Monday, May 12, 2008

تاج أحلام اليقظة ..الى اى مدى قد يذهب بك خيالك




الى اى مدى قد يذهب بك خيالك !!!؟؟


بناء على اقتراح الاستاذة مجداوية ...واقتراحاتها عندى أوامر


سنقوم بتناول موضوع التدوينة السابقة ...وهى عن أحلام اليقظة لمن لم يقرأها منكم...فى شكل تاج يمرر على الاخوة والاخوات المدونين والمدونات الاحياء منهم والاموات اليكترونيا .."نحفظ للباشمهندس عصفور المدينة حق براءة اختراع المصطلح " ...حيث الموت الكترونيا علينا حق ..حين نضطر اليه بسبب عمل او انشغال او سفر او انقطاع نت او امتحان ماث ..الخ ..ثم نعود من جديد اكثر نشاطا

وموضوع التاج سيكون عن احلامك والتى تخص ماضيك ..بافتراض انك رجعت فى الزمن للوراء ..ماذا ستقوم بتغييره وتعديله او القضاء عليه من الاساس ..بشكل خيالى بحت ..فلا نتطرق مطلقا فكرة "لو تفتح عمل الشيطان " ..فقط نحن نحاول تدارك اخطاء قديمة كان من شأنها لو اختلفت ان يكون عالمك افضل حاليا وهذا من وجهة نظرك وحدك وانت المسئول عنها

وايضا احلاما أخرى لديك ..مستقبلية ..
مطلوب الاجابة من الاخوة المشاركين فى تعليقات التدوينة السابقة
وسيتم اضافة البعض ..ممن يهمنا معرفة افكارهم القيمة وماذا يدور فى اذهانهم بهذا الخصوص

....................تاج أحلام اليقظة ...................

1- أذكر خمس أحلام على الاقل ..تخص ماضيك وتحلم فيها بتغيير اشياء ..ماذا ستعدل وماذا ستترك؟؟

2- أذكر خمس أحلام على الاقل ..تخص مستقبلك .

3- أذكر شخصين على الأقل .متواجدين فى حياتك حاليا ..كنت تود وجودهم قبل الآن بزمن
4- أذكر شخصين على الأقل غير متواجدين فى حياتك حاليا كنت تود وجودهم الان او فى حياة اولادك مستقبلا ..

"هؤلاء الاشخاص من خاصة أهلك او اصدقائك واقعيا او افتراضيا او ..رموز فى حياتنا بشكل عام "
أرجو ممن يجيب على التاج او من قرر اجابته ولكن بعد حين لمشغولياته أن يعلمنى ...فأكون شاكرة له...

التاج مرسل للآتى ذكرهم :
من شارك فى التعليقات بالترتيب ..لكن حنبدأ ب..
مجداوية .. طباخ التاج بيدوقه ..وانتى اللى ظبطتى ملح التاج وسبتينى انا اعانى من الفلفل والشطة
بريك .. املنا فيكى تخلينا متفائلين ..لأنك اصغرنا سنا تقريبا
أمولة ..عندى فضول فظيع انكش معاكى ههههههههههه وسعيلى بقى شوية كده جنبك وانتى بتحلمى
محمد عبد الغفار ..ممكن نعملك ديسكاونت ونشيل السؤال الاول .حيث يقظتك للامام ..لكن حاول برده فارائك تهمنا
الطائر الحزين ..طبعا معاك الة الزمن ..يا بختك يا ريت تسلفها لاخواتك بعد ما تخلص
ست البيت ..لسه مش عارفانى ؟؟ ...جاوبى التاج وانا اقولك
اسكندرانى اوى .. حاسمحلك بحلم واحد بس عن اسكندرية ماهى لازم تكون فى صدارة احلامك
بيتنا القديم ..والتاج ده بمناسبة ذكرى ميلادك .كل سنة وانت طيب ..ومحدش يحرجه يا جماعة هو عارف انه يوافق شهر المنحة بتاعة كل سنة ووعد ياخد باله المرة الجاية وميعملش كده تانى
آلام وآمال .. حاسة حالاقى خمس احلام عن الالسن لوحدها ..اياك
.. ال جى ..تاج بتاج والبادى أظلم.. بس ابعدى عن المحافظ خلى الحلم يبقى فيه أمل ..بدل ما يتهد هو كمان:) منتظرة احلامك بشغف
الربان.. متوقعة احلام قوية ..زى سفينتك ان شاء الله
خمسة فضفضة ..لو مجاوبتيش التاج ..حاجيبلك 2 كيلو برتقال من اللى مش بتحبى لونه ..واطلب منك على الملأ اغنية بابا حسنى :)
عبد الله جروم ..انا مصممة اسميك بمدونتك القديمة ..التانية طبعا حلوة ..لكن القديمة متتنساش
الغزالى ...متحاولش ...افتح بس السكة ..مش حتصد على الاحلام صدقنى
ميرامار ..مادام وعدتينى ترجعى للمدونة ...اهو اول بوست تاج عشان تحرمى تغيبى تانى
فهد .. ده تاج ظريف جدا متقلقش ..اشرب بس عصير دوم وانت تركز :)

