Wednesday, June 13, 2007

علقى على الشاى على ما اعلق انا على البوست


جلس هانى امام الكمبيوتر راميا بجسده على مقعده الجديد

فرحا بنعومة المقعد ....وقد غاص فيه ...ثم ارجع رأسه للوراء ثم
اخذ يدور بالمقعد حول نفسه صائحا وييييييييييييييييييي

وفى الوقت نفسه دخلت زوجته سها

بتعمل ايه يا راجل...!!!!!! ؟؟؟؟؟؟

:فاعتدل هانى فى جلسته قائلا

احم ...ابدا...كنت باجرب الكرسى الجديد ....باشوفه يعنى متين ولا لأ

سها : طب يا حبيبى شفته خلاص

تعالى بقى اعد معايا بره فى الليفنج نتفرج على هيلز كيتشن ونشوف مين اللى يطلع النهارده

هانى :طب يا روحى اعمليلى كوباية شاى معتبرة من ايديكى الحلوة

وافتحى التليفزيون والمروحة وانا حاشوف بس البوست الجديد بتاع عادل وجاى على طول

سها وهى تغادر الحجرة: طيب ....اوكي

وبصوت خافت مادام فيها عادل يبقى مش حنخلص النهاردة


وبعد 3 دقائق جاءت الزوجة مرة تانية :خلاص يا حبيبى عملتلك نسكافيه وجبتلك معاه ابل باى عملاها النهاردة ....انما تحفة جبتها من راتشيل راى .....المضروبة عليها عمايل

ولا التشيز اللى بتحطها على كل حاجة حتى الحلو.......يخربيتها ...تخبل

تصور صحيح ! ! ! كانت جايبة معاها مين ....؟؟

مش حتصدق

اوبرا

بصراحة كانت حلقة تحفة ....وادوا لكل الناس اللى قاعدة ابل باى وتشيز كيك تصور

يخربيتهم اعدوا يصرخوا ويهيصوا كأنها بتوزع عليهم موبايلات

ولا موبايلات ايه....كأنها بتوزع عربيات

بس على فكرة دى حصلت فعلا

شفتها والله من سنة كده

كل الناس اخدت عربيات وكانت ملفوفة هدية ....تتخيل دى بقى

كل عربية كان عليها شريطة حمرا كانت

........

قاطعها هانى قائلا : خلاااااااص يا حبيبتى عرفت

ماشى جاى وراكى .......... انا بس باتكلم مع عادل فى موضوع مهم

سها :ليه انت بتعمل معاه شات....ولا بتبعت كومنت ولا اييه..؟؟

هانى : لا ده البوست بتاعه عن عمرو اديب

وانا بعتله كومنت لقيته قاعد ....ورد عليا

حابعتله بس افهمه حاجة فى الكومنت مكانش فاهمها

روحى ...روحى...جاى على طول


ذهبت سها قائلة لنفسها :انت حر خلى عادل ينفعك


بعد ساعة

جاءت سها وهى تبكى :شفت يا هانى....شفت الشيف رامزى ابن المفترية عمل ايه

هانى فى سره(يخربيت ام بى سى فور اللى حتجن الولية) :ماله يا ماما عمل ايه ؟؟

سها :تصور يطلع البنت الحلوة ..اسمها ايه دى ...؟؟ من البرنامج اللى شايلة المطبخ كله على دماغها

مع ان المفروض اللى كان يطلع الواد الاتم ده اللى قاعد يوقعهم فى بعض

هانى : يا ستى معلش...هو البرنامج اصلا فكرته بايخة...وتعتمد على الحظ

سها :لا لا مش المفروض يتسكتله ده ....مش عارفة ياخويا ايه السلبية اللى هم فيها دى

ده لسه النهاردة دكتور فيل كان مقطوع نفسه فى الموضوع ده ...وكان بيقول اننا لازم ...قصدى هم يعنى...لازم يبطلوا سلبية ويكونوا ايجابيين فيما يختص بالبتاع ده .....

هانى محملقا فى سقف الغرفة :بتاع ايه..؟؟

سها :يييييييه مش فاكرة

المهم انا قطعتلك بطيخ تعالى كله قبل ما يسخن

هانى :يا ستى انا نفسى فى شاااااااى

سها :ييييييييه نسيت....خلاص خلاص كل البطيخ الاول وحاعملك شاى بالنعناع يجنن

بس يالا عايزة الحق الحلقة ....دى كوميدية وتموت من الضحك

هانى : طيب روحى وحاحصلك

حاقول لعادل رأيى بس فى عمرو دياب وجاى على طول

سها : عمرو دياب بتاع العولمة........ماله ...؟؟؟

انا سمعت انه حيعمل 3 حفلات ورا بعض فى 3 ولايات مختلفة فى امريكا

يا سلام لو اعرف اخد التأشيرة

وبعدين يموتلك مثلا عم ولا خال كان فى امريكا او ليبيا مثلا وانت مكنتش تعرف عنه حاجة

ونورث بقى...... ونسافر سوا نشوف حفلة عمرو دياب ....

