انه يكون دخل كلية من كليات القمة)
هى:نعم؟؟.... بتقول على مهندس الكمبيوتر ده اللى كان عايش حياته على النت وفاتح بلوجاية ماليها شعر وكلا فارغ شكله كان عاوز يدخل اداب ومجموعه مجابش ....ده طبعا كان معقد ....ثم انا مش ناقصة حد يهندس عليا ويقرفنى...
صاحبنا: طب ماهو جارك اللى تحتك اتقدملك .صحيح هى السى فى بتاعته اللى انتى طلبتيها مكانتش مليانة قوى .....بس اهو عينيه على الاقل زرقا....
هى : يا لهوى انت معرفتش مش جارتنا التانية تقصت عنه ولقينا ان جارة اخت مرات ابن عمه عندها يا عينى ولد ريتارتد وعنده بيقولوا توحد باين... يعنى ممكن الجينات برضه توصلنا ونجيب عيال عينيهم زرقا وعندهم (بله منغولى)...اه اكيد برضه الوراثة حتلعب دورها
صاحبنا: يا بنتى انا شايل همك سنك بيكبر
انا خايف عليكى من الندم......... مش حتلحقى تعوضى اللى فات... مش حتلحقى....


وفى حتة تانية غير الحتت الاولانية خالص......
هو: استنى بس شوية فاضل ربع ساعة واخلص تحميل لاغنية تامر حسنى الجديدة
صاحبنا: يابنى انت امتحانك مش بعد يومين؟؟
هو: ايوة بس انا كده كده مش حانجح فى الفيزيا اصلى مش فاهم فيها حاجة خالص.... اه اه اااااااااااه يا واد يا تامر يا عسل كويس ان طلعوك من السجن
صاحبنا: يا بنى طبيعى الفيزيا مافيش حد فاهمها فى الدنيا بس لازم تعمل اللى عليك
هو: استنى بس باحملك بقى اغنية اليسا مش ممكن فظييييييييييييييعة
صاحبنا يا بنى رد عليا انا تعبان..
هو : يا سلام يا سلااااام اااااااه يا نانسى يا كيداهم
صاحبنا: يابنى انا شايل همك لو سقطت تانى مصيرك الشارع
هو: شاكيرا.... شاكييييرا
صاحبنا:يابنى انا خايف عليك من الندم.... مش حتلحق تعوض اللى فات.... مش حتلحق....


يااااااااااااه فات ساعة بحالها باحاول مع المجانين دول خسارة الوقت اللى راح لازم الحق ناس غيرهم .... لازم فى أمل.... لازم

12 comments:

أميرة البلطجية said...

مبروك يا نانا يا حبيبي ع البلوج
فكرة البوست جميلة..ربنا يعينك وتذكرينا
بحبك في الله
بجد

Jana said...

ميرسى يا مرمر يا جميلة على اول كومنت لاول بوست
أسعدتينى والله ونورتينى
احبك الله الذى احببتينى فيه
....بجد

MiraMar said...

ياااااااااااااااااااااااه
اخيرا حصل المراد من رب العباد
مبروك يا جميله
:)زغروطه حلوه وايوووووه اسكندراني
بوست قوي وفكرني اني عندي امتحان يوم التلات وانا اللي افتكرت قال ايه هدخل وانسى
:)
مبروك يانانا

Jana said...

ايوووووووووووه
ده انا كنت ناسية ان انا اسكندرانية والزغروطة بتاعتك فكرتنى
بعدين انا كاتبة البوست ده مخصوص سعادتك
فى ناس وراهم امتحانات زى حضرتك كده... وفى ناس وراهم جواز!!!!!وشكلك كده كنتى بتسمعى تامر او شاكيرا عشان كده اتخضيتى وقمتى تذاكرى........صح ولا لا؟؟
الله يبارك فيكى وعقبال ما اباركلك لما تخلصى امتحانات

MiraMar said...

أنا والعياذ بالله من أنا خلصت امتحانات الطب من زمان
الحمد لله
بس بدرس اشياء اخرى
اهم
ادعيلي
صحيح مين الي عندهم جواز دووووووووول
:)

Jana said...