وباقى الاخوة المدونين واللى تهمنى اجابتهم جدا

عصفور المدينة .."عارفة حضرتك مشغول جدا ..لكن هو ده بقى العشم الالكترونى D:
أم البنات .. احلامك حاساها احلامنا كلنا
طال الليل .. اول ما ترجع ..لعله خير ان شاء الله ..احلامك حتكون فى مكانها
فرنسا هانم .. زعلانة منك عشان مش بتزورينى وانا بحبك والله قمت اتلككت بالتاج عشان تجيلى وجدا احلامك تهمنى بس باهزر مازعلش منك انا ابدا
رفقة عمر ..حاشوف احلام تجنن واحلام تدعو للتأمل
طعمة ..باحبك فى الله ..ويهمنى اعرف احلامك
الباحث عن الحقيقة .. ده تاج عشان تبطل تقدم عرقسوس ..الناس بتستغيث ..واحلامك ان شاء الله سكر زيادة
ابن حجر العسقلانى .. فى غاية الاحراج عشان باعتلى تاج زمانه حمض فى التلاجة وانا ليا عين ابعتلك واحد ..بس اعمل ايه احلامك اكيد تهم الشعب :)
صيد الخاطر ..اوع الاقى العشر احلام عن التعيين ...بأدعيلك
دكتور مجهول ...حنحفظ التاج فى التلج لحد ما ترجع بالسلامة
لعلها خير .. عايزة اعرف احلامك ..لعلها خير ان شاء الله
أم أحمد .. احلامك الخاصة بيكى وبأحمد وبأبو أحمد بس من غير بحلقة فى عينه
لونلى .. ان شاء الله فى أحلامك متكونيش وحيدة
حطم قيودك .. يا ترى فى أحلامك قدرتى فعلا تحطميها !!؟؟
دكتور خبيب..لن نظنه اهمالا لو اتأخرت فى اجابته ..ولكنه وراك وراك
عاشقة الفردوس .. احلامك تهمنى ..وربنا يكرمك بالفردوس الاعلى
سلوى ..بتعجبنى دايما تأملاتك ..يا ترى ايه هى احلامك
عمر المصرى .. شاركنا معاك فى احلامك
المستنصر بالله .. احلامك اكيد فى روعة اسمك الرمزى
أحمد الصباغ .. متوقعة انطلاق بلا حدود فى احلامك
مسلم .. فكما قلت لا نملك الا ان نتمنى ..
دكتور حر .. وأكيد فى احلامك حر كمان
أ. سمير .. فى الاحلام نوع من الخروج عن الصمت
منى .أحاسيس .. عرفتك من ال جى ..زرتك لقيتك زى ما وصفتك ..شاركينا احلامك
واى حد يحب يجاوب على التاج وينورنا برأيه يتفضل
كفاية كده عشان حرام ...وانتوا اكيد حتعملوا الواجب وتمرروه لآخرين ارائهم قيمة وتهم الجميع
يالا ....متنسوش دى احلام يقظة ....يعنى ياريت متحلموش فى البلكونة

دمتم طيبين




51 comments:

david santos said...