يا سلااااااام ......لو تتحقق الامانى دى

هانى : ايه اللى قلبك افلام عربى

ما كنتى افلام امريكانى دلوقتى

سها : انت حتى الحلم متعرفش تحلمه

هانى :وانتى عايزانى يوم ما احلم ....احلم بامريكا ...
ده انا اموت احسن

سها :ايه ده ايه ده..؟؟

انت اتعصبت كده ليه طب خلاص اهدى

وانا رايحة اعمللك الليمون اللى كنت عايزه من الصبح


وبعد 5 دقائق

سها :تعالى بقى معايا اشرب الينسون ....وانت تروق خالص

وحظك حلو ....برنامح زى انسايدر اشتغل......والنهاردة حيجيبوا حتت من جنازة "انا نيكول" الله يرحمها بقى


هانى وقد قارب على البكاء :ممكن اشرب شاى قبل ما اموت ..! ! ؟؟

سها :اخس عليا انا فعلا شريرة خلاص تعالى معايا المطبخ نعمل الشاى مع بعض احسن

هانى :طب علقى عليه ....وانا حاشوف بس موضوع عمرو حلمى ده وجاى وراكى

سها :عمرو حلمى ديزاين ! ! ؟؟

ده انا حاموت واعمل مطبخ عنده

ده تصميماته تجنن ....حاجات كلها امريكان ستايل

تعرف ...انا سمعت انه متجوز امريكانية

وسمعت كمان انه عامل شغل هناك ...فى امريكا يعنى...تقريبا مع حماه

واهو رايح جاى المسكين مابين هنا ونيو جيرسى

اكل العيش بقى

انت عارف يا هانى

هانى :ابوس رجل ابوكى ..... روحى اعملى الشاى

يالااااااااااااااااااااااااااا


وبعد نص ساعة

سها : معلش يا حبيبى اتأخرت عليك

اصل انسايد اديشن كانوا جايبين مين تصور ...؟؟؟ انجلينا جولى وبراد بيت

انا مش عارفة ازاى يسيب جينيفر انيستون...... ويتجوز انجلينا ....طب دى جينيفر برقبتها

عارفها انت طبعا

اللى هى كانت عاملة دور ريتشيل فى حلقات فريندز

والله احلى واحدة فيهم

البت مونيكا دى بقى اللى مكانتش نازلة لى من زور

حاروح بقى الحق الخبر بتاع (بوش ) بالتفصيل بيقولوا ساعته اتسرقت يا عينى

وغادرت سها الغرفة


انتفض هانى واقفا فجأة ....... وامسك بسماعة التليفون

هانى : بص يا عادل ....حاقولك كلمتين مينفعش يتقالوا فى كومنت

الا عمرو خالد يا عادل......كل اللى فاتوا ممكن احاول اوافقك عليهم ...
......................لكن الا عمرو خالد

عايز تعرف امريكا دخلتلنا منين

اسأل سها

سها من بعيد : تعالى بسرعة يا هانى شوف ايدى ميرفى هبب ايه

............................بسرعة الا القرفة بردت

14 comments:

MiraMar said...

يانهار يانهار
انتي بجد هايله
الاول ضحكت
وبعدين فكرت
وفكرت وفكرت

وتعبت واحسست برغبه في البكاء
على حال سها وحال كل العقول المحتله
و خلي السلاح صاحي
:)
تحياااااااااااتي من هنا لبكره الصبح
وكل جمعه وانتي طيبه

Jana said...

ميرا السكرة
وانا كمان
فكرت
وفكرت
وفكرت

ولقيت مافيش فايدة

متزعليش نفسك ...ومتوجعيش دماغك
تحياااااتى انا بقى من هنا للجمعة الجاية
ومستنيين دعابة الجمعة ان شالله نعد للتلات
وكل جمعة وانتى دايما سكرة

u3m said...