ميرا يا جميل
انا قلتلك قبل كده انى فضولية موت.....فمينفعش خالص تقوليلى انك بتدرسى حاجات تانية ومتقوليليش ايه هى
الا صحيح هى ايه؟؟.... هاه.... ايه؟؟؟ هاه؟؟
اما يا ستى بخصوص موضوع الجواز.... فده شوية توقعات على استنتاجات على تنبؤات على شوية فزلكة منى....لشخص ما
ولوطلعت صح حتلاقينى قلت هييييه والله انا كنت عارفة من الاول
ولو مطلعتش حتلاقينى رجعت مارشدير وانسحبت بهدووووووووء ولا كأنى قلت حاجة (شغل عيال يعنى) بس فى كل الاحوال بأدعى للشخص ده باللى فى الخير ليه لأنه جميل ويستاهل
وانتى كمان والله تستاهلى كل خير ويا رب يوفقك فى امتحاناتك (اللى هى أهم من طب)!!!! وباركيلى انا بقى عشان ابنى نجح فى جونيور وان عقبالك هههههه
سلام يا قمر

u3m said...

ايه ده كله ايه ده كله !!!
انا كنت فاكر ان الناس اللى عندهم اطفال فى سن الدايبرز والرضاعة والحاجات الخطيرة دى معندهومش وقت للكتابة .. بس اتضح انى -كالعادة- غلطان .. عموما بداية جيدة واسلوب ممتع بالرغم من انى لما باشوف اسم تامر حسنى فى اى حاجة مكتوبة باتنرفز ويركبنى ميت عفريت وبمكملش قراءة الموضوع .. لكنى المرة دى كملت ولقيت 3 امثلة لموضوع جيد وفكرة جميلة وتذكرة تثابى عليها ان شاء الله.

بس نصيحة صغيرة من واحد مخه متركب شمال .. بلاش الوعظ المباشر .. حاولى تخلى النصيحة متداريه واتركى القارىء يستتنج انتى عاوزة تقولى ايه .. ده طبعا رأيى الشخصى اللى ممكن ميعجبش ناس كتير .. فيه ناس متحبش تدور على الفكرة وبتبقى عاوزه الموضوع متقشر وجاهز على الاكل علطول .. بس ارجع واقول لولا اختلاف الاذواق لبارت السلع وزغرطى ياللى منتيش غرمانة
بس كده

مبروك المدونة وبانتظار انتاج غزير

Jana said...

بلاسييييييبووووو
شرفت ونورت المدونة
وبمناسبة الدايبرز....انوج بتسلم عليك...وبتقولك ابقى هات معاك شيكولاتة ليا ...ولماما...ده هى اللى قالت
وبخصوص تامر حسنى فمتزعلش احنا نولع فيه وفى العفاريت كمان ولا انت تتأزم سعادتك
والنصيحة بتاعتك حاحاول اعمل بيها ولو أن ده عايز مهارة عالية بس حاحاول
وبخصوص الانتاج الغزير...فمتحلمش كتير
انت لسه قايل ان اللى عندهم اطفال زيى معندهمش وقت للكتابة
اه...صحيح بخصوص الاخطاء الاملائية او بمعنى اصح زلات الكيبورد فكتر خيرى قوى
انا كنت باكتب بايديا الاتنين بس كان فى (قدم) معايا على الكيبورد انوج هانم كانت بتحاول تقول رأيها هههههههه
فى انتظار ارشاداتك ونصايحك الغالية وشيكولاتاتك
سلام

Anima said...

الفكرة حلو و كمان الحوار حلو

بتفكريني بمجموعة من الأشخاص قابلتهم

Anonymous said...

حلو اوى البوست
تحياتى ليكى ومبروك على البلوج
سلام

Jana said...

Anima
سعدت جدا لمرورك
شكرا لذوقك
وفعلا الناس دى ممكن تقابليهم فى الحياة .....كتيييير
سعيدة ان الفكرة عجبتك ....وحابقى اجى ازورك......لا مش فى المغرب....فى المدونة بتاعتك
نورتينى

Jana said...

شيما
الله يبارك فيكى
سعيدة ان البوست عجبك
طليت على بلوجك لقيته يجنن
وحيبقالى هناك اعدة طويلة
ميرسى كتير يا جميل
وابقى نورينى دايما
تحياتى