Hello, Jana!
Excellet post.
Have a nice day.

عصفور المدينة said...

Hello,Jana
جزاك الله خيرا بس ادعي لي النت يرجع وانا آخر الأسبوع اجاوبه بس مدوخني وانا أصلا غير متاح 16 ساعة في اليوم الله المستعان

رفقة عمر said...

هوتاج جميله قوى
شكرا حضرتك جداا لتمريرة ليا ان شاء الله هاجاوبه
جزاكى الله خيرا على حسن ظن حضرتك بى

.:.-=- ELGaZaLy-=-.:. said...

هممممممممممممممممممممممممم

صعب اوى انا بالذات اجاوب على التاج دة...

بيتنا القديم said...

احم احم
الاستاذة جنى..!!
تسليم البضاعة (التاج)في بطن الزير..!!
كلمة السر: كول البطيخ قبل الطبيخ.!
لو نسيتيها في واحدة تانية: السنجة في
الرنجة...!
لو نسيتيها في واحدة تالتة: العبارة
في الدبارة..!
لو نسيتيها اعتبري العملية ملغية..!!

(:

التاج اتجاوب يا فندم..
جزاكم الله خيراً

الربان said...

تحياتي

تم عمل اللازم و شكرا علي الاهداء.

تحياتي و تقديري

Jana said...

David Santos

thanks for your comment
I really appriciate dropping by my blog

gracias ....

Jana said...

عصفور المدينة

هالو بالانجلش ..وهولا بالاسبانى كمان
بس النت يرجع
:D
تصدق حضرتك ..الاخ سانتوس فعلا ظريف علق بعد ثوان من نشر البوست ..يعنى لو حد ضليع جدا فى العربى ميلحقش يقراه حتى
هههههههههه

والله مفتقدين حضرتك ...يعنى شغل كتير وكمان انقطاع نت !!؟؟
الحمد لله على كل حال

أضحكنى الشات بوكس ..حين قرأت ان النت رجع ..وبعد فرحة عارمة ..انقطع من جديد

ادعو لحضرتك بعودة النت
وان يبارك الله فى الوقت والجهد
فيصير تعبك فى ميزانك باذن الرحمن

فى انتظار اجابات حضرتك

أكرمك الله وأعزك
دمت طيبا

la3lahakhier said...

احمممممممم
يا كسوفى منك والله بس
تم عمل اللازم
وتاويناااااااااااااااه
هههههههه
كل التحية
وطبعا انا ماجاوبتش على المقصود بالظبط بس معلش

فرنسا هانم said...

اولا انا كده هادى لنفسى لفت نظر على التأخير
لكن اعذرينى
مشغوله جدا
اما عن التاج
فاشكرك جدا على تمريره لى ضمن باقه من الاخوه الافاضل
بس انتظرينى قليلا لان عندى تدوينتان فى المحفوظات وخايفه يحمضوا

Ahmed Al-Sabbagh said...

من عيونى الجوز
بس كدة
شكرا لتمرير التاج ليا
والله انا كان حلمى صغير
صغير اوى
من كتر صغرة ما بقيتش اشوفة
ههههههههه
على رأى علاء ولى الدين

حاضر انتظرى قريبا هجاوب التاج

اسكندراني اوي said...

اشكرك للشرف ده
ححاااول ان شاء الله

مجداوية said...