بس برضه معرفناش ايدى ميرفى هبب ايه ؟
:o)

لا بجد دلوقتى .. تعليقى على التدوينة دى هيكون بشكل غير مباشر .. وزى ماكانت التدوينة طويلة اوى .. تعليقى كمان هيكون طويل نسبيا ..هيكون على شكل فيلم قصير من نوعية الافلام المستقلة .. من اخراج عمرو سلامة ومدته تقريبا ربع ساعة .. علشان كده لما تضغطى على اللينك بتاعة الفيلم انصحك توطى الصوت خالص وتسيبيه يلود براحته لحد ما يكمل للآخر ..وروحى اعملى اى حاجة تانى .وبعد ما يخلص تحميل تشوفيه على بعضه .. طبعا هو هياخد وقت فى التحميل حسب سرعتك فى الاتصال بالنت

ولما تشوفيه ابقى قوليلى ايه اللى وصلك من تعليقى .. ماشى ؟؟

اللينك اهوه
اضغطى هنا

Jana said...

بلاسيبو
اممممم
بص
انا شفت الفيلم مرتين
ووصلت لحاجتين
الاولانية....انا عارفة من الاول انك مش حتسيب موضوع عمرو خالد يعدى كده
وتلميحاتك وصلتنى ...اول ما شفت كلمة اعلان ..وازاى تقنع الناس ..وازاى تلعب فى دماغهم والكلام ده فهمت انت تقصد ايه عشان عارفة رأيك من الاول فيه
ومش حنفتح السيرة دى هنا عشان مش عايزين دم فى البلوج

بخصوص تلميحك التانى
انى اكيد باتفرج على ام بى سى فور
عشان اعرف اكتب عنها
زى ما صاحبنا فى الفيلم كان بيجرب المنتج كده
فده فعلا صحيح وانا فعلا باتفرج على اى ار...وجرايز اناتومى وحلقات تانية كمان ...ارتحت..؟؟

وبعدين مش لازم ادرس الموضوع الاول ده حتى طباخ السم بيدوقه
عشان انقلكم معلومات صح
فيما عدا ما يختص ب عمرو حلمى كان تأليفة من عندى عشان يتماشى مع سياق الاحداث بس

البوست الجاية بقى عن
البانجو
فاكيد حادرسه بمزاااااج يا ستامونى

الفيلم جميل قوى على فكرة
وحلوة فكرة التعليق فى شكل فيلم
ومتحرمناش من نورك يا باشا فى البلوج

بيتنا القديم said...

نانا
....
وبما ان ابوجهل لم يمت في حادث موتوسيكل

وعمرو دياب لم يحي حفل زواج عنتر بعبلة

كما ان رامي لكح لم يسطو علي قوافل قريش..اذن نحكم ببراءة سها مرات هاني
من تهمة غسيل النافوخ ونحكم بتفاهة هاني ذاته واهتمامه بما لا يهتم به
ونجاح عمروخالد فيما فشل فيه زويمر وجولد تسهير وجلادستون!!
تحياتي
ويجعلوبالقرفةعااااااااااامر

Jana said...

سمسم .. فعلا ابوجهل لم يمت فى حادث موتوسيكل بل كانت سيارة بى ام دبليو ملاكى قريش اربع ارقام مميزين

اما عنتر وعبلة فهما لم يتزوجا فى شرم الشيخ كما كان مخططا بل كان فرحا اسلاميا وطبعا احيته فرقة افراح اسلامية وليس عمرو دياب كما تدعى

وبخصوص رامى لكح فقد تخلى عن جنسيته المصرية واحتفظ بجنسيته الفرنسية وعمل رجيم وبقى زى الفل وباع ديونه فى مصر الى حرامى آخر اسمه تاج الدين صاحب الاندلس والحجاز والذى فر هو الآخر الى لندن بعد ان ضحك على الحكومة وخد منها تعويض 30 مليون جنيه فى ارض مساكن البتروكيماويات
وبالتالى موضوع السطو على قوافل قريش غير صحيح خاصة بعد ان كفت قريش منذ زمن عن ارسال بضائعها وسفنها عن طريق قناة السويس واتخذت طريق رأس الرجاء الصالح علشان مفيهوش اشارات كتير وسالك

و بخصوص موضوع الحكم ببراءة سها
من تهمة غسيل المخ فقد تم تأجيل الحكم لحين ورود تقرير الطب الجنائى لمعرفة هل تم الغسيل ببرسيل او بإريال ، حيث ان مسحوق اريال يحتوى على نجمة داوود الشهيرة على غلافه والموضوع كده هيكبر اوى وياخد سكة تانية

واخيرا بغض النظر عن موقف اى منا من عمرو خالد سواء بالسلب او بالايجاب فقد نجح فعلا فى جذب الانظار اليه بشكل عجز عنه الآخرون وهذا نجاح يحسب له حتى لو كان شريرا كما يفضل البعض ان يصفه .. حتى لو كان يستخدم اساليب البرمجة اللغوية العصبيةاو خلافه . يتلافى الصدام مع الامريكان او اليهود او حتى السلطة الحاكمة .. كل هذا لا ينفى انه اثر بشكل كبير فى فئة ضخمة من البشر ولا داعى لمقارنته بمستشرقين او آخرين .. فكل منهم له اجندته الخاصة ..