السلام عليكم

ربنا يبارك فى عمرك اختنا الحبيبة
انا جاية أشيل التاج وجايبة عتالين معايا اصل الشيلة صعبة أوى

الله المستعان

قريبا سترى أحلام يقظتى

وأنا اللى جبت ده كله لنفسى
البوست بتاعك كان رائع بحق ويستحق ان يمرر لكل المدونات

تحياتى وامتنانى
وبعد اذنك حاروح احلم وانا مفتحة بس خايفة نسمة بنتى تقول ماما جرى لها ايه!!!!

سلوى said...

شكرا على التاج
وشكرا ع الزيارة والتعليق

أخيرا تركتي تعليق

ههههههههه

التاج تمت إجابته في مدونتى طوق الحريه
وشكرا مرة تانيه

دمتى بكل الخير

khobayb said...

جميل جدا

بارك الله فيكِ

ومتقلقيش حضرتك نهائي ..

احنا عندنا سياسة صريحة في المدونة للتاجات :

التاجات القديمة .. مبنجاوبهاش

الجديدة بقى .. بنسيبها تقدم !!

---

الله المستعان

:)

الباحث عن الحقيقة said...

وانتي بقى المدير الفني ولا ايه
قاعد تمرري التاج لكل الناس ومش بتجاوبي؟
وبعدين انتي مخلتيش حد نمررله التاج
ده هجوم شرس يا باشمهندسه
عموما هشوف
سعداء بان حضرتك لسه فاكرانا
واسف على الغياب

مجهول said...

هههههههههه
انا جيييييييييييييت
اكسري التلج وطلعي التاج
هههههههههه
يارب تكوني بخير

صراحة انا مينفعش اجاوب علي التاج لظروفي الحالية . اصل التاجات عايزة مزاج حلو وصافي

عموما اوعدك لو اقدر اجاوبه مش حتأخر انتي تؤمري وعلينا التنفيذ
انا عينتك اميرة للملكة بدلا من الاميرة المختفيه البلطجية

ايه اخبارها ؟ لو تعرفي شيء ياريت تطمنينا عليها

دمتم بخير يا اهل التاجات
ونختم ونقول كما قال عميد مدوني العالم

Hello, Jana!
Excellet post.
Have a nice day.

ammola said...

نانا
انا قلقانة عليكى
ودى اول مرة تتاخرى عليا
انا عارفة الولاد بيمتحنوا
سيبت لك آى أم على الماسنجر
يا ريت بأه تريحينى
بجد انا قلقانة جدا

صيد الخاطر said...

الله يجزاكي خير
شكرا ليكي على حسن ظنك وبارك الله لك
ونفع بك الدين

ومتخفيش
مش العشرة هيبقوا عن التعيين

تسعة فاصلة تسعة وتسعين من مية عن التعيين

ادعيلنا اختي الفاضلة

Jana said...

رفقة عمر

شكرا لاجابتك على التاج
اجاباتك ..دلت على قناعة قلما تجدها
فى انسان
أسعدنى اكتشاف أحلامك
وأتمنى من الله أن يحقق لكى ما فيه الخير دائما
وأن يسعد قلبك ..ويرزقك ما تتمنين

منورانى دايما
دمتى طيبة

Jana said...

Elgazaly

همممممممممم
كنت عارفة انك حتقول كده
لكن ممكن نقول ...مش عايز افكر فى احلام الماضى ..لم تتحقق ..ولا زلت أحلم بها ..فلا داعى لاطلاقها من جديد
لكن ممكن تحلم بجديد
واذا منعت نفسك عن ده
تبقى قسوت على نفسك ...ومنعت روحك من التحليق فى سماء الحلم
لانه أحيانا بيكون وسيلتك الوحيدة للخروج من قفص العصفور الحبيس داخل احلامه القديمة ..حيث كل حلم يمثل احدى اعمدة القفص
ولا انت شايف ايه ؟؟

منورنى دايما

دمت طيبا

MiraMar said...

حبيبتي ناناسلام عليكم
أنا ردت بطريقتي
عل التاج
انتي عارفني طاقه وأعشق التميز:)))))))))))))
هرد على التاج على شكل بوستات متفرقه متعدده متنوعه:)
كل بوست حلم بس
أحلام فانتازيا
يارب تعجبك
فتافيت السكر

ست البيت said...

جنى أنا جاوبت على الأسئلة في مدونتي من غير لف ولا دوان وبدون الاستعانة بصديق
مين أنتي حيرتيني

Anonymous said...

اسجل تقديرى واحترامى

إيمان الحسيني said...

أحبك الذي أحببتني فيه يا جنى
بإذن الله أجاوب على التاج في أقرب فرصة ممكنة
والله المستعان

Jana said...

اعتذر عن التأخير فى الرد ...سامحونى

Jana said...

بيتنا القديم

فيشنا الهوامش يا فندم
وبعتنا دقماق وابو ركبة يطلعوا البوضاعة من بطن الزير اتكهربوا وشعرهم وقف .وبيطلعوا نور دلوقتى . يظهر كلمة السر مش صح
العملية الجاية
كلمة السر
يا فرج ابعتلى لب اسمر

اجاباتك يا سمسم ..اجمل حاجة فيها السخرية من خلال كلمات خفيفة الظل .. توجع وتضحك فى وقت واحد
لكنها ..كانت متميزة بحق

شكرا لروعة ما قرأت

دمت طيبا

Jana said...

الربان

باخرتك تلزم اليمين دائما ستصل بإذن الله فى سلام ببركة النية العظيمة فى السفر والقصد من وراءه

اجاباتك كانت رائعة
هم خريجى تجارة دول طول عمرهم متميزين
ابقى ادعينى لقص شريط المركز ان شاء الله ...
ربنا ينولك مرادك
جزيل الشكر

دمت طيبا

Jana said...

لعلها خير

ليه الكسوف ليه
المهم انك تاوتيه
هههههههههه
وانا استمتعت بشدة فى قراءته
وكنت عايزاكى تعزمينى عندك فى الجنينة واشرب قهوة فى مج متناسق اللون مع الفوتيه مع لون العباءة ههههههههه

احلامك ..خلتنى احلم معاكى
وخصوصا رماح ... كان نفسى اشوفه
صحيح ..سمعتى اغنية الحجار ..فى قلب الليل ؟؟.. سمعتها مؤخرا افتكرت رماح

شكرا ليكى حبيبة قلبى
اسعدتينى بمعرفة احلامك بجد
ربنا يكرمك بخيرها

دمتى طيبة

Jana said...

فرنسا هانم

استناكى شهرين تلاتة
بس ترجعيلنا بالسلامة

الف لابأس عليكى حبيبة قلبى

انا خفت لمااختفيتى فجأة وخضيتينا عليكى يكون التاج هو السبب لانه كان آخر واحد شافك ...قصدى اتبعتلك
:)
لكن الحمد لله على كلء شىء
ما يصيب المؤمن من شوكة فما فوقها الا رفع الله له بها درجة أو حط عنه بها خطيئة

حمدا لله على سلامتك يا جميل
ربنا يباركلك

دمتى طيبة

Jana said...

أحمد الصباغ

مبروك اولا على اول عدد
كان نفسى احضر حفل التوقيع ..لكن صعب من اسكندرية
:(

أحلامك مهما كانت صغيرة مسيرها تكبر معاك ...والاهم انك بفضل ربنا تحققها ..كلك طموح ما شاء الله
فتفائل خيرا
:)
مستنية اجاباتك
اللى بالجوز واللوز دى
ربنا يوفقك

دمت طيبا

Jana said...

اسكندرانى اوى

الشرف لينا يا فندم
انك تجاوب على التاج
وتشركنا فى بعض احلامك
كما اشركتنا فى خواطر عشقك لاسكندرية

منتظرة اجاباتك

ربنا يكرمك ويعزك

دمت طيبا

Jana said...