ماتشرب شاااااى ؟؟

أميرة البلطجية said...

لا حقولك..انا مفهمتش الفكرة "السياسية" من البوست...والسطرين الاخرانيين لخبطوني صراحة..عمرو خالد..امريكا؟
لكن انا صراحة فهمت حاجة تانية...سهى وجوزاها دول متفقين على انهم يبقوا في الطراوة..راجل عايش حياة افتراضية بحته وزرجته حياة تليفزيونية..الاتنين مدمنين (وحظهم ان مفيش واحد فيهم فاضى للتاني كانت بقت حكاية)...لكن حياتهم دي مش طبيعية..لأني اتخيل ان الزوج بيتنقل من البلوج دي لدي لدي لبلوجه هو شخصيا والكومنتس والنيو بوستس..والست دي برضه من برنامج لبرنامج..وطالما كل واحد مش فايق للتاني يبقي نتعب ليه ونقوم ليه؟
صباح الفل يا كميل

Jana said...

مرمر يا جميل
هى سها مش بس فى الطراوة ..لأ دى عايشة فى مية البطيخ وبتقزقز لب كمان
انما هانى مكانش المقصود يطلع رايق وفاضى ومن بلوج للتانية ...يمكن بان كده... بس ده مكانش مقصود
هوالمفروض انه راجع من يوم شغل شاق وعايز يشرب شاى ويكلم صاحبه فى موضوع عمرو خالد
بس
انما الفكرة السياسية...! ! ! ؟؟؟
سياسة ايه يا فندم ؟
يعنى ايه سياسة اصلا ..؟؟
انا معرفش غير سياسة مرات عم عباس البواب....فى تعاملاتها مع سكان العمارة لما ينفضوا فى السلم وهى لسه مسيأة
وبعدين استنى مش تباركيلى
مش فكيت العمل ....قصدى الاتاشمينت
وحارد عليكى فى السريع

مساء النور والبنور يا جميل

bastokka طهقانة said...

هههههههههه
انت كده بتنافسيني
حلوة قوي
ايوة كده خلي هبة تفرس في جوزها
علشان يبقى مفروس و مفروسة

و بالنص يا نانا


و فيها اية لما الرز يشيط كانه فيشار مش كفاية انك بتعملي ليه تغيير
عين بتغمز

اوروفوار

Jana said...

هو مين اللى يقدر ينافسك يا طهطه يا جميل
دى بوست واحدة من النوع ده وطلعت عينى
بينى وبينك انا مش شاطرة قوى فى الفرس ....وبافكر اخد عندك كورس
ولحد ما اخلص الكورس حاديها فشار ههههههههه
تسخين يعنى على ما التقيل يشتغل
عين بتغمز برضه
سعيدة ان البوست عجبك
نورتينى
تحياتى

Desert cat said...

الله يكون فى عونك يا هانى
متجوز وكاله انباء
الا الشيف اسامه اخبارة ايه يا مدام سها
بوست هايل يا نانا تسلمى يا قمر

Jana said...

ديزيرت كات
سعيدة ان البوست عجبتك
وسها بتتابع الشيف رامزى على ام بى سى فور
وبتوعدك تدور على شيف اسامة بيطلع فى اى فضائية وتقولك اخباره...هى وراها حاجة
انا دخلت مدونتك وشكلها كده تجنن وحافضالها عشان اعد هناك مدة طويلة
وبخصوص البوست بتاعك بتاع تشابه الاسماء كان لازم تضيفيلهم موقف رابع
لما اتلخبطت اميرة البلطجية فيا انا وانتى
فاكرة يا نانا...؟؟؟

نورتينى يا قمر
تحياتى ليكى وللقطة ولو انى باخاف من القطط

اسكندراني اوي said...

المهم الراجل ما شربش شاي برضه

بصي يا نانا عشره على عشره
شرفيني حتلاقي حاجه كده برضه على قدي

Jana said...

اسكندرانى قوى
انا فعلا زرت مدونتك قبل كده
وكفاية انها عن اسكندرية
بس اول ما الكمبيوتر يتصلح حاروح واصيف عندكوا واقرا باقى البوستس
تحياتى وشكرا مرة تانية