مجداوية

يا فندم العتالين دول كانوا تبع المدونة..وشايهم علينا
ليه صممتى برده
يااااااه على الاحراج
طب ادتيهم كام بقى عشان باقسم معاهم!؟؟
:)
حبيبة قلبى
فكرتك ..بانى اعمل التدوينة تاج ..كانت حقا رائعة ..واتاحت لنا كلنا فرصة التعرف الى احلامنا بعضنا البعض
انا عرفت من خلاله كتير عن ناس تهمنى فعلا ..واخر خبر حلو عرفته من اجابات المستنصر بالله النهاردة ..شفتى التاج عمل ايه ؟؟

ربنا يباركلك ويكرمك
اجاباتك كانت تهمنى بشكل خاص
وعلى فكرة باحب اوى عصفور الجنة زيك ..وكان نفسى ادخل فنون جميلة وكنت شاطرة فى العمارة ...اما فى الرسم العادى اخرى ارسم بالرصاص
ابقى كويسة كده؟؟؟
هههههههههه

أكرمك الله وأعزك
دمتى طيبة حبيبتى

Jana said...

سلوى

نورتينى فى اول زيارة
وخصوصا انك جاية من غير فرفر ولا شواكيش
:)
انا ضحكت من قلبى فى اجاباتك
على خفة الدم بجد ..ربنا يفرح قلبك دايما

احلامك كانت جميلة جدا
وخصوصا ما سعيتى لتحقيقه وربنا وفقك فيه لجدك وسعيك زى مشروعك الخاص مثلا
ربنا يحققلك اللى فيه الخير ليكى

اديكى عرفتى السكة بقى
مش تتأخرى تانى

ربنا يوفقك ويسعد ايامك يا كميل
دمتى طيبة

Jana said...

دكتور خبيب

الله يباركلك
أضحك الله سنك

دى سياسة القرشى للعطور...لما يسيب البرفيوم يعتق
لكن التاجات بتحمض حضرتك مش بتعتق
:]
عموما انت اللى حتجاوبه وحتعانى وحدك من ريحته
احنا على ما نقراه حيكون اتهوى شوية
هههههههههههه

مستنية اجابات ان شاء الله بريحة الياسمين

ربنا يوفقك فى امتحاناتك
دمت طيبا

بيتنا القديم said...

جزاك الله خيراً يا جني..!!

دايماً كده مش تخلى الواحد يعرف يتكلم

بعد كلامك...!!

(:

Jana said...

الباحث عن الحقيقة

لا ده استقصاد بقى
الاول تطلق علىّ اسم غير اسمى ..عديناها
لكن تطلق اوشاعة مغرضة بانى باشمهندسة ؟؟؟
طب انا كان فى احلامى صيدلة وفنون جميلة واداب انجلش ...لكن هندسة عمرى ما فكرت ولا حلمت ..جبتها منين دى ؟؟
حضرتك انا بعد كل ده ..باشمحاسبة ..يعنى باحاسب وانا باعدى الشارع وباحاسب على المشاريب عندك فى الاستراحة وكده يعنى
:)
ايون انا المدير الفنى ورئيس التحرير والمخرج والسبكى كمان
ومتفتحش عليا فاتوحة ...صاحب التاج مش بيجاوبه ..ده اخر تعديل فى الدستور حضرتك
:)
مستنية اجابتكم انت وعسقول بجد
ربنا يباركلك
دمت طيبا

Jana said...

دكتور مجهول

حمدا لله على سلامتك
التلج حنشيله يا فندم عشان الشربات يكون ساقع
:)
هالو برده !!!؟؟؟
هههههههههههههههههههههههههه
حضرتك والباشمهندس عصفور المدينة
حتستلمونى ولا ايه؟؟
:D

فعلا عشان تحلم لازم تكون صافى المزاج ..والا تبقى كوابيس مش احلام ربنا يعافينا منها
لكنى متفائلة بصفو المزاج وتحسن المود قريبا ..ولا زلت فى انتظار احلام سيادتكم
أميرة البلطجية ..الحمد لله رب العالمين بخير من خلال تواصلى معاها عبر الايميل والفيس بوك والتكنولوجيا الحديثة واى حاجة غير المدونات ..انا بامارس هوايتى المحببة فى الزن ..انها ترجع للتدوين ..فتوقع واحدة من اثنتين
انها ترجع .... وده احد احلامى بالمناسبة
او انها ...تقاطعنى من كتر الزن ومش يبقى فى حتى ايميل
هههههههههههه
اصلى زنانة متمرسة مش هاوية يعنى
:)
حابلغها سلامك باذن الرحمن

ارجو انك متنقطعش عنا تانى
وده حلم آخر
وكما قال عميد مدونى العالم

have a nice day
اشمعنى انا يعنى ؟؟؟؟

Jana said...

ammola

ليه قلقانة
انا جيت اهو
وبعتلك طبعا على الماسنجر

امتحانات الولاد !!!؟؟؟
ولاد مين ؟؟؟؟؟
اااااااااااه
صح ابنى عنده امتحان
فكرتينى
هو الامتحان امتى ؟؟؟
ههههههههههه
انا خلاص هيست من الفراكشنز

ادعيلى يا كميل
مش ناوية ربنا يهديكى وتتجنى وتفكرى تحلمى
انا مستنياكى

ربنا يكرمك ويباركلك
دمتى طيبة

Jana said...

صيد الخاطر

فكر بجد انك تجاوب على التاج بابيات من الشعر
انت متميز فعلا
وحتبقى فكرة جديدة ومفتكسة
:)

احلم بالتعيين زى مانت عايز
عشرة عشرين
هى الاحلام بفلوس؟؟؟
واحنا حندعيلك
بس ده بقى اللى بفلوس
:))

مستنية احلامك
ربنا يوفقك

دمت طيبا

Anonymous said...

لا تننسوا الخميس 22/5
الساعة السادسة والنصف مساء
حفل توقيع العدد الاول من سلسلة مدونات مصرية للجيب
بمكتبة عمرو بوك ستورز
شارع طلعت حرب
فوق مطعم فلفلة
--------------
اماكن توزيع العدد :
1- عمر بوك ستور شارع طلعت حرب
2- مكتبة البلد امام الجامعة الامريكيه
3- سندباد وسط البد خلف مكتبة مدبولى
4- سنابل شارع شريف
5- الهيئة العامه للكتاب فرع الزمالك
6- مكتبة ديوان الزمالك
7- مكتبة ديوان مصر الجديده
8- مكتبة أفاق شارع القصر العينى
9- المكتبة الدوليه مدينة نصر ش الطيران
10- كشك جرايد كوفى الامريكين - الاسعاف
11- كشك جرايد الجامعه الامريكيه
روابط الفيس بووك والمدونة :
http://www.facebook.com/group.php?gid=13820826455
http://sneen.blogspot.com

AHMED SAMIR said...

تم الاجابة على التاج يا فندم
الف شكر

Jana said...

miramar

حبيبة قلبى
احلامك الفانتازيا
روعة

متميزة ..حتى فى احلامك

وان شاء الله نفرح بيكى قريب
........
انا كنت باتكلم عن النتيجة
انتى افتكرتى ايه يا ميرا!!! ؟؟
ههههههههههه

ربنا يوفقك ويسعد ايامك

دمتى طيبة

Jana said...

ست البيت

فعلا يا جميل اجاباتك من غير لف ولا دوران
واحلامك عن المستقبل خرجت محملة بالرومانسية رغما عنك ..وانتى تدعين انك لستى كذلك... ماشى يا واقعية

بس مكانش العشم تردهالى بتاج خارج بنار الفرن كده

اوعدك ان شاء الله اجاوبه ...بس اتفرغ قليلا ..وامخمخ لاجابته ..لانه مولع فعلا
منقدرش نرفض لك طلب
ايه اللغة الاسكندرانى دى ؟؟
جاتلنا منين !!!!!!!!؟؟

ربنا يسعد قلبك ويباركلك
دمتى طيبة ...

Jana said...

محمد الجرايحى

تشرفت بمرورك الكريم
مما اتاح لى الفرصة للتعرف على مدونة حضرتك الرائعة

اتمنى لو تشاركنا حضرتك فى اجابة اسئلة التاج
فقد قرأت فى تدويناتك احلاما للوطن للناس للمسلمين فيسعد الكثير التعرف عليها بالاضافة لاحلام شخصية .لذاتك انت
أسعدنى تعقيبك
نورتنى
تقديرا واحتراما متبادلين
أكرمك الله وأعزك

دمت طيبا

Jana said...

ايمان الحسينى

طعمة الجميلة
كيف أحوالك

أتوق بشدة لمعرفة أحلامك
واتخيل بساطتها وسموها فى آن واحد

فلم أعهد منك الا كل راقى وبديع

فى الانتظار حبيبتى
ربنا يباركلك

دمتى طيبة

Jana said...

بيتنا القديم

جزانا واياكم يا سمسم

قد يعتقد البعض ان صياغة الاحلام فى كلمات يسيرا

فمعظم الاحلام تبدو كلوحة سريالية لا يفهمها الا من أبدعها

فمن الرائع اذن ان تشركنا معك فى لوحتك وتنجح فى توصيل ما تعنيه خطوطها والوانها
وهذا ما فعلته أنت

ربنا يسعد ايامك ويباركلك
دمت طيبا

Jana said...

مدونات مصرية للجيب

لا مش حانسى
بس النهاردة خلاص الخميس
والساعة دلوقتى حوالى 5 الا ربع
وقطر اسكندرية ..مصر ...زمانه قام
:)

ربنا يوفقكم
نجحتم فى الفكرة ...وخرجت الى النور
بفضل الله ..ثم جهودكم

مبروووووووووووووك
للجميع

Jana said...

a. samir

قريته يا دكتور
بامارة وردة لما غنت لفريد
وفريد رد عليها وفقع موال
:)

احلامك ايجابية
خصوصا ما يتعلق بصلة الرحم وزيادة الثقافة الدينية
فجزاك الله خيرا عنا
انت ذكرتنا كلنا

اجاباتك أسعدتنى فعلا

ربنا يباركلك انت وخطيبتك
ويوفقكم
دمتم طيبين

أم أحمد المصرية said...

صديقتي الجديدة جنا شوفي الدنيا التاج بتاعك طلع من اسكندرية راح دمياط عند سالي و رجع لي من هناك تاني اهديته لصيقتي مجداوية لقيتك سبقتيني عشان كده قلت لازم اتعرف علي صاحبة التاج الاصليةو كمان تطلعي اسكندرانية يا محاسن الصدف
ان شاء الله بداية صداقة جديدة
تحياتي

Jana said...

أم أحمد المصرية

صديقتى الجديدة ام أحمد
شرفت باللقب

التاج ده وشه حلو عليا ..عشان خلانى اعرفك ..والبركة فى مجداوية العزيزة

ايه رأيك بافكر اقترح عمل رابطة لمدونى الاسكندرية ..ده احنا مبقيناش شوية ..وشايفة ما شاء الله ان البحر مأثر فينا .. يعنى ممكن ننافس القاهريين دلوقتى .. موج البحر الجايات فيه اكتر من الرايحات
مش كفاية حفل التوقيع اللى عندهم فى القاهرة ولقاءات المدونين فى القاهرة و... و.. كله فى القاهرة
ده حقد على فكرة
اصلى متغاظة اوى عشان مرحتش
هاه ؟؟
مقلتليش ؟؟ معايا فى الرابطة ... ولا نكتفى بالنق عليهم بس ؟؟
هههههههههه

سعدت بتعليقك جدا
ربنا يكرمك ويباركلك فى احمد واخواته
ويوفقكوا فى الامتحانات

دمتى طيبة